೯. ಕುತೂಹಲಸಾಲಾಸುತ್ತವಣ್ಣನಾ

೪೧೮. ನಾನಾವಿಧನ್ತಿ ತಂತಂದಿಟ್ಠಿವಾದಪಟಿಸಂಯುತ್ತಂ ಅಞ್ಞಮ್ಪಿ ವಾ ನಾನಾವಿಧಂ ತಿರಚ್ಛಾನಕಥಂ. ಬಹೂನಂ ಕುತೂಹಲುಪ್ಪತ್ತಿಟ್ಠಾನತೋತಿ ಯೋಜನಾ. ಯಾವ ಆಭಸ್ಸರಬ್ರಹ್ಮಲೋಕಾ ಗಚ್ಛತೀತಿ ಅಗ್ಗಿನಾ ಕಪ್ಪವುಟ್ಠಾನಕಾಲೇ ಗಚ್ಛತಿ, ತಂ ಸನ್ಧಾಯ ವುತ್ತಂ. ಇಮಞ್ಚ ಕಾಯನ್ತಿ ಇಮಂ ರೂಪಕಾಯಂ. ಚುತಿಚಿತ್ತೇನ ನಿಕ್ಖಿಪತೀತಿ ಚುತಿಚಿತ್ತೇನ ಭಿಜ್ಜಮಾನೇನ ನಿಕ್ಖಿಪತಿ. ಚುತಿಚಿತ್ತಸ್ಸ ಹಿ ಓರಂ ಸತ್ತರಸಮಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಉಪ್ಪನ್ನಂ ಕಮ್ಮಜರೂಪಂ ಚುತಿಚಿತ್ತೇನ ಸದ್ಧಿಂ ನಿರುಜ್ಝತಿ, ತತೋ ಪರಂ ಕಮ್ಮಜರೂಪಂ ನ ಉಪ್ಪಜ್ಜತಿ. ಯದಿ ಉಪ್ಪಜ್ಜೇಯ್ಯ, ಮರಣಂ ನ ಸಿಯಾ, ಚುತಿಚಿತ್ತಂ ರೂಪಂ ನ ಸಮುಟ್ಠಾಪೇತಿ, ಆಹಾರಜಸ್ಸ ಚ ಅಸಮ್ಭವೋ ಏವ, ಉತುಜಂ ಪನ ವತ್ತತೇವ. ಯಸ್ಮಾ ಪಟಿಸನ್ಧಿಕ್ಖಣೇ ಸತ್ತೋ ಅಞ್ಞತರಣಾಯ ಉಪಪಜ್ಜತಿ ನಾಮ, ಚುತಿಕ್ಖಣೇ ಪಟಿಸನ್ಧಿಚಿತ್ತಂ ಅಲದ್ಧಂ ಅಞ್ಞತರಣಾಯ, ತಸ್ಮಾ ವುತ್ತಂ ‘‘ಚುತಿಕ್ಖಣೇ…ಪೇ… ಹೋತೀ’’ತಿ.

ಕುತೂಹಲಸಾಲಾಸುತ್ತವಣ್ಣನಾ ನಿಟ್ಠಿತಾ.