೯. ಕುಲಸುತ್ತವಣ್ಣನಾ

೩೬೧. ಏವಂ ಪವತ್ತಈಹಿತಿಕಾತಿ ಏವಂ ದ್ವಿಧಾ ಪವತ್ತಈಹಿತಿಕಾ. ದ್ವೀಹಿತಿಕಾ ದುಕ್ಕರಜೀವಿಕಪಯೋಗಾ. ಸಲಾಕಮತ್ತಂ ವುತ್ತಂ ಏತ್ಥಾತಿ ಸಲಾಕಾ ವುತ್ತಾ, ಪುರಿಮಪದೇ ಉತ್ತರಪದಲೋಪೋ. ಉಭತೋಕೋಟಿಕನ್ತಿ ಯದಿ ‘‘ಕುಲಾನುದಯಂ ನ ವಣ್ಣೇಮೀ’’ತಿ ವದತಿ, ‘‘ಭೂತಾ ನಿಕ್ಕರುಣಾ ಸಮಣ ತುಮ್ಹೇ’’ತಿ ವಾದಂ ಆರೋಪೇಹಿ. ಅಥ ಸಬ್ಬದಾಪಿ ‘‘ಕುಲಾನುದಯಂ ವಣ್ಣೇಮೀ’’ತಿ ವದತಿ. ಏವಂ ಸನ್ತೇ ‘‘ಕಸ್ಮಾ ಏವಂ ದುಬ್ಭಿಕ್ಖೇ ಕಾಲೇ ಮಹತಿಯಾ ಪರಿಸಾಯ ಪರಿವುತೋ ಜನಪದಚಾರಿಕಂ ಚರನ್ತಾ ಕುಲೂಪಚ್ಛೇದಾಯ ಪಟಿಪಜ್ಜಥಾ’’ತಿ ಏವಂ ಉಭತೋಕೋಟಿಕಂ ವಾದಂ ಆರೋಪೇಹೀತಿ ಗಾಮಣಿಂ ಉಯ್ಯೋಜೇಸಿ.

ದ್ವೇ ಅನ್ತೇತಿ ಉಭೋ ಕೋಟಿಯೋ. ಬಹಿ ನೀಹರಿತುನ್ತಿ ನ ವಣ್ಣೇಮಿ ವಣ್ಣೇಮೀತಿ ದ್ವೇ ಅನ್ತೇ ಮೋಚೇನ್ತೋ ತಂ ಪುಚ್ಛಿತಮತ್ಥಂ ಬಹಿ ನೀಹರತಿ ನಾಮ. ತತ್ಥ ದೋಸಂ ದತ್ವಾ ಚೋದೇನ್ತೋ ತಂ ಅಪುಚ್ಛಂ ಕರೋನ್ತೋ ಗಿಲಿತ್ವಾ ವಿಯ ಅನ್ತೋ ಪವೇಸೇತಿ ನಾಮ.

ಇತೋ ಸೋ ಗಾಮಣೀತಿಆದಿ ಅತ್ತನೋ ಭಿಕ್ಖೂನಂ ಅಞ್ಞೇಸಞ್ಚ ಅತ್ಥಕಾಮಾನಂ ಭಿಕ್ಖಪ್ಪದಾನೇನ ಅನಿಟ್ಠಪ್ಪತ್ತಿಅಭಾವದಸ್ಸನತ್ಥಂ ಆರದ್ಧಂ. ದಾನೇನ ಸಮ್ಭೂತಾನೀತಿ ದಾನಮಯೇನ ಪುಞ್ಞಕಿರಿಯವತ್ಥುನಾ ಸಮ್ಮದೇವ ಭೂತಿಂ ವಡ್ಢಿಂ ಪತ್ತಾನಿ. ಸಚ್ಚೇನ ಅರಿಯವೋಹಾರೇನ ಸಮ್ಮದೇವ ಭೂತಾನಿ ಉಪ್ಪನ್ನಾನಿ ಸಚ್ಚಸಮ್ಭೂತಾನೀತಿ ಆಹ ‘‘ಸಚ್ಚಂ ನಾಮ ಸಚ್ಚವಾದಿತಾ’’ತಿ. ಸೇಸಸೀಲನ್ತಿ ಅಟ್ಠವಿಧಅರಿಯವೋಹಾರತೋ ಅಞ್ಞಸೀಲಂ. ನಿಹಿತನ್ತಿ ತಸ್ಮಿಂ ಕುಲೇ ಪುಬ್ಬಪುರಿಸೇಹಿ ನಿಧಾನಭಾವೇನ ನಿಹಿತಂ. ದುಪ್ಪಯುತ್ತಾತಿ ಕಸಿವಾಣಿಜ್ಜಾದಿವಸೇನ ದುಟ್ಠು ಪಯುತ್ತಾ ಕಮ್ಮನ್ತಾ. ವಿಪಜ್ಜನ್ತೀತಿ ನಸ್ಸನ್ತಿ. ಕುಲಙ್ಗಾರೋತಿ ಕುಲಸ್ಸ ಅಙ್ಗಾರಸದಿಸೋ ವಿನಾಸಕಪುಗ್ಗಲೋ. ಅನಿಚ್ಚತಾತಿ ಮರಣಂ. ತಸ್ಮಿಂ ಕುಲೇ ಪಧಾನಪುರಿಸಾನಂ ಭೋಗಾನಂ ವಾ ಸಬ್ಬಸೋ ವಿನಾಸೋ. ತೇನಾಹ ‘‘ಹುತ್ವಾ ಅಭಾವೋ’’ತಿಆದಿ.

ಕುಲಸುತ್ತವಣ್ಣನಾ ನಿಟ್ಠಿತಾ.