೭. ಪಠಮಆಮಕಧಞ್ಞಪೇಯ್ಯಾಲವಗ್ಗೋ

೩. ಪಞ್ಞಾಸುತ್ತವಣ್ಣನಾ

೧೧೩೩. ಲೋಕಿಯಮ್ಪಿ ವಿಸುದ್ಧತ್ಥೇನ ‘‘ಅರಿಯ’’ನ್ತಿ ವತ್ತಬ್ಬತಂ ಲಭತೀತಿ ‘‘ಲೋಕಿಯಲೋಕುತ್ತರೇನಾ’’ತಿ ವುತ್ತಂ.

೪. ಸುರಾಮೇರಯಸುತ್ತವಣ್ಣನಾ

೧೧೩೪. ಪಿಟ್ಠಸುರಾತಿ ಪಿಟ್ಠೇನ ಕಾತಬ್ಬಸುರಾ, ತಥಾ ಓದನಸುರಾ ಪೂವಸುರಾ, ಮಜ್ಜರಸಾದಿಭೂತೇ ಕಿಣ್ಣೇ ಪಕ್ಖಿಪಿತ್ವಾ ಕತ್ತಬ್ಬಾ ಸುರಾ ಕಿಣ್ಣಪಕ್ಖಿತ್ತಸುರಾ. ಸಮ್ಭಾರಸಂಯುತ್ತಾತಿ ಮೂಲಭೇಸಜ್ಜಸಮ್ಭಾರೇಹಿ ಸಂಯುತ್ತಾ. ಪುಪ್ಫಾಸವೋತಿ ನಾಳಿಕೇರಪುಪ್ಫಾದಿತೋ ಅಸ್ಸವನಕಆಸವೋ. ಮುದ್ದಿಕಫಲಾದಿತೋ ಅಸ್ಸವನಕಆಸವೋ ಫಲಾಸವೋ. ಇತೀತಿಆದಿಅತ್ಥೋ. ತೇನ ಮಧ್ವಾಸವಗುಳಾಸವಸಮ್ಭಾರಸಂಯುತ್ತೇ ಸಙ್ಗಣ್ಹಾತಿ. ಸುರಾಸವವಿನಿಮುತ್ತನ್ತಿ ಯಥಾವುತ್ತಸುರಾಸವವಿನಿಮುತ್ತಂ.

೧೦. ಪಚಾಯಿಕಸುತ್ತವಣ್ಣನಾ

೧೧೪೦. ನೀಚವುತ್ತಿನೋತಿ ಕುಲೇ ಜೇಟ್ಠಾನಂ ಮಹಾಪಿತುಚೂಳಪಿತುಜೇಟ್ಠಭಾತಿಕಾದೀನಂ ಅಭಿವಾದನಪಚ್ಚುಟ್ಠಾನಅಞ್ಜಲಿಕಮ್ಮಸಾಮೀಚಿಕಮ್ಮಾದಿವಸೇನ ನೀಚವುತ್ತಿನೋ.