೧. ಯೋಗಕ್ಖೇಮಿಸುತ್ತವಣ್ಣನಾ

೧೦೪. ಚತೂಹಿ ಯೋಗೇಹೀತಿ ಕಾಮಯೋಗಾದೀಹಿ ಚತೂಹಿ ಯೋಗೇಹಿ. ಖೇಮಿನೋತಿ ಖೇಮವತೋ ಕುಸಲಿನೋ. ಕಾರಣಭೂತನ್ತಿ ಕತ್ತಬ್ಬಉಪಾಯಸ್ಸ ಕಾರಣಭೂತಂ. ಪರಿಯಾಯತಿ ಪವತ್ತಿಂ ನಿವತ್ತಿಞ್ಚ ಞಾಪೇತೀತಿ ಪರಿಯಾಯೋ, ಧಮ್ಮೋ ಚ ಸೋ ಪರಿಯತ್ತಿಧಮ್ಮತ್ತಾ ಪರಿಯಾಯೋ ಚಾತಿ ಧಮ್ಮಪರಿಯಾಯೋ, ತಂ ಧಮ್ಮಪರಿಯಾಯಂ. ಯಸ್ಮಾ ಪನ ಸೋ ತಸ್ಸಾಧಿಗಮಸ್ಸ ಕಾರಣಂ ಹೋತಿ, ತಸ್ಮಾ ವುತ್ತಂ ‘‘ಧಮ್ಮಕಾರಣ’’ನ್ತಿ. ಯುತ್ತಿನ್ತಿ ಸಮಥವಿಪಸ್ಸನಾಧಮ್ಮಾನೀತಿ ವಾ ಚತುಸಚ್ಚಧಮ್ಮಾನೀತಿ ವಾ. ‘‘ತಸ್ಮಾ’’ತಿ ಪದಂ ಉದ್ಧರಿತ್ವಾ – ‘‘ಕಸ್ಮಾ’’ತಿ ಕಾರಣಂ ಪುಚ್ಛನ್ತೋ ‘‘ಕಿಂ ಅಕ್ಖಾತತ್ತಾ, ಉದಾಹು ಪಹೀನತ್ತಾ’’ತಿ ವಿಭಜಿತ್ವಾ ಪುಚ್ಛಿ. ಯಸ್ಮಾ ಪನ ಛನ್ದರಾಗಪ್ಪಹಾನಂ ಯೋಗಕ್ಖೇಮಿಭಾವಸ್ಸ ಕಾರಣಂ, ನ ಕಥನಂ, ತಸ್ಮಾ ‘‘ಪಹೀನತ್ತಾ’’ತಿಆದಿ ವುತ್ತಂ.

ಯೋಗಕ್ಖೇಮಿಸುತ್ತವಣ್ಣನಾ ನಿಟ್ಠಿತಾ.