೯. ತುರೂಬ್ರಹ್ಮಸುತ್ತವಣ್ಣನಾ

೧೮೦. ಆಬಾಧೋ ಏತಸ್ಸ ಅತ್ಥೀತಿ ಆಬಾಧಿಕೋ. ಅನನ್ತರಸುತ್ತೇತಿ ಅನಾಗತಾನನ್ತರೇ ಸುತ್ತೇ. ವರಾಕೋತಿ ಅನುಗ್ಗಹವಚನಮೇವ, ನ ನಿಪ್ಪರಿಯಾಯೇನ ವುತ್ತವಚನಂ. ಪಿಯಸೀಲಾತಿ ಇಮಿನಾ ಏತಸ್ಮಿಂ ಅತ್ಥೇ ನಿರುತ್ತಿನಯೇನ ‘‘ಪೇಸಲಾ’’ತಿ ಪದಸಿದ್ಧೀತಿ ದಸ್ಸೇತಿ. ಕಬರಕ್ಖೀನೀತಿ ಬ್ಯಾಧಿಬಲೇನ ಪರಿಭಿನ್ನವಣ್ಣತಾಯ ಕಬರಭೂತಾನಿ ಅಕ್ಖೀನಿ. ಯತ್ತಕನ್ತಿ ಯಂ ತ್ವಂ ಭಗವತೋ ವಚನಂ ಅಞ್ಞಥಾ ಕರೋಸಿ, ತತ್ತಕಂ ತಯಾ ಅಪರದ್ಧಂ, ತಸ್ಸ ಪಮಾಣಂ ನತ್ಥೀತಿ ಅತ್ಥೋ. ಯಸ್ಮಾ ಅನಾಗಾಮಿನೋ ನಾಮ ಕಾಮಚ್ಛನ್ದಬ್ಯಾಪಾದಾ ಪಹೀನಾ ಹೋನ್ತಿ, ತ್ವಞ್ಚ ದಿಟ್ಠೋ ಕಾಮಚ್ಛನ್ದಬ್ಯಾಪಾದವಸೇನ ಇಧಾಗತೋ, ತಸ್ಮಾ ಯಾವ ತೇ ಇದಂ ಅಪರದ್ಧನ್ತಿ ಅಯಮೇವೇತ್ಥ ಅತ್ಥೋ ದಟ್ಠಬ್ಬೋ.

ಅದಿಟ್ಠಿಪ್ಪತ್ತೋತಿ ಅಪ್ಪತ್ತದಿಟ್ಠಿನಿಮಿತ್ತೋ. ಗಿಲವಿಸೋ ವಿಯ ವಿಸಂ ಗಿಲಿತ್ವಾ ಠಿತೋ ವಿಯ. ಕುಠಾರಿಸದಿಸಾ ಮೂಲಪಚ್ಛಿನ್ದನಟ್ಠೇನ. ಉತ್ತಮತ್ಥೇತಿ ಅರಹತ್ತೇ. ಖೀಣಾಸವೋತಿ ವದತಿ ಸುನಕ್ಖತ್ತೋ ವಿಯ ಅಚೇಲಂ ಕೋರಕ್ಖತ್ತಿಯಂ. ಯೋ ಅಗ್ಗಸಾವಕೋ ವಿಯ ಪಸಂಸಿತಬ್ಬೋ ಖೀಣಾಸವೋ, ತಂ ‘‘ದುಸ್ಸೀಲೋ ಅಯ’’ನ್ತಿ ಯೋ ವಾ ವದತಿ. ಸಮಕೋವ ವಿಪಾಕೋತಿ ಪಸಂಸಿಯನಿನ್ದಾ ವಿಜ್ಜಮಾನಗುಣಪರಿಧಂಸನವಸೇನ ಪವತ್ತಾ ಯಾವ ಮಹಾಸಾವಜ್ಜತಾಯ ಕಟುಕತರವಿಪಾಕಾ, ತಾವ ನಿನ್ದಿಯಪಸಂಸಾಪಿ ಮಹಾಸಾವಜ್ಜತಾಯ ಸಮವಿಪಾಕಾ ತತ್ಥ ಅವಿಜ್ಜಮಾನಗುಣಸಮಾರೋಪನೇನ ಅತ್ತನೋ ಪರೇಸಂ ಮಿಚ್ಛಾಪಟಿಪತ್ತಿಹೇತುಭಾವತೋ ಪಸಂಸಿಯೇನ ತಸ್ಸ ಸಮಭಾವಕರಣತೋ ಚ. ಲೋಕೇಪಿ ಹಿ ಅಯಂ ಪುರೇ ಸಮಣಗಾರಯ್ಹೋ ಹೋತಿ, ಪಗೇವ ದುಪ್ಪಟಿಪನ್ನದುಪ್ಪಟಿಪನ್ನೋತಿ ಸಮಂ ಕರೋನ್ತೀತಿ.

ಸಕೇನಾತಿ ಅತ್ತನೋ ಸಾಪತೇಯ್ಯೇನ. ಅಯಂ ಅಪ್ಪಮತ್ತಕೋ ಅಪರಾಧೋ ದಿಟ್ಠಧಮ್ಮಿಕತ್ತಾ ಸಪ್ಪತಿಕಾರತ್ತಾ ಚ ತಸ್ಸ. ಅಯಂ ಮಹನ್ತತರೋ ಕಲಿ ಕತೂಪಚಿತಸ್ಸ ಸಮ್ಪರಾಯಿಕತ್ತಾ ಅಪ್ಪತಿಕಾರತ್ತಾ ಚ.

‘‘ನಿರಬ್ಬುದೋ’’ತಿ ಗಣನಾವಿಸೇಸೋ ಏಕೋತಿ ಆಹ ‘‘ನಿರಬ್ಬುದಗಣನಾಯಾ’’ತಿ, ಸತಸಹಸ್ಸಂ ನಿರಬ್ಬುದಾನನ್ತಿ ಅತ್ಥೋ. ನಿರಬ್ಬುದಪರಿಗಣನಂ ಪನ ಹೇಟ್ಠಾ ವುತ್ತಮೇವ. ಯಮರಿಯಗರಹೀ ನಿರಯಂ ಉಪೇತೀತಿ ಏತ್ಥ ಯಥಾವುತ್ತಂ ಆಯುಪ್ಪಮಾಣಂ ಪಾಕತಿಕೇನ ಅರಿಯೂಪವಾದಿನಾ ವುತ್ತನ್ತಿ ವೇದಿತಬ್ಬಂ. ‘‘ಅಗ್ಗಸಾವಕಾನಂ ಪನ ಗುಣಮಹನ್ತತಾಯ ತತೋಪಿ ಅತಿವಿಯ ಮಹನ್ತತರಾ ಏವಾ’’ತಿ ವದನ್ತಿ.

ತುರೂಬ್ರಹ್ಮಸುತ್ತವಣ್ಣನಾ ನಿಟ್ಠಿತಾ.