೧೬. ನನ್ದಿಕ್ಖಯವಗ್ಗೋ

೧-೪. ಅಜ್ಝತ್ತನನ್ದಿಕ್ಖಯಸುತ್ತಾದಿವಣ್ಣನಾ

೧೫೬-೧೫೯. ಅತ್ಥತೋತಿ ಸಭಾವತೋ. ಞಾಣೇನ ಅರಿಯತೋ ಞಾತಬ್ಬತೋ ಅತ್ಥೋ, ಸಭಾವೋತಿ. ಏವಞ್ಹಿ ಅಭಿಜ್ಜನಸಭಾವೋ ನನ್ದನಟ್ಠೇನ ನನ್ದೀ, ರಞ್ಜನಟ್ಠೇನ ರಾಗೋ. ವಿಮುತ್ತಿವಸೇನಾತಿ ವಿಮುತ್ತಿಯಾ ಅಧಿಗಮವಸೇನ. ಏತ್ಥಾತಿ ಇಮಸ್ಮಿಂ ಪಠಮಸುತ್ತೇ. ದುತಿಯಾದೀಸೂತಿ ದುತಿಯತತಿಯಚತುತ್ಥೇಸು. ಉತ್ತಾನಮೇವ ಹೇಟ್ಠಾ ವುತ್ತನಯತ್ತಾ.

ಅಜ್ಝತ್ತನನ್ದಿಕ್ಖಯಸುತ್ತಾದಿವಣ್ಣನಾ ನಿಟ್ಠಿತಾ.

೫-೬. ಜೀವಕಮ್ಬವನಸಮಾಧಿಸುತ್ತಾದಿವಣ್ಣನಾ

೧೬೦-೧೬೧. ಸಮಾಧಿವಿಕಲಾನಂ ಚಿತ್ತೇಕಗ್ಗತಂ ಲಭನ್ತಾನಂ, ಪಟಿಸಲ್ಲಾನವಿಕಲಾನಂ ಕಾಯವಿವೇಕಞ್ಚ ಚಿತ್ತೇಕಗ್ಗತಞ್ಚ ಲಭನ್ತಾನನ್ತಿ ಯೋಜನಾ. ಪಾಕಟಂ ಹೋತೀತಿ ವಿಭೂತಂ ಹುತ್ವಾ ಉಪಟ್ಠಾತಿ. ಓಕ್ಖಾಯತಿ ಪಚ್ಚಕ್ಖಾಯತೀತಿ ಚತುಸಚ್ಚಧಮ್ಮಾನಂ ವಿಭೂತಭಾವೇನ ಉಪಟ್ಠಾನಸ್ಸ ಕಥಿತತ್ತಾ ವುತ್ತಂ – ‘‘ದ್ವೀಸುಪಿ…ಪೇ… ಕಥಿತಾ’’ತಿ.

ಜೀವಕಮ್ಬವನಸಮಾಧಿಸುತ್ತಾದಿವಣ್ಣನಾ ನಿಟ್ಠಿತಾ.

೭-೯. ಕೋಟ್ಠಿಕಅನಿಚ್ಚಸುತ್ತಾದಿವಣ್ಣನಾ

೧೬೨-೧೬೪. ಅನಿಚ್ಚಾನುಪಸ್ಸನಾದಯೋ ಏವ ವಿಮುತ್ತಿಪರಿಪಾಚನಿಯಾ ಧಮ್ಮಾ ನಾಮ. ಥೇರಸ್ಸ ತದಾ ಸದ್ಧಾದೀನಿ ಇನ್ದ್ರಿಯಾನಿ ನ ಪರಿಪಾಕಂ ಉಪಗತಾನಿ, ಥೇರೋ ಇಮಾಹಿ ದೇಸನಾಹಿ ಇನ್ದ್ರಿಯಪರಿಪಾಕಮಗಮಾಸಿ.

ಕೋಟ್ಠಿಕಅನಿಚ್ಚಸುತ್ತಾದಿವಣ್ಣನಾ ನಿಟ್ಠಿತಾ.

೧೦-೧೨. ಮಿಚ್ಛಾದಿಟ್ಠಿಪಹಾನಸುತ್ತಾದಿವಣ್ಣನಾ

೧೬೫-೧೬೭. ಪಾಟಿಯೇಕ್ಕನ್ತಿ ವಿಸುಂ ವಿಸುಂ. ವುತ್ತನಯೇನೇವಾತಿ ಹೇಟ್ಠಾ ವುತ್ತನಯೇನೇವ ಅಪುಬ್ಬಸ್ಸ ವತ್ತಬ್ಬಸ್ಸ ಅಭಾವಾ.

ಮಿಚ್ಛಾದಿಟ್ಠಿಪಹಾನಸುತ್ತಾದಿವಣ್ಣನಾ ನಿಟ್ಠಿತಾ.

ನನ್ದಿಕ್ಖಯವಗ್ಗವಣ್ಣನಾ ನಿಟ್ಠಿತಾ.