೧. ಪಠಮಮಿಗಜಾಲಸುತ್ತವಣ್ಣನಾ

೬೩. ಚಕ್ಖುವಿಞ್ಞಾಣಂ ದಸ್ಸನಕಿಚ್ಚನ್ತಿ ವುತ್ತಚಕ್ಖುವಿಞ್ಞಾಣೇನ ಪಸ್ಸಿತಬ್ಬನ್ತಿ ಆಹ ‘‘ಇಟ್ಠಾರಮ್ಮಣಭೂತಾ’’ತಿ. ಕಮನೀಯಾತಿ ಕಾಮೇತಬ್ಬಾ. ಮನಂ ಅಪ್ಪಾಯನ್ತೀತಿ ಮನಾಪಾತಿ ಆಹ ‘‘ಮನವಡ್ಢನಕಾ’’ತಿ. ಪಿಯಾಯಿತಬ್ಬಸಭಾವಾ ಪಿಯರೂಪಾ. ಕಾಮೂಪಸಂಹಿತಾತಿ ಕಾಮಪಟಿಸಂಯುತ್ತಾ. ಆಲಮ್ಬಿತಬ್ಬತಾ ಏವ ಚೇತ್ಥ ಉಪಸಂಹಿತತಾತಿ ‘‘ಆರಮ್ಮಣಂ ಕತ್ವಾ’’ತಿಆದಿಮಾಹ. ತಣ್ಹಾಸಙ್ಖಾತಾ ನನ್ದೀ ತಣ್ಹಾನನ್ದೀ, ನ ತುಟ್ಠಿನನ್ದೀಯೇವ ‘‘ನನ್ದಿಂ ಚರತೀ’’ತಿಆದೀಸು ವಿಯ. ಗಾಮನ್ತನ್ತಿ ಗಾಮಸಮೀಪಂ. ‘‘ಅನುಪಚಾರಟ್ಠಾನ’’ನ್ತಿ ವತ್ವಾ ತಂ ದಸ್ಸೇತಿ ‘‘ಯತ್ಥಾ’’ತಿಆದಿನಾ.

ಏತ್ಥಾತಿ ಯಥಾನೀಹತೇ ಪಾಠೇ. ‘‘ಇಮಂ ಏಕಂ ಪರಿಯಾಯಂ ಠಪೇತ್ವಾ’’ತಿ ವುತ್ತಂ ತಸ್ಸ ‘‘ಪನ್ತಾನೀ’’ತಿಪದೇನ ಸಙ್ಗಹಿತತ್ತಾ. ಅಪ್ಪಸದ್ದಾನಿ ಅಪ್ಪನಿಗ್ಘೋಸಾನೀತಿ ಏತ್ಥ ಅಪ್ಪ-ಸದ್ದೋ ಅಭಾವತ್ಥೋ.

ಪಠಮಮಿಗಜಾಲಸುತ್ತವಣ್ಣನಾ ನಿಟ್ಠಿತಾ.