೪. ಸುರಾಮೇರಯಸುತ್ತವಣ್ಣನಾ

೧೧೩೪. ಪಿಟ್ಠಸುರಾತಿ ಪಿಟ್ಠೇನ ಕಾತಬ್ಬಸುರಾ, ತಥಾ ಓದನಸುರಾ ಪೂವಸುರಾ, ಮಜ್ಜರಸಾದಿಭೂತೇ ಕಿಣ್ಣೇ ಪಕ್ಖಿಪಿತ್ವಾ ಕತ್ತಬ್ಬಾ ಸುರಾ ಕಿಣ್ಣಪಕ್ಖಿತ್ತಸುರಾ. ಸಮ್ಭಾರಸಂಯುತ್ತಾತಿ ಮೂಲಭೇಸಜ್ಜಸಮ್ಭಾರೇಹಿ ಸಂಯುತ್ತಾ. ಪುಪ್ಫಾಸವೋತಿ ನಾಳಿಕೇರಪುಪ್ಫಾದಿತೋ ಅಸ್ಸವನಕಆಸವೋ. ಮುದ್ದಿಕಫಲಾದಿತೋ ಅಸ್ಸವನಕಆಸವೋ ಫಲಾಸವೋ. ಇತೀತಿಆದಿಅತ್ಥೋ. ತೇನ ಮಧ್ವಾಸವಗುಳಾಸವಸಮ್ಭಾರಸಂಯುತ್ತೇ ಸಙ್ಗಣ್ಹಾತಿ. ಸುರಾಸವವಿನಿಮುತ್ತನ್ತಿ ಯಥಾವುತ್ತಸುರಾಸವವಿನಿಮುತ್ತಂ.