೧೧. ವಲಾಹಕಸಂಯುತ್ತವಣ್ಣನಾ

೫೫೦-೬೦೬. ಲೋಕಂ ವಾಲೇನ್ತಾ ಸಂವರನ್ತಾ ಛಾದೇನ್ತಾ ಅಹನ್ತಿ ಪರಿಯೇಸನ್ತೀತಿ ವಲಾಹಾ, ದೇವಪುತ್ತಾ. ತೇಸಂ ಸಮೂಹೋ ವಲಾಹಕದೇವಕಾಯೋತಿ ಆಹ ‘‘ವಲಾಹಕಕಾಯಿಕಾ’’ತಿಆದಿ. ಸೀತಕರಣವಲಾಹಕಾತಿ ಸೀತಹರಣವಲಾಹಕಾ. ಸೇಸಪದೇಸೂತಿ ಉಣ್ಹವಲಾಹಕಾದಿಪದೇಸು. ಏಸೇವ ನಯೋತಿ ‘‘ಉಣ್ಹಕರಣವಲಾಹಕಾ’’ತಿಆದಿನಾ ಅತ್ಥೋ ವೇದಿತಬ್ಬೋ. ಚಿತ್ತಟ್ಠಪನನ್ತಿ ‘‘ಸೀತಂ ಹೋತೂ’’ತಿ ಏವಂ ಚಿತ್ತಸ್ಸ ಉಪ್ಪಾದನಂ. ವಸ್ಸಾನೇತಿ ವಸ್ಸಕಾಲೇ. ಉತುಸಮುಟ್ಠಾನಮೇವಾತಿ ಪಾಕತಿಕಸೀತಮೇವಾತಿ ಅತ್ಥೋ. ಉಣ್ಹೇಪೀತಿ ಉಣ್ಹಕಾಲೇ. ಅಬ್ಭಮಣ್ಡಪೋತಿ ಮಣ್ಡಪಸದಿಸಅಬ್ಭಪಟಲವಿತಾನಮಾಹ. ಅಬ್ಭಂ ಉಪ್ಪಜ್ಜತೀತಿ ತಹಂ ತಹಂ ಪಟಲಂ ಉಟ್ಠಹತಿ. ಅಬ್ಭೇಯೇವಾತಿ ಅಬ್ಭಕಾಲೇ ಏವ, ವಸ್ಸಾನೇತಿ ಅತ್ಥೋ. ಅತಿಅಬ್ಭನ್ತಿ ಸತಪಟಲಸಹಸ್ಸಪಟಲಂ ಹುತ್ವಾ ಅಬ್ಭುಟ್ಠಾನಂ. ಚಿತ್ತವೇಸಾಖಮಾಸೇಸೂತಿ ವಸನ್ತಕಾಲಂ ಸನ್ಧಾಯಾಹ. ತದಾ ಹಿ ವಿದ್ಧೋ ವಿಗತವಲಾಹಕೋ ದೇವೋ ಭವಿತುಂ ಯುತ್ತೋ. ಉತ್ತರದಕ್ಖಿಣಾದೀತಿ ಆದಿ-ಸದ್ದೇನ ಪಚ್ಛಿಮವಾತಾದಿಂ ಸಙ್ಗಣ್ಹಾತಿ. ಪಕತಿವಾತೋತಿ ಪಕತಿಯಾ ಸಭಾವೇನ ವಾಯನಕವಾತೋ. ತಂ ಉತುಸಮುಟ್ಠಾನಮೇವಾತಿ ಆಹಾರೂಪಜೀವೀನಂ ಸತ್ತಾನಂ ಸಾಧಾರಣಕಮ್ಮೂಪನಿಸ್ಸಯಉತುಸಮುಟ್ಠಾನಮೇವ. ಏಸ ನಯೋ ಉತುಸಮುಟ್ಠಾನಸೀತುಣ್ಹವಾತೇಸುಪಿ. ತಮ್ಪಿ ಹಿ ಆಹಾರೂಪಜೀವೀನಂ ಸತ್ತಾನಂ ಸಾಧಾರಣಕಮ್ಮೂಪನಿಸ್ಸಯಮೇವಾತಿ.

ಗೀತನ್ತಿ ಮೇಘಗೀತಂ. ಸಚ್ಚಕಿರಿಯಾಯಾತಿ ತಾದಿಸಾನಂ ಪುರಿಸವಿಸೇಸಾನಂ ಸಚ್ಚಾಧಿಟ್ಠಾನೇನ. ಇದ್ಧಿಬಲೇನಾತಿ ಇದ್ಧಿಮನ್ತಾನಂ ಇದ್ಧಿಆನುಭಾವೇನ. ವಿನಾಸಮೇಘೇನಾತಿ ಕಪ್ಪವಿನಾಸಕಮೇಘೇನ. ಅಞ್ಞೇನಪಿ ಕಣ್ಹಪಾಪಿಕಸತ್ತಾನಂ ಪಾಪಕಮ್ಮಪಚ್ಚಯಾ ಉಪ್ಪನ್ನವಿನಾಸಮೇಘೇನ ವುಟ್ಠೇನ ಸೋ ಸೋ ದೇಸೋ ವಿನಸ್ಸತೇವ.

ವಲಾಹಕಸಂಯುತ್ತವಣ್ಣನಾ ನಿಟ್ಠಿತಾ.