೫. ಆನನ್ದಸುತ್ತವಣ್ಣನಾ

೨೨೫. ಅತಿವೇಲನ್ತಿ ಅತಿಬಹುಕಾಲಂ. ಭಿಕ್ಖುನಾ ನಾಮ ಉಪಗತಾನಂ ಉಪನಿಸಿನ್ನಕಥಾಮತ್ತಂ ವತ್ವಾ ಗನ್ಥಧುರೇಹಿ ವಾಸಧುರೇಹಿ ವಾ ಯುತ್ತಪಯುತ್ತಚಿತ್ತೇನ ಭವಿತಬ್ಬಂ, ನಾತಿವೇಲಂ ತೇಸಂ ಸಞ್ಞತ್ತಿಬಹುಲೇನ. ಥೇರೋ ಪನ ತದಾ ಕೇನಚಿ ಕಾರಣೇನ ಬಹುವೇಲಂ ಗಿಹಿಸಞ್ಞತ್ತಿಬಹುಲೋ ಅಹೋಸಿ, ತಂ ಸನ್ಧಾಯ ವುತ್ತಂ ‘‘ಅತಿವೇಲ’’ನ್ತಿಆದಿ. ಇದಾನಿ ತಮತ್ಥಂ ವಿಭಾವೇತುಂ ‘‘ಭಗವತೀ’’ತಿಆದಿ ವುತ್ತಂ. ತನ್ತಿ ತಂ ತಾದಿಸಂ ಸಞ್ಞಾಪನಂ ಸನ್ಧಾಯ ಏತಂ ‘‘ಅತಿವೇಲಂ ಗಿಹಿಸಞ್ಞತ್ತಿಬಹುಲೋ’’ತಿ ವಚನಂ ವುತ್ತಂ. ಭಿಕ್ಖುಸಙ್ಘಸ್ಸ ಕಥಂ ಸುತ್ವಾತಿ ಸಙ್ಘಸ್ಸ ಮಜ್ಝೇ ನಿಸೀದಿತ್ವಾ ಥೇರೇನ ಕಥಿತತ್ತಾ ವುತ್ತಂ. ಸತ್ಥುಸಾಸನನ್ತಿ ಪಿಟಕತ್ತಯಂ ವದತಿ.

ಪಸಕ್ಕಿಯಾತಿ ಉಪಸಕ್ಕಿತ್ವಾ ಗನ್ತ್ವಾ. ತಂ ಪನ ತತ್ಥ ಅಜ್ಝೋಗಾಹನಂ ಹೋತೀತಿ ಆಹ ‘‘ಪವಿಸಿತ್ವಾ’’ತಿ. ಸಙ್ಖಾರದುಕ್ಖತೋ ನಿಬ್ಬಿನ್ನಹದಯಸ್ಸ ಸಬ್ಬಸಙ್ಖಾರವಿನಿಸ್ಸಟಂ ನಿಬ್ಬಾನಂ ಯಾಥಾವತೋ ಪಚ್ಚವೇಕ್ಖನ್ತಸ್ಸ ಸಮ್ಮದೇವ ಸಮಸ್ಸಾಸಕರಂ ಹುತ್ವಾ ಉಪಟ್ಠಹನ್ತಂ ತಂ ಉಪರಿ ಅಧಿಗಮಾಯ ಉಸ್ಸುಕ್ಕಂ ಕರೋನ್ತೋ ನಿಬ್ಬಾನಂ ಹದಯೇ ನಿಕ್ಖಿಪತಿ ನಾಮಾತಿ ಆಹ – ‘‘ನಿಬ್ಬಾನಂ…ಪೇ… ಓಪೇತಿ ನಾಮಾ’’ತಿ. ನಿಬ್ಬಾನಂ…ಪೇ… ಆರಮ್ಮಣತೋ ಓಪೇತಿ ನಾಮಾತಿ ಆನೇತ್ವಾ ಸಮ್ಬನ್ಧೋ. ಅತ್ಥವಿರಹಿತಾ ‘‘ಬಿಳಿಬಿಳೀ’’ತಿ ಪವತ್ತಕಿರಿಯಾ ಬಿಳಿಕಾ, ಅಯಂ ಪನ ಗಿಹಿಸಞ್ಞತ್ತಿಕಥಾ ಥೇರಸ್ಸ ಅತ್ತನೋ ಸಾಮಞ್ಞತ್ಥಅಸಾಧನತೋ ದೇವತಾಯ ಬಿಳಿಕಾ ವಿಯಾತಿ ಬಿಳಿಬಿಳಿಕಾತಿ ವುತ್ತಾ.

ಆನನ್ದಸುತ್ತವಣ್ಣನಾ ನಿಟ್ಠಿತಾ.