೨. ಸೋಮಾಸುತ್ತವಣ್ಣನಾ

೧೬೩. ಠಾನನ್ತಿ ಇಸ್ಸರಿಯಟ್ಠಾನಂ ವಿಸಯಜ್ಝತ್ತಂ. ದುಪ್ಪಸಹಂ ಅಕಮ್ಪಿಯಭಾವತ್ತಾ. ದ್ವಙ್ಗುಲಪಞ್ಞಾಯಾತಿ ಏತ್ಥ ಇತ್ಥಿಯೋ ಹಿ ದಹರಕುಮಾರಿಕಾಕಾಲತೋ ಪಟ್ಠಾಯ ಓದನಪಚನವಿಧಿಂ ಅನುತಿಟ್ಠನ್ತಿಯೋ ಉಕ್ಖಲಿಯಂ ಉದಕಂ ತಾಪೇತ್ವಾ ತಣ್ಡುಲೇ ಪಕ್ಖಿಪಿತ್ವಾ ಅತ್ತನೋ ಬುದ್ಧಿಯಾ ತೇಸಂ ಪಾಕಕಾಲಪ್ಪಮಾಣಂ ಪರಿಚ್ಛಿನ್ದಿತುಂ ತಾನಿ ದಬ್ಬಿಯಾ ಉದ್ಧರಿತ್ವಾಪಿ ವಣ್ಣಸಣ್ಠಾನಗ್ಗಹಣಮತ್ತೇನ ಪಕ್ಕಾಪಕ್ಕಭಾವಂ ಜಾನಿತುಂ ನ ಸಕ್ಕೋನ್ತಿ, ಕೇವಲಂ ಪನ ದ್ವೀಹಿ ಅಙ್ಗುಲೀಹಿ ಉಪ್ಪೀಳಿತಕಾಲೇ ಏವ ಜಾನನ್ತಿ, ತಸ್ಮಾ ದ್ವೀಹಙ್ಗುಲಿಕೇಹಿ ದುಬ್ಬಲಪಞ್ಞತ್ತಾ ‘‘ದ್ವಙ್ಗುಲಪಞ್ಞಾ’’ತಿ ವುಚ್ಚನ್ತಿ. ಫಲಸಮಾಪತ್ತಿಞಾಣಪ್ಪವತ್ತಿಕಿತ್ತನೇನ ಚತೂಸು ಸಚ್ಚೇಸು ಅಸಮ್ಮೋಹವಿಹಾರೋ ದೀಪಿತೋ ಹೋತೀತಿ ಆಹ ‘‘ಞಾಣಮ್ಹಿ ವತ್ತಮಾನಮ್ಹೀತಿ ಫಲಸಮಾಪತ್ತಿಞಾಣೇ ಪವತ್ತಮಾನೇ’’ತಿ. ವಿಪಸ್ಸನ್ತಸ್ಸಾತಿ ಅಸಮ್ಮೋಹಪಟಿವೇಧತೋ ವಿಸೇಸೇನ ಪಸ್ಸನ್ತಸ್ಸ ಖನ್ಧಪಞ್ಚಕಮೇವ ಸಚ್ಚಾಭಿಸಮಯತೋ ಪುಬ್ಬಭಾಗೇ ವಿಪಸ್ಸನ್ತಸ್ಸ. ಅಞ್ಞಂ ವಾತಿ ಇತ್ಥಿಪುರಿಸತೋ ಅಞ್ಞಂ ವಾ ಕಿಞ್ಚಿ ವತ್ಥುಂ. ‘‘ಅಹಂ ಅಸ್ಮೀ’’ತಿ ಮಾನದಿಟ್ಠಿಗಾಹತಣ್ಹಾಗಾಹವಸೇನ ಗಹಿತವತ್ಥುಸ್ಮಿಂ ಯೇವಾತಿ ಆಹ ‘‘ಅಹಂ ಅಸ್ಮೀತಿ ತಣ್ಹಾಮಾನದಿಟ್ಠಿವಸೇನಾ’’ತಿ.

ಸೋಮಾಸುತ್ತವಣ್ಣನಾ ನಿಟ್ಠಿತಾ.