೪. ಗಿಲಾನಸುತ್ತವಣ್ಣನಾ

೧೦೫೦. ನ ಖೋ ಪನೇತನ್ತಿ ನ ಖೋ ಏತಂ, ನೋತಿ ಚ ಅಮ್ಹೇಹೀತಿ ಅತ್ಥೋತಿ ಆಹ ‘‘ನ ಖೋ ಅಮ್ಹೇಹೀ’’ತಿಆದಿ. ಅಸ್ಸಸನ್ತೀತಿ ಅಸ್ಸಾಸನೀಯಾತಿ ಆಹ ‘‘ಅಸ್ಸಾಸಕರೇಹೀ’’ತಿ. ಮರಿಸ್ಸತೀತಿ ಮಾರಿಸೋ, ಏಕನ್ತಭಾವಿಮರಣೋ, ಸೋ ಪನ ಮರಣಾಧೀನವುತ್ತಿಕೋತಿ ವುತ್ತಂ ‘‘ಮರಣಪಟಿಬದ್ಧೋ’’ತಿ. ಅಧಿಮುಚ್ಚೇಹೀತಿ ಅಧಿಮುತ್ತಿಂ ಉಪ್ಪಾದೇಹಿ. ತಂ ಪನ ತಥಾ ಚಿತ್ತಸ್ಸ ಪಣಿಧಾನಂ ಠಪನನ್ತಿ ಆಹ ‘‘ಠಪೇಹೀ’’ತಿ. ಆಗಮನೀಯಗುಣೇಸೂತಿ ಪುಬ್ಬಭಾಗಗುಣೇಸು. ಪಮಾಣಂ ನಾಮ ನತ್ಥಿ ಅನನ್ತಾಪರಿಮಾಣತ್ತಾ. ನಾನಾಕರಣಂ ನತ್ಥಿ ವಿಮುತ್ತಿಯಾ ನಿನ್ನಾನತ್ತಾ.