೩. ಅಸ್ಸುಸುತ್ತವಣ್ಣನಾ

೧೨೬. ಕನ್ದನಂ ಸಸದ್ದಂ, ರೋದನಂ ಪನ ಕೇವಲಮೇವಾತಿ ಆಹ ‘‘ಕನ್ದನ್ತಾನನ್ತಿ ಸಸದ್ದಂ ರುದಮಾನಾನ’’ನ್ತಿ. ಪವತ್ತನ್ತಿ ಸನ್ದನವಸೇನ ಪವತ್ತಂ. ‘‘ಸಿನೇರುರಸ್ಮೀಹಿ ಪರಿಚ್ಛಿನ್ನೇಸೂ’’ತಿ ಸಙ್ಖೇಪೇನ ವುತ್ತಮತ್ಥಂ ವಿವರನ್ತೋ ‘‘ಸಿನೇರುಸ್ಸಾ’’ತಿಆದಿಮಾಹ. ಮಣಿಮಯನ್ತಿ ಇನ್ದನೀಲಮಣಿಮಯಂ. ಸಿನೇರುಸ್ಸ ಪುಬ್ಬದಕ್ಖಿಣಕೋಣಸಮಪದೇಸಾ ‘‘ಪುಬ್ಬದಕ್ಖಿಣಪಸ್ಸಾ’’ತಿ ಅಧಿಪ್ಪೇತಾ. ತೇಹಿ ನಿಕ್ಖನ್ತರಜತರಸ್ಮಿಯೋ ಇನ್ದನೀಲರಸ್ಮಿಯೋ ಚ ಏಕತೋ ಹುತ್ವಾ. ತಾಸಂ ರಸ್ಮೀನಂ ಅನ್ತರೇಸೂತಿ ತಾಸಂ ಚತೂಹಿ ಕೋಣೇಹಿ ನಿಕ್ಖನ್ತರಸ್ಮೀನಂ ಚತೂಸು ಅನ್ತರೇಸು. ಚತ್ತಾರೋತಿ ದಕ್ಖಿಣಾದಿಭೇದಾ ಚತ್ತಾರೋ ಮಹಾಸಮುದ್ದಾ ಹೋನ್ತಿ. ವಿಅಸನನ್ತಿ ವಿಸೇಸೇನ ಖೇಪನಂ. ಕಿಂ ಪನ ತನ್ತಿ ಆಹ ‘‘ವಿನಾಸೋತಿ ಅತ್ಥೋ’’ತಿ.

ಅಸ್ಸುಸುತ್ತವಣ್ಣನಾ ನಿಟ್ಠಿತಾ.