೮. ಸೂದಸುತ್ತವಣ್ಣನಾ

೩೭೪. ಆಹಾರಸಮ್ಪಾದನೇನ ತಂತಂಆಹಾರವತ್ಥುಗತೇ ಸೂದೇತಿ ಪಗ್ಘರೇತೀತಿ ಸೂದೋ, ಭತ್ತಕಾರಕೋ. ದಹರೇಹಿ ಮನಾಪತರಂ ಅಚ್ಚೇತಬ್ಬತೋ ಅತಿಕ್ಕಮಿತಬ್ಬತೋ ಅಚ್ಚಯಾ, ಭೋಜನೇ ರಸವಿಸೇಸಾ, ತಸ್ಮಾ ನಾನಚ್ಚಯೇಹೀತಿ ನಾನಪ್ಪಕಾರರಸವಿಸೇಸೇಹೀತಿ ಅತ್ಥೋ. ತೇನ ವುತ್ತಂ ‘‘ನಾನಚ್ಚಯೇಹೀ’’ತಿಆದಿ. ಅಗ್ಗೀಯತಿ ಅಸಙ್ಕರತೋ ವಿಭಜೀಯತೀತಿ ಅಗ್ಗೋ, ಅಮ್ಬಿಲಮೇವ ಅಗ್ಗೋ ಅಮ್ಬಿಲಗ್ಗೋತಿ ಆಹ – ‘‘ಅಮ್ಬಿಲಗ್ಗೇಹೀತಿ ಅಮ್ಬಿಲಕೋಟ್ಠಾಸೇಹೀ’’ತಿ. ದಾತುಂ ಅಭಿಹರಿತಬ್ಬತಾಯ ಅಭಿಹಾರಾ, ದೇಯ್ಯಧಮ್ಮಾ. ತೇನಾಹ – ‘‘ಅಭಿಹಟಾನಂ ದಾಯಾನ’’ನ್ತಿ. ಇದಂ ಮೇ ಕಮ್ಮಟ್ಠಾನಂ ಅನುಲೋಮಂವಾತಿ ಇದಂ ಮಮ ಕಮ್ಮಟ್ಠಾನಂ ಏವಂ ಪವತ್ತಮಾನಂ ಅನುಲೋಮಾವಸಾನಮೇವ ಹುತ್ವಾ ತಿಟ್ಠತಿ. ಏವಂ ಪುನ ಪವತ್ತಮಾನಂ ಉಸ್ಸಕ್ಕಿತ್ವಾ ವಿಸೇಸನಿಬ್ಬತ್ತನತ್ಥಮೇವ ಹೋತೀತಿ ಏವಂ ನಿಮಿತ್ತಂ ಗಹೇತುಂ ನ ಸಕ್ಕೋತಿ ಬಾಲೋ ಅಬ್ಯತ್ತೋ, ಪಣ್ಡಿತೋ ಪನ ಸಕ್ಕೋತಿ. ಅತ್ತನೋ ಚಿತ್ತಸ್ಸಾತಿ ಅತ್ತನೋ ಭಾವನಾಚಿತ್ತಸ್ಸ. ಪುಬ್ಬಭಾಗವಿಪಸ್ಸನಾ ಸತಿಪಟ್ಠಾನಾವ ಕಥಿತಾ ‘‘ಸಕಸ್ಸ ಚಿತ್ತಸ್ಸ ನಿಮಿತ್ತಂ ಉಗ್ಗಣ್ಹಾತೀ’’ತಿ ವುತ್ತತ್ತಾ.