೧೩. ಪಾಟಲಿಯಸುತ್ತವಣ್ಣನಾ

೩೬೫. ‘‘ಮಾಯಞ್ಚಾಹಂ ಪಜಾನಾಮೀ’’ತಿ ವಚನಂ ಕಾಮಂ ತೇಸಂ ಮಾಯಾವೀಭಾವದಸ್ಸನಪರಂ, ಭಗವತೋ ಪನ ಮಾಯಾಸಾಠೇಯ್ಯಾದಿಕಸ್ಸ ಸಬ್ಬಸ್ಸ ಪಾಪಧಮ್ಮಸ್ಸ ಬೋಧಿಮೂಲೇ ಏವ ಸೇತುಘಾತೋ, ತಸ್ಮಾ ಸಬ್ಬಸೋ ಪಹೀನಮಾಯೋ, ಸಬ್ಬಞ್ಞುತಾಯ ಮಾಯಂ ಅಞ್ಞೇ ಚ ಞೇಯ್ಯೇ ಸಬ್ಬಸೋ ಜಾನಾತಿ. ತೇನ ವುತ್ತಂ ‘‘ಮಾಯಞ್ಚಾಹಂ, ಗಾಮಣಿ, ಪಜಾನಾಮೀ’’ತಿಆದಿ. ಮಾಯಞ್ಚ ಪಜಾನಾಮೀತಿ ನ ಕೇವಲಮಹಂ ಮಾಯಂ ಏವ ಜಾನಾಮಿ, ಅಥ ಖೋ ಅಞ್ಞಮ್ಪಿ ಇದಞ್ಚಿದಞ್ಚ ಜಾನಾಮೀತಿ.

ಇತ್ಥಿಕಾಮೇಹೀತಿ ಇತ್ಥೀಹಿ ಚೇವ ತದಞ್ಞಕಾಮೇಹಿ ಚ. ಏಕಸ್ಮಿಂ ಠಾನೇತಿ ಏಕಸ್ಮಿಂ ಪದೇಸೇ. ಏಕೇಕಸ್ಸೇವ ಆಗನ್ತುಕಸ್ಸ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ. ಸತ್ತಿಅನುರೂಪೇನಾತಿ ವಿಭವಸತ್ತಿಅನುರೂಪೇನ. ಬಲಾನುರೂಪೇನಾತಿ ಪರಿವಾರಬಲಾನುರೂಪೇನ. ಸತ್ತಿಅನುರೂಪೇನಾತಿ ವಾ ಸದ್ಧಾಸತ್ತಿಅನುರೂಪೇನ. ಬಲಾನುರೂಪೇನಾತಿ ವಿಭವಬಲಾನುರೂಪೇನ. ಧಮ್ಮೇಸು ಸಮಾಧಿ ದಸಕುಸಲಧಮ್ಮೇಸು ಸಮಾಧಾನಂ. ಅಗ್ಗಹಿತಚಿತ್ತತಾ ಪರಿಯುಟ್ಠಕಾರಿತಾ. ತೇನ ಲೋಕಿಯಸೀಲವಿಸುದ್ಧಿ ದಿಟ್ಠಿವಿಸುದ್ಧಿ ಚ ವುತ್ತಾ. ತಥಾ ಚಾಹ – ‘‘ಕೋ ಚಾದಿ ಕುಸಲಾನಂ ಧಮ್ಮಾನಂ, ಸೀಲಞ್ಚ ಸುವಿಸುದ್ಧಂ ದಿಟ್ಠಿ ಚ ಉಜುಕಾ’’ತಿ (ಸಂ. ನಿ. ೫.೩೬೯). ತತ್ಥ ಪತಿಟ್ಠಿತಸ್ಸ ಉಪರಿ ಕತ್ತಬ್ಬಂ ದಸ್ಸೇತುಂ ‘‘ಧಮ್ಮಸಮಾಧಿಸ್ಮಿಂ ಠಿತೋ’’ತಿಆದಿ ವುತ್ತಂ. ಅಯಂ ಪಟಿಪದಾತಿ ತಸ್ಸ ಕಮ್ಮಫಲವಾದಿನೋ ಸತ್ಥು ವಚನಂ ಸಬ್ಬೇಸಞ್ಚ ಅಯಂ ಮಯ್ಹಂ ಸೀಲಸಂವರಬ್ರಹ್ಮವಿಹಾರಭಾವನಾಸಙ್ಖಾತಾಪಟಿಪದಾ ಅನಪರಾಧಕತಾಯ ಏವ ಸಂವತ್ತತಿ. ಜಯಗ್ಗಾಹೋತಿ ಉಭಯಥಾಪಿ ಮಯ್ಹಂ ಕಾಚಿ ಜಾನಿ ನತ್ಥಿ.

ಪಞ್ಚ ಧಮ್ಮಾ ಧಮ್ಮಸಮಾಧಿ ನಾಮ, ವಿಪಸ್ಸನಾಮಗ್ಗಫಲಧಮ್ಮಮತ್ತಂ ವಾ. ತತಿಯವಿಕಪ್ಪೇ ಸೀಲಾದಿವಿಸುದ್ಧಿಯಾ ಸದ್ಧಿಂ ಬ್ರಹ್ಮವಿಹಾರಾ ಯಥಾವುತ್ತತಿವಿಧಧಮ್ಮಾವಹತ್ತಾ ಏವ ಧಮ್ಮಸಮಾಧಿ ನಾಮ. ಪೂರೇನ್ತಸ್ಸ ಉಪ್ಪನ್ನಾ ಚಿತ್ತೇಕಗ್ಗತಾತಿ ವುತ್ತಖಣಿಕಚಿತ್ತೇಕಗ್ಗತಾ. ಸಾಪಿ ಚಿತ್ತಸ್ಸ ಸಮಾಧಾನತೋ ‘‘ಚಿತ್ತಸಮಾಧೀ’’ತಿ ವುತ್ತಾ, ತಸ್ಸ ಪಟಿಪಕ್ಖಂ ವಿಕ್ಖಮ್ಭನ್ತೀ ಸಮುಚ್ಛಿನ್ದನ್ತೀ ಚ ಹುತ್ವಾ ಪವತ್ತಾ ಯಥಾವುತ್ತಸಮಾಧಿ ಏವ ವಿಸೇಸೇನ ಚಿತ್ತಸಮಾಧಿ ನಾಮ.

ಪಾಟಲಿಯಸುತ್ತವಣ್ಣನಾ ನಿಟ್ಠಿತಾ.

ಗಾಮಣಿಸಂಯುತ್ತವಣ್ಣನಾ ನಿಟ್ಠಿತಾ.