೭. ಗೋದತ್ತಸುತ್ತವಣ್ಣನಾ

೩೪೯. ನೇಸನ್ತಿ ಅಪ್ಪಮಾಣಚೇತೋವಿಮುತ್ತಿ-ಆಕಿಞ್ಚಞ್ಞಚೇತೋವಿಮುತ್ತಿಸಞ್ಞಿತಾನಂ ಝಾನಾನಂ. ಅತ್ಥೋಪಿ ನಾನಾತಿ ಆನೇತ್ವಾ ಯೋಜನಾ. ಫರಣಅಪ್ಪಮಾಣತಾಯ ‘‘ಅಪ್ಪಮಾಣಾ ಚೇತೋವಿಮುತ್ತೀ’’ತಿ ಲದ್ಧನಾಮಂ ಬ್ರಹ್ಮವಿಹಾರಜ್ಝಾನನ್ತಿ ಆಹ ‘‘ಭೂಮನ್ತರತೋ’’ತಿಆದಿ. ಆಕಿಞ್ಚಞ್ಞಾ ಚೇತೋವಿಮುತ್ತೀತಿ ಆಕಿಞ್ಚಞ್ಞಾಯತನಜ್ಝಾನನ್ತಿ ಆಹ ‘‘ಭೂಮನ್ತರತೋ’’ತಿಆದಿ. ವಿಪಸ್ಸನಾತಿ ಅನಿಚ್ಚಾನುಪಸ್ಸನಾ, ಸಬ್ಬಾಪಿ ವಾ. ಪಮಾಣಕರಣೋ ನಾಮ ಯಸ್ಸ ಸಯಂ ಉಪ್ಪಜ್ಜತಿ, ತಸ್ಸ ಗುಣಾಭಾವದಸ್ಸನವಸೇನ ಪಮಾಣಕರಣತೋ.

ಫರಣಅಪ್ಪಮಾಣತಾಯಾತಿ ಫರಣವಸೇನ ಅಪ್ಪಮಾಣಗೋಚರತಾಯ. ನಿಬ್ಬಾನಮ್ಪಿ ಅಪ್ಪಮಾಣಮೇವ ಪಮಾಣಗೋಚರಾನಂ ಕಿಲೇಸಾನಂ ಆರಮ್ಮಣಭಾವಸ್ಸಪಿ ಅನಾಗಮನತೋ. ಖಲನ್ತಿ ಖಲೇ ಪಸಾರಿತಸಾಲಿಸೀಸಾದಿಭಣ್ಡಂ. ಕಿಞ್ಚೇಹೀತಿ ಮದ್ದಸ್ಸು. ತೇನಾಹ ‘‘ಮದ್ದನಟ್ಠೋ’’ತಿ. ಆರಮ್ಮಣಭೂತಂ, ಪಲಿಬುದ್ಧಕಂ ವಾ ನತ್ಥಿ ಏತಸ್ಸ ಕಿಞ್ಚನನ್ತಿ ಅಕಿಞ್ಚನಂ, ಅಕಿಞ್ಚನಮೇವ ಆಕಿಞ್ಚಞ್ಞಂ.

ರೂಪನಿಮಿತ್ತಸ್ಸಾತಿ ಕಸಿಣರೂಪನಿಮಿತ್ತಸ್ಸ. ನ ಗಹಿತಾತಿ ಸರೂಪತೋ ನ ಗಹಿತಾ, ಅತ್ಥತೋ ಪನ ಗಹಿತಾ ಏವ. ತೇನಾಹ – ‘‘ಸಾ ಸುಞ್ಞಾ ರಾಗೇನಾತಿಆದಿವಚನತೋ ಸಬ್ಬತ್ಥ ಅನುಪವಿತ್ಥಾವಾ’’ತಿ.

ನಾನಾತಿ ಸದ್ದವಸೇನ. ಏಕತ್ಥಾತಿ ಆರಮ್ಮಣವಸೇನ ಆರಮ್ಮಣಭಾವೇನ ಏಕಸಭಾವಾ. ತೇನಾಹ ‘‘ಅಪ್ಪಮಾಣಂ…ಪೇ… ಏಕತ್ಥಾ’’ತಿ. ಆರಮ್ಮಣವಸೇನಾತಿ ಆರಮ್ಮಣಸ್ಸ ವಸೇನ. ಚತ್ತಾರೋ ಹಿ ಮಗ್ಗಾ, ಚತ್ತಾರಿ ಫಲಾನಿ ಆರಮ್ಮಣವಸೇನ ನಿಬ್ಬಾನಪವಿಟ್ಠತಾಯ ಏಕತ್ಥಾ ಏಕಾರಮ್ಮಣಾ. ಅಞ್ಞಸ್ಮಿಂ ಪನ ಠಾನೇತಿ ಇದಂ ವಿಸುಂ ವಿಸುಂ ಗಹೇತ್ವಾ ವುತ್ತಂ ಅಪ್ಪಮಾಣಾದಿ ಪರಿಯಾಯವುತ್ತಂ, ನಿಬ್ಬಾನಂ ಆರಬ್ಭ ಪವತ್ತನತೋ. ತಸ್ಮಾ ‘‘ಅಞ್ಞಸ್ಮಿ’’ನ್ತಿ ಇದಂ ತೇನ ತೇನ ಪರಿಯಾಯೇನ ತತ್ಥ ತತ್ಥ ಆಗತಭಾವಂ ಸನ್ಧಾಯ ವುತ್ತಂ.

ಗೋದತ್ತಸುತ್ತವಣ್ಣನಾ ನಿಟ್ಠಿತಾ.