೧೦. ಸಳವಗ್ಗೋ

೧. ಅದನ್ತಅಗುತ್ತಸುತ್ತವಣ್ಣನಾ

೯೪. ಅದಮಿತಾತಿ ದಮಂ ನಿಬ್ಬಿಸೇವನಭಾವಂ ಅನೀತಾ. ಅಗೋಪಿತಾತಿ ಸತಿಸಙ್ಖಾತಾಯ ವತಿಯಾ ನ ರಕ್ಖಿತಾ. ಅಪಿಹಿತಾತಿ ಸತಿಕವಾಟೇನ ನ ಪಿಹಿತಾ. ಚತೂಹಿಪಿ ಪದೇಹಿ ಇನ್ದ್ರಿಯಾನಂ ಅನಾವರಣಮೇವಾಹ. ಅಧಿಕಂ ವಹನ್ತೀತಿ ಅಧಿವಾಹಾ, ದುಕ್ಖಸ್ಸ ಅಧಿವಾಹಾ ದುಕ್ಖಾಧಿವಾಹಾ. ನಿರಯೇಸು ಉಪ್ಪಜ್ಜನಕಂ ನೇರಯಿಕಂ. ಆದಿ-ಸದ್ದೇನ ಸೇಸಪಾಳಿಂ ಸಙ್ಗಣ್ಹಾತಿ.

ಸಳೇವಾತಿ ಛ-ಕಾರಸ್ಸ ಸ-ಕಾರೋ, ಳ-ಕಾರೋ ಪದಸನ್ಧಿಕರೋ. ಯತ್ಥಾತಿ ನಿಮಿತ್ತತ್ಥೇ ಭುಮ್ಮಂ. ಅನವಸ್ಸುತಾ ಅತಿನ್ತಾತಿ ರಾಗೇನ ಅತೇಮಿತಾ.

ಅಸ್ಸಾದಿತನ್ತಿ ಅಸ್ಸಾದಂ ಇತಂ ಉಪಗತಂ. ತೇನಾಹ ‘‘ಅಸ್ಸಾದವನ್ತ’’ನ್ತಿ. ಸುಖದುಕ್ಖನ್ತಿ ಇಟ್ಠಾನಿಟ್ಠಂ. ಅನ್ವಯತೀತಿ ಅನ್ವಯೋ, ಹೇತು. ಫಸ್ಸೋತಿ ಅನ್ವಯೋ ಏತಸ್ಸಾತಿ ಫಸ್ಸನ್ವಯನ್ತಿ ಆಹ – ‘‘ಫಸ್ಸಹೇತುಕ’’ನ್ತಿ. ‘‘ಅವಿರುದ್ಧ’’ಇತಿ ವಿಭತ್ತಿಲೋಪೇನ ನಿದ್ದೇಸೋ.

ಪಪಞ್ಚಸಞ್ಞಾತಿ ತಣ್ಹಾದಿಸಮಧೂಪಸಂಹತಸಞ್ಞಾ. ತೇನಾಹ ‘‘ಕಿಲೇಸಸಞ್ಞಾಯ ಪಪಞ್ಚಸಞ್ಞಾ ನಾಮ ಹುತ್ವಾ’’ತಿ. ಪಪಞ್ಚಸಞ್ಞಾ ಏತೇಸಂ ಅತ್ಥೀತಿ ಪಪಞ್ಚಸಞ್ಞಾ, ಇತರೀತರಾ ನರಾ. ಪಪಞ್ಚಯನ್ತಾತಿ ಸಂಸಾರೇ ಪಪಞ್ಚಂ ಚಿರಾಯನಂ ಕರೋನ್ತಾ. ಸಞ್ಞಿನೋತಿ ಗೇಹಸ್ಸಿತಸಞ್ಞಾಯ ಸಞ್ಞಾವನ್ತೋ. ಮನೋಮಯಂ ವಿತಕ್ಕನ್ತಿ ಕೇವಲಂ ಮನಸಾ ಸಮ್ಭಾವಿತಂ ಮಿಚ್ಛಾವಿತಕ್ಕಂ. ಇರೀಯತೀತಿ ಇರಿಯಂ ಪಟಿಪತ್ತಿಂ ಇರೀಯತಿ ಪಟಿಪಜ್ಜತಿ.

ಸುಟ್ಠು ಭಾವಿತೋತಿ ಸುಟ್ಠುಭಾವಂ ಸುಭಾವನಂ ಇತೋ ಭಾವಿತಭಾವಿತೋ. ಫುಟ್ಠಸ್ಸ ಚಿತ್ತನ್ತಿ ತೇನ ಯಥಾವುತ್ತಫಸ್ಸೇನ ಫುಟ್ಠಂ ಅಸ್ಸ ಚಿತ್ತಂ. ನ ವಿಕಮ್ಪತೇ ಕ್ವಚೀತಿ ಕಿಸ್ಮಿಞ್ಚಿ ಇಟ್ಠಾನಿಟ್ಠಾರಮ್ಮಣೇ ನ ಕಮ್ಪತಿ. ಪಾರಗಾತಿ ಪಾರಗಾಮಿನೋ ಭವಥ.

ಅದನ್ತಅಗುತ್ತಸುತ್ತವಣ್ಣನಾ ನಿಟ್ಠಿತಾ.

೨. ಮಾಲುಕ್ಯಪುತ್ತಸುತ್ತವಣ್ಣನಾ

೯೫. ಅಪಸಾದೇತೀತಿ ತಜ್ಜೇತಿ. ಉಸ್ಸಾದೇತೀತಿ ಉಕ್ಕಂಸೇತಿ. ಅಯಂ ಕಿರ ಥೇರೋ ಮಾಲುಕ್ಯಪುತ್ತೋ. ಪಮಜ್ಜಿತ್ವಾತಿ ಯೋನಿಸೋಮನಸಿಕಾರಸ್ಸ ಅನನುಯುಜ್ಜನೇನ ಪಮಜ್ಜಿತ್ವಾ.

ಯತ್ರಾತಿ ಪಚ್ಚತ್ತಂ ವಚನಾಲಙ್ಕಾರೇ. ನಾಮಾತಿ ಅಸಮ್ಭಾವನೇ ಅಪಸಾದನಪಕ್ಖೇ, ಉಸ್ಸಾದನಪಕ್ಖೇ ಪನ ಸಮ್ಭಾವನೇ. ಕಿಂ ಜಾತನ್ತಿ ಕಿಂ ತೇನ ಮಹಲ್ಲಕಭಾವೇನ ಜಾತನ್ತಿ ಮಹಲ್ಲಕಭಾವಂ ತಿಣಾಯಪಿ ಅಮಞ್ಞಮಾನೋ ವದತಿ. ತೇನಾಹ ‘‘ಯದಿ…ಪೇ… ಅನುಗ್ಗಣ್ಹನ್ತೋ’’ತಿ. ಅನುಗ್ಗಣ್ಹನ್ತೋತಿ ಅಚಿನ್ತೇನ್ತೋ. ಮಾದಿಸಾನಂ ಭಗವತೋ ಓವಾದೋ ಉಪಕಾರಾವಹೋತಿ ಏತರಹಿ ಓವಾದಞ್ಚ ಪಸಂಸನ್ತೋ.

‘‘ಅದಿಟ್ಠಾ ಅದಿಟ್ಠಪುಬ್ಬಾ’’ತಿಆದಿನಾ ಪರಿಕಪ್ಪವಸೇನ ವುತ್ತನಿದಸ್ಸನಂ ‘‘ಯಥಾ ಏತೇಸು ಛನ್ದಾದಯೋ ನ ಹೋನ್ತಿ, ಏವಮಿತರೇಸುಪಿ ಪರಿಞ್ಞಾತೇಸೂ’’ತಿ ನಯಪಟಿಪಜ್ಜನತ್ಥಂ, ತೇಸಮ್ಪಿ ಇಮೇಹಿ ಸಮಾನೇತಬ್ಬತ್ತಾ. ತೇನ ವುತ್ತಂ ‘‘ಸುಪಿನಕೂಪಮಾ ಕಾಮಾ’’ತಿ (ಮ. ನಿ. ೧.೨೩೪; ೨.೪೬; ಪಾಚಿ. ೪೧೭; ಚೂಳವ. ೬೫).

ಚಕ್ಖುವಿಞ್ಞಾಣೇನ ದಿಟ್ಠೇ ದಿಟ್ಠಮತ್ತನ್ತಿ ಚಕ್ಖುವಿಞ್ಞಾಣಸ್ಸ ರೂಪಾಯತನಂ ಯತ್ತಕೋ ಗಹಣಾಕಾರೋ, ತತ್ತಕಂ. ಕಿತ್ತಕಂ ಪಮಾಣನ್ತಿ ಅತ್ತಸಂವೇದಿಯಂ ಪರಸ್ಸ ನ ದಿಸಿತಬ್ಬಂ, ಕಪ್ಪನಾಮತ್ತಂ ರೂಪಂ. ತೇನಾಹ ‘‘ಚಕ್ಖುವಿಞ್ಞಾಣಂ ಹೀ’’ತಿಆದಿ. ರೂಪೇತಿ ರೂಪಾಯತನೇ. ರೂಪಮತ್ತಮೇವಾತಿ ನೀಲಾದಿಭೇದಂ ರೂಪಾಯತನಮತ್ತಂ, ನ ನೀಲಾದಿ. ವಿಸೇಸನಿವತ್ತನತ್ಥೋ ಹಿ ಅಯಂ ಮತ್ತ-ಸದ್ದೋ. ಯದಿ ಏವಂ, ಏವ-ಕಾರೋ ಕಿಮತ್ಥಿಯೋ? ಚಕ್ಖುವಿಞ್ಞಾಣಞ್ಹಿ ರೂಪಾಯತನೇ ಲಬ್ಭಮಾನಮ್ಪಿ ನೀಲಾದಿವಿಸೇಸಂ ‘‘ಇದಂ ನೀಲಂ ನಾಮ, ಇದಂ ಪೀತಂ ನಾಮಾ’’ತಿ ನ ಗಣ್ಹಾತಿ. ಕುತೋ ನಿಚ್ಚಾನಿಚ್ಚಾದಿಸಭಾವತ್ಥನ್ತಿ ಸಂಹಿತಸ್ಸಪಿ ನಿವತ್ತನತ್ಥಂ ಏವಕಾರಗ್ಗಹಣಂ. ತೇನಾಹ ‘‘ನ ನಿಚ್ಚಾದಿಸಭಾವ’’ನ್ತಿ. ಸೇಸವಿಞ್ಞಾಣೇಹಿಪೀತಿ ಜವನವಿಞ್ಞಾಣೇಹಿಪಿ.

ದಿಟ್ಠಂ ನಾಮ ಚಕ್ಖುವಿಞ್ಞಾಣಂ ರೂಪಾಯತನಸ್ಸ ದಸ್ಸನನ್ತಿ ಕತ್ವಾ. ತೇನಾಹ ‘‘ರೂಪೇ ರೂಪವಿಜಾನನ’’ನ್ತಿ. ಚಕ್ಖುವಿಞ್ಞಾಣಮತ್ತಮೇವಾತಿ ಯತ್ತಕಂ ಚಕ್ಖುವಿಞ್ಞಾಣಂ ರೂಪಾಯತನೇ ಗಹಣಮತ್ತಂ, ತಂಮತ್ತಮೇವ ಮೇ ಸಬ್ಬಂ ಚಿತ್ತಂ ಭವಿಸ್ಸತೀತಿ ಅತ್ಥೋ. ‘‘ರಾಗಾದಿರಹೇನಾ’’ತಿ ವಾ ಪಾಠೋ. ದಿಟ್ಠಂ ನಾಮ ಪದತ್ಥತೋ ಚಕ್ಖುವಿಞ್ಞಾಣೇನ ದಿಟ್ಠಂ ರೂಪಂ. ತತ್ಥೇವಾತಿ ಚಕ್ಖುವಿಞ್ಞಾಣೇನ ದಿಟ್ಠಮತ್ತೇ ರೂಪೇ. ಚಿತ್ತತ್ತಯಂ ದಿಟ್ಠಮತ್ತಂ ನಾಮ ಚಕ್ಖುವಿಞ್ಞಾಣಂ ವಿಯ ರಾಗಾದಿವಿರಹೇನ ಪವತ್ತನತೋ. ತೇನಾಹ ‘‘ಯಥಾ ತ’’ನ್ತಿ ಆದಿ.

ಮನೋದ್ವಾರಾವಜ್ಜನೇನ ವಿಞ್ಞಾತಾರಮ್ಮಣಂ ವಿಞ್ಞಾತನ್ತಿ ಅಧಿಪ್ಪೇತಂ ರಾಗಾದಿವಿರಹೇನ ವಿಞ್ಞೇಯ್ಯತೋ. ತೇನಾಹ ‘‘ಯಥಾ ಆವಜ್ಜನೇನಾ’’ತಿಆದಿ.

ತದಾತಿ ತಸ್ಮಿಂ ಕಾಲೇ, ನ ತತೋ ಪಟ್ಠಾಯಾತಿ ಅಯಮೇತ್ಥ ಅತ್ಥೋತಿ ದಸ್ಸೇತಿ. ‘‘ದಿಟ್ಠಮತ್ತ’’ನ್ತಿಆದಿನಾ ಯೇಸಂ ರಾಗಾದೀನಂ ನಿವತ್ತನಂ ಅಧಿಪ್ಪೇತಂ, ತೇ ‘‘ತೇನಾ’’ತಿ ಏತ್ಥ ತ-ಸದ್ದೇನ ಪಚ್ಚಾಮಸೀಯನ್ತೀತಿ ‘‘ತೇನ ರಾಗೇನ ವಾ ರತ್ತೋ’’ತಿಆದಿ ವುತ್ತಂ. ತತ್ಥಾತಿ ವಿಸಯೇ ಭುಮ್ಮಂ, ವಿಸಯಭಾವೋ ಚ ವಿಸಯಿನಾ ಸಮ್ಬನ್ಧವಸೇನ ಇಚ್ಛಿತಬ್ಬೋತಿ ವುತ್ತಂ ‘‘ಪಟಿಬದ್ಧೋ’’ತಿಆದಿ.

ಸತೀತಿ ರೂಪಸ್ಸ ಯಥಾಸಭಾವಸಲ್ಲಕ್ಖಣಾ ಸತಿ ಮುಟ್ಠಾ ಪಿಯನಿಮಿತ್ತಮನಸಿಕಾರೇನ ಅನುಪ್ಪಜ್ಜನತೋ ನ ದಿಸ್ಸತಿ ನಪ್ಪವತ್ತತಿ. ಅಜ್ಝೋಸಾತಿ ಅಜ್ಝೋಸಾಯ. ಗಿಲಿತ್ವಾ ಪರಿನಿಟ್ಠಪೇತ್ವಾ ಅತ್ತನಿಯಕರಣೇನ.

ಅಭಿಜ್ಝಾ ಚ ವಿಹೇಸಾ ಚಾತಿ ಕರಣತ್ಥೇ ಪಚ್ಚತ್ತವಚನನ್ತಿ ಆಹ – ‘‘ಅಭಿಜ್ಝಾಯ ಚ ವಿಹೇಸಾಯ ಚಾ’’ತಿ. ಅತ್ಥವಸೇನ ವಿಭತ್ತಿಪರಿಣಾಮೋತಿ ಆಹ – ‘‘ಅಭಿಜ್ಝಾವಿಹೇಸಾಹೀ’’ತಿ. ಆಚಿನನ್ತಸ್ಸಾತಿ ವಡ್ಢೇನ್ತಸ್ಸ. ಪಟಿಸ್ಸತೋತಿ ಪತಿಸ್ಸತೋ ಸಬ್ಬತ್ಥ ಸತಿಯಾ ಯುತ್ತೋ. ಸೇವತೋ ಚಾಪೀತಿ ಏತ್ಥ ಚ-ಸದ್ದೋ ಅಪಿ-ಸದ್ದೋ ಚ ನಿಪಾತಮತ್ತನ್ತಿ ‘‘ಸೇವನ್ತಸ್ಸ’’ಇಚ್ಚೇವ ಅತ್ಥೋ ವುತ್ತೋ.

ಮಾಲುಕ್ಯಪುತ್ತಸುತ್ತವಣ್ಣನಾ ನಿಟ್ಠಿತಾ.

೩. ಪರಿಹಾನಸುತ್ತವಣ್ಣನಾ

೯೬. ಪರಿಹಾನಸಭಾವನ್ತಿ ಅನವಜ್ಜಧಮ್ಮೇಹಿ ಪರಿಹಾಯನಸಭಾವಂ. ಅಭಿಭವಿತಾನೀತಿ ಅಭಿಭೂತಾನಿ ನಿಬ್ಬಿಸೇವನಭಾವಾಕಾರೇನ. ಸರಸಙ್ಕಪ್ಪಾತಿ ತಸ್ಮಿಂ ತಸ್ಮಿಂ ವಿಸಯೇ ಅನವಟ್ಠಿತಭಾವೇನ ಸಙ್ಕಪ್ಪಾ. ಸಂಯೋಜನಿಯಾತಿ ಸಂಯೋಜೇತಬ್ಬಾ. ಸಂಯೋಜನಾನಞ್ಹಿ ಪುನಪ್ಪುನಂ ಉಪ್ಪತ್ತಿಯಾ ಓಕಾಸಂ ದೇನ್ತೋ ಕಿಲೇಸಜಾತಂ ಅಧಿವಾಸೇತಿ ನಾಮ. ಕಿಲೇಸೋ ಏವ ಕಿಲೇಸಜಾತಂ. ಆರಮ್ಮಣಂ ಪನ ಚಿತ್ತೇ ಕರೋನ್ತೋ ಅಧಿವಾಸೇತಿ ನಾಮ. ಛನ್ದರಾಗಪ್ಪಹಾನೇನ ನ ಪಜಹತಿ ಆರಮ್ಮಣಂ, ಕಿಲೇಸಂ ಪನ ಅನುಪ್ಪತ್ತಿಧಮ್ಮತಾಪಾದನೇನ ಏವ. ಅಭಿಭವಿತಂ ಆಯತನನ್ತಿ ಕಥಿತಂ ಅಧಿವಾಸನಾದಿನಾ. ‘‘ಕಥಞ್ಚ, ಭಿಕ್ಖವೇ, ಪರಿಹಾನಧಮ್ಮೋ ಹೋತೀ’’ತಿ ಧಮ್ಮಂ ಪುಚ್ಛಿತ್ವಾ ತಂ ವಿಭಜನ್ತೇನ ಭಗವತಾ ‘‘ತಞ್ಚೇ ಭಿಕ್ಖು ಅಧಿವಾಸೇತೀ’’ತಿಆದಿನಾ ಪುಗ್ಗಲೇನ ಪುಗ್ಗಲಾಧಿಟ್ಠಾನೇನ ಧಮ್ಮೋ ದಸ್ಸಿತೋ.

ಪರಿಹಾನಸುತ್ತವಣ್ಣನಾ ನಿಟ್ಠಿತಾ.

೪. ಪಮಾದವಿಹಾರೀಸುತ್ತವಣ್ಣನಾ

೯೭. ನ ಪಿದಹಿತ್ವಾ ಚಕ್ಖುನ್ದ್ರಿಯಂ ನ ಪಿದಹಿತ್ವಾ ಸಞ್ಛಾದಿತ್ವಾ ಠಿತಸ್ಸ. ಬ್ಯಾಸಿಞ್ಚತೀತಿ ಕಿಲೇಸೇಹಿ ವಿಸೇಸೇನ ಆಸಿಞ್ಚತಿ. ಕಿಲೇಸತಿನ್ತನ್ತಿ ಕಿಲೇಸೇಹಿ ಅವಸ್ಸುತಂ. ದುಬ್ಬಲಪೀತಿ ತರುಣಾ ನ ಬಲಪ್ಪತ್ತಾ. ಬಲವಪೀತಿ ಉಬ್ಬೇಗಾ ಫರಣಪ್ಪತ್ತಾ ಚ ಪೀತಿ. ದರಥಪ್ಪಸ್ಸದ್ಧೀತಿ ಕಾಯಚಿತ್ತದರಥವೂಪಸಮಲಕ್ಖಣಾ ಪಸ್ಸದ್ಧಿ. ನ ಉಪ್ಪಜ್ಜನ್ತಿ ಪಚ್ಚಯಪರಮ್ಪರಾಯ ಅಸಿದ್ಧತ್ತಾ. ‘‘ಕಥಞ್ಚ, ಭಿಕ್ಖವೇ, ಪಮಾದವಿಹಾರೀ ಹೋತೀ’’ತಿಆದಿನಾ ಪುಗ್ಗಲಂ ಪುಚ್ಛಿತ್ವಾ ‘‘ಪಾಮೋಜ್ಜಂ ನ ಹೋತಿ, ಪಾಮೋಜ್ಜಂ ಜಾಯತೀ’’ತಿಆದಿನಾ ಚ, ಧಮ್ಮೇನ ‘‘ಪಮಾದವಿಹಾರೀ ಅಪ್ಪಮಾದವಿಹಾರೀ’’ತಿ ಚ ಪುಗ್ಗಲೋ ದಸ್ಸಿತೋ.

ಪಮಾದವಿಹಾರೀಸುತ್ತವಣ್ಣನಾ ನಿಟ್ಠಿತಾ.

೫. ಸಂವರಸುತ್ತವಣ್ಣನಾ

೯೮. ಇದನ್ತಿ ‘‘ಕಥಞ್ಚ, ಭಿಕ್ಖವೇ, ಅಸಂವರೋ’’ತಿ? ಇದಂ ವಚನಂ. ಪಹಾತಬ್ಬಧಮ್ಮಕ್ಖಾನವಸೇನಾತಿ ಪಹಾತಬ್ಬಧಮ್ಮಸ್ಸೇವ ಕಥನಂ ವುತ್ತಂ. ‘‘ಕಥಞ್ಚ, ಭಿಕ್ಖವೇ, ಅಸಂವರೋ ಹೋತೀ’’ತಿ ಧಮ್ಮಂ ಪುಚ್ಛಿತ್ವಾ ‘‘ಸನ್ತಿ, ಭಿಕ್ಖವೇ, ಚಕ್ಖುವಿಞ್ಞೇಯ್ಯಾ ರೂಪಾ’’ತಿಆದಿನಾ ಧಮ್ಮೋವ ವಿಭತ್ತೋ.

ಸಂವರಸುತ್ತವಣ್ಣನಾ ನಿಟ್ಠಿತಾ.

೬. ಸಮಾಧಿಸುತ್ತವಣ್ಣನಾ

೯೯. ಚಿತ್ತೇಕಗ್ಗತಾಯಾತಿ ಸಮಥವಸೇನ ಚಿತ್ತೇಕಗ್ಗತಾಯ. ಪರಿಹಾಯಮಾನೇತಿ ತಸ್ಸ ಅಲಾಭೇನ ಪರಿಹಾಯಮಾನೇ. ಕಮ್ಮಟ್ಠಾನನ್ತಿ ವಿಪಸ್ಸನಾಕಮ್ಮಟ್ಠಾನಂ, ಸಮಥಮೇವ ವಾ.

೭. ಪಟಿಸಲ್ಲಾನಸುತ್ತವಣ್ಣನಾ

೧೦೦. ಕಮ್ಮಟ್ಠಾನನ್ತಿ ಸಮಥವಿಪಸ್ಸನಾಕಮ್ಮಟ್ಠಾನಂ.

೮-೯. ಪಠಮನತುಮ್ಹಾಕಂಸುತ್ತಾದಿವಣ್ಣನಾ

೧೦೧-೧೦೨. ಉಪಮಂ ಪರಿವಾರೇತ್ವಾತಿ ಉಪಮಂ ಪರಿಹರಿತ್ವಾ. ಸುದ್ಧಿಕವಸೇನಾತಿ ಉಪಮಾಯ ವಿನಾ ಕೇವಲಮೇವ.

೧೦. ಉದಕಸುತ್ತವಣ್ಣನಾ

೧೦೩. ಉದಕೋತಿ ತಸ್ಸ ನಾಮಂ. ವೇದಂ ಞಾಣಂ. ಸಬ್ಬಂ ಜಿತವಾತಿ ಸಬ್ಬಜಿ. ಅವಖತನ್ತಿ ನಿಖತಂ. ಉಚ್ಛಾದನಧಮ್ಮೋತಿ ಉಚ್ಛಾದೇತಬ್ಬಸಭಾವೋ. ಪರಿಮದ್ದನಧಮ್ಮೋತಿ ಪರಿಮದ್ದಿತಬ್ಬಸಭಾವೋ. ಪರಿಹತೋತಿ ಪರಿಹರಿತೋ. ಓದನಕುಮ್ಮಾಸೂಪಚಯುಚ್ಛಾದನಪರಿಮದ್ದನಪದೇಹೀತಿ ವತ್ತಬ್ಬಂ. ಉಚ್ಛಾದನಂ ವಾ ಪರಿಮದ್ದನಮತ್ತಮೇವಾತಿ ಕತ್ವಾ ನ ಗಹಿತಂ.

ಉದಕಸುತ್ತವಣ್ಣನಾ ನಿಟ್ಠಿತಾ.

ಸಳವಗ್ಗವಣ್ಣನಾ ನಿಟ್ಠಿತಾ.

ದುತಿಯೋ ಪಣ್ಣಾಸಕೋ.