೫. ದುತಿಯವೇದನಾನಾನತ್ತಸುತ್ತವಣ್ಣನಾ

೮೯. ತತಿಯಚತುತ್ಥೇಸು ವುತ್ತನಯಾವಾತಿ ‘‘ನೋ ಚಕ್ಖುಸಮ್ಫಸ್ಸಂ ಪಟಿಚ್ಚ ಉಪ್ಪಜ್ಜತಿ ಚಕ್ಖುಧಾತೂ’’ತಿ ಏವಂ ವುತ್ತನಯೋ, ಚತುತ್ಥೇ ‘‘ಚಕ್ಖುಧಾತುಂ, ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ಚಕ್ಖುಸಮ್ಫಸ್ಸೋ’’ತಿಆದಿನಾ ವುತ್ತನಯೋ ಚ. ಏಕತೋ ಕತ್ವಾತಿ ಏಕಜ್ಝಂ ಕತ್ವಾ ದೇಸಿತಾ. ಕಸ್ಮಾ ಪನ ತೇಸು ಸುತ್ತೇಸು ಏವಂ ದೇಸನಾ ಪವತ್ತಾತಿ ಆಹ ‘‘ಸಬ್ಬಾನಿ ಚೇತಾನೀ’’ತಿಆದಿ. ಪಟಿಸೇಧೋ ಪನ ತೇಸಂ ವೇದನಾನಾನತ್ತಾದೀನಂ ಫಸ್ಸನಾನತ್ತಾದಿಕಸ್ಸ ಪಚ್ಚಯಭಾವತೋ ತಥಾಉಪ್ಪತ್ತಿಯಾ ಅಸಮ್ಭವತೋ. ಇತೋ ಪರೇಸೂತಿ ‘‘ನೋ ಪರಿಯೇಸನಾನಾನತ್ತಂ ಪಟಿಚ್ಚ ಉಪ್ಪಜ್ಜತಿ ಪರಿಳಾಹನಾನತ್ತ’’ನ್ತಿಆದೀಸು.

ದುತಿಯವೇದನಾನಾನತ್ತಸುತ್ತವಣ್ಣನಾ ನಿಟ್ಠಿತಾ.