೬. ಮೋಗ್ಗಲ್ಲಾನಸಂಯುತ್ತಂ

೧-೮. ಪಠಮಜ್ಝಾನಪಞ್ಹಸುತ್ತಾದಿವಣ್ಣನಾ

೩೩೨-೩೩೯. ಕಾಮಸಹಗತೇಸು ಸಞ್ಞಾಮನಸಿಕಾರೇಸು ಉಪಟ್ಠಹನ್ತೇಸು ಬ್ಯಾಪಾದಾದಿಸಹಗತಾಪಿ ಸಞ್ಞಾಮನಸಿಕಾರಾ ಯಥಾಪಚ್ಚಯಂ ಉಪಟ್ಠಹನ್ತಿಯೇವಾತಿ ವುತ್ತಂ ‘‘ಕಾಮಸಹಗತಾತಿ ಪಞ್ಚನೀವರಣಸಹಗತಾ’’ತಿ. ನೀವರಣಾನಞ್ಹೇತ್ಥ ನಿದಸ್ಸನಮತ್ತಮೇತಂ, ಯದಿದಂ ಕಾಮಗ್ಗಹಣಂ. ಪಹೀನಾವಸೇಸಾ ಚೇತ್ಥ ನೀವರಣಾ ವೇದಿತಬ್ಬಾ, ತಸ್ಮಾ ಪಞ್ಚಗ್ಗಹಣಂ ನ ಕತ್ತಬ್ಬಂ. ತಸ್ಸಾತಿ ಮಹಾಮೋಗ್ಗಲ್ಲಾನತ್ಥೇರಸ್ಸ ಸನ್ತತೋ ಉಪಟ್ಠಹಿಂಸು ಅಚಿಣ್ಣವಸಿತಾಯ. ತೇನಾಹ ‘‘ಹಾನಭಾಗಿಯಂ ನಾಮ ಅಹೋಸೀ’’ತಿ. ಆರಮ್ಮಣ…ಪೇ… ಸಹಗತನ್ತಿ ವುತ್ತಂ ಇತರೇಸಂ ಅಭಾವತೋ.

ಪಠಮಜ್ಝಾನಪಞ್ಹಸುತ್ತಾದಿವಣ್ಣನಾ ನಿಟ್ಠಿತಾ.

೯. ಅನಿಮಿತ್ತಪಞ್ಹಸುತ್ತವಣ್ಣನಾ

೩೪೦. ವಿಪಸ್ಸನಾಸಮಾಧಿಂಯೇವ, ನ ಫಲಸಮಾಧಿಂ. ಛೇಜ್ಜಕಿಚ್ಚಂ ನ ನಿಪ್ಫಜ್ಜತಿ ಅವಿಚ್ಛೇದವಸೇನ ಅಪ್ಪವತ್ತನತೋ. ನಿಕನ್ತೀತಿ ವಿಪಸ್ಸನಂ ಅಸ್ಸಾದೇನ್ತೀ ಪವತ್ತತಣ್ಹಾ. ಸಾಧೇತುಂ ನಾಸಕ್ಖಿ ಉಪಕ್ಕಿಲಿಟ್ಠತ್ತಾ. ನಿಮಿತ್ತಾನುಸಾರೀತಿ ನಿಚ್ಚಸುಖಅತ್ತನಿಮಿತ್ತಾನಂ ಅಪೂರಣತೋ ರಾಗದೋಸಮೋಹನಿಮಿತ್ತಾನಿಪೇತ್ಥ ನಿಮಿತ್ತಾನೇವ. ವುಟ್ಠಾನ…ಪೇ… ಸಮಾಧಿನ್ತಿ ಏತೇನ ಯಾವ ಮಗ್ಗೋ ನಾಧಿಗತೋ, ತಾವ ವುಟ್ಠಾನಗಾಮಿನಿವಿಪಸ್ಸನಮನುಯುಞ್ಜನ್ತೋಪಿ ಯಥಾರಹಂ ಅನಿಮಿತ್ತಂ ಅಪ್ಪಣಿಹಿತಂ ಸುಞ್ಞತಂ ಚೇತೋಸಮಾಧಿಂ ಅನುಯುತ್ತೋ ವಿಹರತೀತಿ ವತ್ತಬ್ಬತಂ ಅರಹತೀತಿ ದಸ್ಸೇತಿ. ವಿಪಸ್ಸನಾಸಮ್ಪಯುತ್ತನ್ತಿ ವಿಪಸ್ಸನಾಸಙ್ಖಾತಞಾಣಸಮ್ಪಯುತ್ತಂ. ಚೇತೋಸಮಾಧಿನ್ತಿ ಚಿತ್ತಸೀಸೇನ ವಿಪಸ್ಸನಾಸಮಾಧಿಮಾಹ. ಉಪರಿಮಗ್ಗಫಲಸಮಾಧಿನ್ತಿ ಪಠಮಮಗ್ಗಸಮಾಧಿಸ್ಸ ಪಗೇವ ಅಧಿಗತತ್ತಾ.

ಅನಿಮಿತ್ತಪಞ್ಹಸುತ್ತವಣ್ಣನಾ ನಿಟ್ಠಿತಾ.

೧೦-೧೧. ಸಕ್ಕಸುತ್ತಾದಿವಣ್ಣನಾ

೩೪೧-೩೪೨. ಅವೇಚ್ಚಪ್ಪಸಾದೇನಾತಿ ವತ್ಥುತ್ತಯಂ ಯಾಥಾವತೋ ಞತ್ವಾ ಉಪ್ಪನ್ನಪಸಾದೇನ, ಮಗ್ಗೇನಾಗತಪಸಾದೇನಾತಿ ಅತ್ಥೋ. ಸೋ ಪನ ಕೇನಚಿ ಅಸಂಹಾರಿಯೋ ಅಸಮ್ಪವೇಧೀತಿ ಆಹ ‘‘ಅಚಲಪ್ಪಸಾದೇನಾ’’ತಿ. ಅಭಿಭವನ್ತಿ ಅತ್ತನೋ ಪುಞ್ಞಾನುಭಾವೇನ.

ಸಕ್ಕಸುತ್ತಾದಿವಣ್ಣನಾ ನಿಟ್ಠಿತಾ.

ಮೋಗ್ಗಲ್ಲಾನಸಂಯುತ್ತವಣ್ಣನಾ ನಿಟ್ಠಿತಾ.