೧. ತಿಣಕಟ್ಠಸುತ್ತವಣ್ಣನಾ

೧೨೪. ಉಪಸಗ್ಗೋ ಸಮಾಸವಿಸಯೇ ಸಸಾಧನಂ ಕಿರಿಯಂ ದಸ್ಸೇತೀತಿ ವುತ್ತಂ ‘‘ಞಾಣೇನ ಅನುಗನ್ತ್ವಾಪೀ’’ತಿ. ವಸ್ಸಸತಂ ವಸ್ಸಸಹಸ್ಸನ್ತಿ ನಿದಸ್ಸನಮತ್ತಮೇತಂ, ತತೋ ಭಿಯ್ಯೋಪಿ ಅನುಗನ್ತ್ವಾ ಅನಮತಗ್ಗೋ ಏವ ಸಂಸಾರೋ. ಅಗ್ಗ-ಸದ್ದೋ ಇಧ ಮರಿಯಾದವಚನೋ, ಅನುದ್ದೇಸಿಕಞ್ಚೇತಂ ವಚನನ್ತಿ ಆಹ ‘‘ಅಪರಿಚ್ಛಿನ್ನಪುಬ್ಬಾಪರಕೋಟಿಕೋ’’ತಿ. ಅಞ್ಞಥಾ ಅನ್ತಿಮಭವಿಕಪರಿಚ್ಛಿನ್ನಕತವಿಮುತ್ತಿಪರಿಪಾಚನೀಯಧಮ್ಮಾದೀನಂ ವಸೇನ ಅಪರಿಚ್ಛಿನ್ನಪುಬ್ಬಾಪರಕೋಟಿ ನ ಸಕ್ಕಾ ವತ್ತುಂ. ಸಂಸರಣಂ ಸಂಸಾರೋ. ಪಚ್ಛಿಮಾಪಿ ನ ಪಞ್ಞಾಯತಿ ಅನ್ಧಬಾಲಾನಂ ವಸೇನಾತಿ ಅಧಿಪ್ಪಾಯೋ. ತೇನಾಹ ಭಗವಾ ‘‘ದೀಘೋ ಬಾಲಾನ ಸಂಸಾರೋ’’ತಿ (ಧ. ಪ. ೬೦). ವೇಮಜ್ಝೇಯೇವ ಪನ ಸತ್ತಾ ಸಂಸರನ್ತಿ ಪುಬ್ಬಾಪರಕೋಟೀನಂ ಅಲಬ್ಭನೀಯತ್ತಾ. ಅತ್ಥೋ ಪರಿತ್ತೋ ಹೋತಿ ಯಥಾಭೂತಾವಬೋಧಾಭಾವತೋ. ಬುದ್ಧಸಮಯೇತಿ ಸಾಸನೇತಿ ಅತ್ಥೋ. ಅತ್ಥೋ ಮಹಾ ಯಥಾಭೂತಾವಬೋಧಿಸಮ್ಭವತೋ, ಅತ್ಥಸ್ಸ ವಿಪುಲತಾಯ ತಂಸದಿಸಾ ಉಪಮಾ ನತ್ಥೀತಿ ಪರಿತ್ತಂಯೇವ ಉಪಮಂ ಆಹರನ್ತೀತಿ ಅಧಿಪ್ಪಾಯೋ. ಇದಾನಿ ವುತ್ತಮೇವತ್ಥಂ ‘‘ಪಾಳಿಯಂ ಹೀ’’ತಿಆದಿನಾ ಸಮತ್ಥೇತಿ. ಮಾತು ಮಾತರೋತಿ ಮಾತು ಮಾತಾಮಹಿಯೋ. ತಸ್ಸೇವಾತಿ ದುಕ್ಖಸ್ಸೇವ. ತಿಬ್ಬನ್ತಿ ದುಕ್ಖಪರಿಯಾಯೋತಿ.

ತಿಣಕಟ್ಠಸುತ್ತವಣ್ಣನಾ ನಿಟ್ಠಿತಾ.