೭. ವಿಸಾಖಸುತ್ತವಣ್ಣನಾ

೨೪೧. ಪುರಸ್ಸ ಏಸಾತಿ ಪೋರೀ, ಚಾತುರಿಯಯುತ್ತತಾ. ತೇನಾಹ ‘‘ಪುರವಾಸೀನ’’ನ್ತಿಆದಿ. ಸಾ ಪನ ದುತವಿಲಮ್ಬಿತಖಲಿತವಸೇನ ಅಪ್ಪಸನ್ನಲೂಖತಾದಿದೋಸರಹಿತಾ ಹೋತೀತಿ ಆಹ ‘‘ಪುರ…ಪೇ… ವಾಚಾಯಾ’’ತಿ. ಅಸನ್ದಿದ್ಧಾಯಾತಿ ಮುತ್ತವಾಚಾಯ. ತೇನಾಹ ‘‘ಅಪಲಿಬುದ್ಧಾಯಾ’’ತಿಆದಿ. ನ ಏಲಂ ದೋಸಂ ಗಲೇತೀತಿ ಅನೇಲಗಲಾ, ಅವಿರುಜ್ಝನವಾಚಾ. ತೇನಾಹ ‘‘ನಿದ್ದೋಸಾಯಾ’’ತಿ. ಚತುಸಚ್ಚಸ್ಸ ಪಕಾಸಕಾ, ನ ಕದಾಚಿ ಸಚ್ಚವಿಮುತ್ತಾತಿ ಆಹ ‘‘ಚತುಸಚ್ಚಪರಿಯಾಪನ್ನಾಯಾ’’ತಿ. ತಾ ಹಿ ಚತ್ತಾರಿ ಸಚ್ಚಾನಿ ಪರಿಚ್ಛಿಜ್ಜ ಆಪಾದೇನ್ತಿ ಪಟಿಪಾದೇನ್ತಿ ಪವತ್ತೇನ್ತಿ. ತೇನಾಹ ‘‘ಚತ್ತಾರಿ ಸಚ್ಚಾನಿ ಅಮುಞ್ಚಿತ್ವಾ ಪವತ್ತಾಯಾ’’ತಿ. ಧಜೋ ನಾಮ ಸಬ್ಬಧಮ್ಮೇಹಿ ಸಮುಸ್ಸಿತಟ್ಠೇನ.

ವಿಸಾಖಸುತ್ತವಣ್ಣನಾ ನಿಟ್ಠಿತಾ.