೮. ನಿಬ್ಬೇಧಭಾಗಿಯಸುತ್ತವಣ್ಣನಾ

೨೦೯. ನಿಬ್ಬಿಜ್ಝನ್ತೀತಿ ನಿಬ್ಬೇಧಾ, ನಿಬ್ಬಿಜ್ಝನಧಮ್ಮಾ ಧಮ್ಮವಿನಯಾದಯೋ, ತಪ್ಪರಿಯಾಪನ್ನತಾಯ ನಿಬ್ಬೇಧಭಾಗೇ ಗತೋ ನಿಬ್ಬೇಧಭಾಗಿಯೋ, ತಂ ನಿಬ್ಬೇಧಭಾಗಿಯಂ. ತೇನಾಹ ‘‘ನಿಬ್ಬಿಜ್ಝನಕೋಟ್ಠಾಸಿಯ’’ನ್ತಿ. ಭಾವೇತ್ವಾ ಠಿತೇನ ಚಿತ್ತೇನ. ವಿಪಸ್ಸನಾಮಗ್ಗಮ್ಪಿ ಗಹೇತ್ವಾ ‘‘ಮಗ್ಗಬೋಜ್ಝಙ್ಗಾ ಮಿಸ್ಸಕಾ’’ತಿ ವುತ್ತಾ. ತೇಹೀತಿ ಬೋಜ್ಝಙ್ಗೇಹಿ ಭಾವಿತಂ ಚಿತ್ತಂ. ತೇ ವಾ ಬೋಜ್ಝಙ್ಗೇ ಭಾವೇತ್ವಾ ಠಿತಂ ಚಿತ್ತಂ ನಾಮ ಫಲಚಿತ್ತಂ, ತಸ್ಮಾ ನಿಬ್ಬತ್ತಿತಲೋಕುತ್ತರಮೇವ. ತಮ್ಪೀತಿ ಫಲಚಿತ್ತಮ್ಪಿ ಮಗ್ಗಾನನ್ತರತಾಯ ಮಗ್ಗನಿಸ್ಸಿತಂ ಕತ್ವಾ ಮಿಸ್ಸಕಮೇವ ಕಥೇತುಂ ವಟ್ಟತಿ ‘‘ಬೋಧಾಯ ಸಂವತ್ತನ್ತೀ’’ತಿ ವುತ್ತತ್ತಾ.