೧೨. ಧಮ್ಮಕಥಿಕವಗ್ಗೋ

೧-೨. ಅವಿಜ್ಜಾಸುತ್ತಾದಿವಣ್ಣನಾ

೧೧೩-೧೧೪. ಯಾವತಾತಿ ಯಸ್ಮಾ. ಇಮಾಯ…ಪೇ… ಸಮನ್ನಾಗತೋತಿ ‘‘ಇದಂ ದುಕ್ಖನ್ತಿ ಯಥಾಭೂತಂ ನಪ್ಪಜಾನಾತೀ’’ತಿಆದಿನಾ ನಯೇನ ವುತ್ತಾಯ ಚತೂಸು ಅರಿಯಸಚ್ಚೇಸು ಅಞ್ಞಾಣಸಭಾವಾಯ ಅವಿಜ್ಜಾಯ ಸಮ್ಮೋಹೇನ ಸಮನ್ನಾಗತೋ. ಏತ್ತಾವತಾತಿ ಏತ್ತಕೇನ ಕಾರಣೇನ ಅವಿಜ್ಜಾಗತೋ ಸಮಙ್ಗೀಭೂತೇನ ಉಪಗತೋ, ಅವಿಜ್ಜಾಯ ವಾ ಉಪೇತೋ ನಾಮ ಹೋತಿ.

ದುತಿಯೇಪೀತಿ ವಿಜ್ಜಾಸುತ್ತೇ. ‘‘ವಿಜ್ಜಾವಸೇನ ದೇಸನಾ’’ತಿ ಅಯಮೇವ ವಿಸೇಸೋತಿ ಆಹ ‘‘ಏಸೇವ ನಯೋ’’ತಿ.

ಅವಿಜ್ಜಾಸುತ್ತಾದಿವಣ್ಣನಾ ನಿಟ್ಠಿತಾ.

೩. ಧಮ್ಮಕಥಿಕಸುತ್ತವಣ್ಣನಾ

೧೧೫. ಪಠಮೇನ ಧಮ್ಮಕಥಿಕೋ ಕಥಿತೋ ‘‘ಧಮ್ಮಂ ದೇಸೇತೀ’’ತಿ ವುತ್ತತ್ತಾ. ದುತಿಯೇನ ಸೇಖಭೂಮಿ ಕಥಿತಾ ‘‘ಪಟಿಪನ್ನೋ ಹೋತೀ’’ತಿ ವುತ್ತತ್ತಾ, ತತಿಯೇನ ಅಸೇಖಭೂಮಿ ಕಥಿತಾ ‘‘ಅನುಪಾದಾವಿಮುತ್ತೋ ಹೋತೀ’’ತಿ ವುತ್ತತ್ತಾ. ಧಮ್ಮಕಥಿಕಂ ಪುಚ್ಛಿತೇನ ಭಗವತಾ. ವಿಸೇಸೇತ್ವಾತಿ ಧಮ್ಮಕಥಿಕಭಾವತೋ ವಿಸೇಸೇತ್ವಾ ಉಕ್ಕಂಸೇತ್ವಾ. ದ್ವೇ ಭೂಮಿಯೋತಿ ಸೇಕ್ಖಾಸೇಕ್ಖಭೂಮಿಯೋ.

ಧಮ್ಮಕಥಿಕಸುತ್ತವಣ್ಣನಾ ನಿಟ್ಠಿತಾ.

೪. ದುತಿಯಧಮ್ಮಕಥಿಕಸುತ್ತವಣ್ಣನಾ

೧೧೬. ತೀಣಿ ವಿಸ್ಸಜ್ಜನಾನೀತಿ ಯಥಾಪುಚ್ಛಂ ತೀಣಿ ವಿಸ್ಸಜ್ಜನಾನಿ.

ದುತಿಯಧಮ್ಮಕಥಿಕಸುತ್ತವಣ್ಣನಾ ನಿಟ್ಠಿತಾ.

೫-೯. ಬನ್ಧನಸುತ್ತಾದಿವಣ್ಣನಾ

೧೧೭-೧೨೧. ತೀರಂ ವುಚ್ಚತಿ ವಟ್ಟಂ ಓರಿಮತೀರನ್ತಿ ಕತ್ವಾ. ತೇನಾಹ ‘‘ಅಥಾಯಂ ಇತರಾ ಪಜಾ, ತೀರಮೇವಾನುಧಾವತೀ’’ತಿ (ಧ. ಪ. ೮೫). ಪಾರಂ ವುಚ್ಚತಿ ನಿಬ್ಬಾನಂ ಸಂಸಾರಸ್ಸ ಪಾರಿಮನ್ತಿ ಕತ್ವಾ. ಬದ್ಧೋತಿ ಅನುಸಯಪ್ಪಹಾನಸ್ಸ ಅಕತತ್ತಾ ಕಿಲೇಸಬನ್ಧನೇನ ಬದ್ಧೋ, ಸುಕ್ಕಪಕ್ಖೇಪಿ ದಿಟ್ಠಿಸಮನುಪಸ್ಸನಾಯ ರೂಪಾದಿಬನ್ಧನಸ್ಸ ಪಟಿಕ್ಖೇಪಮತ್ತಮೇವ ವುತ್ತಂ, ನ ವಿಮೋಕ್ಖನ್ತಿ ಅಧಿಪ್ಪಾಯೋ. ಇಮಸ್ಮಿಂ ಸುತ್ತೇ ವಟ್ಟದುಕ್ಖಂ ಕಥಿತನ್ತಿ ‘‘ತೀರದಸ್ಸೀ ಪಾರದಸ್ಸೀ, ಪರಿಮುತ್ತೋ ಸೋ ದುಕ್ಖಸ್ಮಾತಿ ವದಾಮೀ’’ತಿ ಆಗತತ್ತಾ ವಟ್ಟವಿವಟ್ಟಂ ಕಥಿಕನ್ತಿ ವತ್ತುಂ ಸಕ್ಕಾ.

ಛಟ್ಠಾದೀನಿ ಉತ್ತಾನತ್ಥಾನೇವ ಹೇಟ್ಠಾ ವುತ್ತನಯತ್ತಾ.

ಬನ್ಧನಸುತ್ತಾದಿವಣ್ಣನಾ ನಿಟ್ಠಿತಾ.

೧೦. ಸೀಲವನ್ತಸುತ್ತವಣ್ಣನಾ

೧೨೨. ಆಬಾಧಟ್ಠೇನಾತಿ ಆದಿತೋ ಉಪ್ಪತ್ತಿತೋ ಪಟ್ಠಾಯ ಬಾಧನಟ್ಠೇನ ರುಜನಟ್ಠೇನ. ಅನ್ತೋದೋಸಟ್ಠೇನಾತಿ ಅಬ್ಭನ್ತರೇ ಏವ ದುಸ್ಸನಟ್ಠೇನ ಕುಪ್ಪನಟ್ಠೇನ. ಖಣನಟ್ಠೇನಾತಿ ಸಸನಟ್ಠೇನ. ದುಕ್ಖಟ್ಠೇನಾತಿ ದುಕ್ಖಮತ್ತಾ ದುಕ್ಖಭಾವೇನ. ದುಕ್ಖಞ್ಹಿ ಲೋಕೇ ‘‘ಅಘ’’ನ್ತಿ ವುಚ್ಚತಿ ಅತಿವಿಯ ಹನನತೋ. ವಿಸಭಾಗಂ …ಪೇ… ಪಚ್ಚಯಟ್ಠೇನಾತಿ ಯಥಾಪವತ್ತಮಾನಾನಂ ಧಾತಾದೀನಂ ವಿಸಭಾಗಭೂತಮಹಾಭೂತಸಮುಟ್ಠಾನಸ್ಸ ಆಬಾಧಸ್ಸ ಪಚ್ಚಯಭಾವೇನ. ಅಸಕಟ್ಠೇನಾತಿ ಅನತ್ತನಿಯತೋ. ಪಲುಜ್ಜನಟ್ಠೇನಾತಿ ಪಕಾರತೋ ಭಿಜ್ಜನಟ್ಠೇನ. ಸತ್ತಸುಞ್ಞತಟ್ಠೇನಾತಿ ಸತ್ತಸಙ್ಖಾತಅತ್ತಸುಞ್ಞತಟ್ಠೇನ. ಅತ್ತಾಭಾವೇನಾತಿ ದಿಟ್ಠಿಗತಿಕಪರಿಕಪ್ಪಿತಸ್ಸ ಅತ್ತನೋ ಅಭಾವೇನ. ಸುಞ್ಞತೋ ಅನತ್ತತೋತಿ ಏತ್ಥ ‘‘ಪರತೋ’’ತಿ ಪದಸ್ಸ ಸಙ್ಗಹೋ ಕಾತಬ್ಬೋ, ತಸ್ಮಾ ‘‘ದ್ವೀಹಿ ಅನತ್ತಮನಸಿಕಾರೋ’’ತಿ ವತ್ತಬ್ಬಂ.

ಸೀಲವನ್ತಸುತ್ತವಣ್ಣನಾ ನಿಟ್ಠಿತಾ.

೧೧. ಸುತವನ್ತಸುತ್ತವಣ್ಣನಾ

೧೨೩. ತಥಾ ಏಕಾದಸಮೇತಿ ಏತ್ಥ ತಥಾ-ಸದ್ದೇನ ‘‘ಉತ್ತಾನಮೇವಾ’’ತಿ ಇದಂ ಆಕಡ್ಢತಿ. ಇಧಾತಿ ಏಕಾದಸಮೇ. ಕಮ್ಮಟ್ಠಾನಸ್ಸ ಉಗ್ಗಹಧಾರಣಪರಿಚಯಮನಸಿಕಾರವಸೇನ ಪವತ್ತಞಾಣಂ ಕಮ್ಮಟ್ಠಾನಸುತವಸೇನ ನಿಪ್ಫಜ್ಜನತೋ ‘‘ಸುತ’’ನ್ತಿ ವುತ್ತಂ.

ಸುತವನ್ತಸುತ್ತವಣ್ಣನಾ ನಿಟ್ಠಿತಾ.

೧೨-೧೩. ಕಪ್ಪಸುತ್ತಾದಿವಣ್ಣನಾ

೧೨೪-೧೨೫. ರಾಹುಲೋವಾದಸದಿಸಾನೀತಿ ರಾಹುಲೋವಾದಸುತ್ತೇ (ಮ. ನಿ. ೨.೧೧೩ ಆದಯೋ) ಆಗತಸುತ್ತಸದಿಸಾನಿ.

ಕಪ್ಪಸುತ್ತಾದಿವಣ್ಣನಾ ನಿಟ್ಠಿತಾ.

ಧಮ್ಮಕಥಿಕವಗ್ಗವಣ್ಣನಾ ನಿಟ್ಠಿತಾ.