೩. ಕಿಸಾಗೋತಮೀಸುತ್ತವಣ್ಣನಾ

೧೬೪. ‘‘ಕಿಸಾಗೋತಮೀ’’ತಿ ಏತ್ಥ ಕಾ ಪನಾಯಂ ಕಿಸಾಗೋತಮೀ, ಕಿಸ್ಸ ಅಯಂ ಭಿಕ್ಖುನೀ ಹುತ್ವಾ ಸಮಣಧಮ್ಮಂ ಮತ್ಥಕಂ ಪಾಪೇಸೀತಿ ತಮತ್ಥಂ ವಿಭಾವೇತುಂ ‘‘ಪುಬ್ಬೇ ಕಿರಾ’’ತಿಆದಿಮಾರದ್ಧಂ. ಅಙ್ಗಾರಾವಾತಿ ಅದ್ದಾರಿಟ್ಠಕವಣ್ಣಅಙ್ಗಾರಾ ಏವ ಜಾತಾ. ದಾರುಸಾಕನ್ತಿ ಅದ್ಧಮಾಸಕೇನ ದಾರುಂ ಸಾಕಞ್ಚ ಆಹರಿಸ್ಸಾಮೀತಿ ಅನ್ತರಾಪಣೇ ಅನ್ತರವೀಥಿಂ ಗತಾ.

ಸಿದ್ಧತ್ಥಕನ್ತಿ ಸಾಸಪಂ. ಸಾಲಾಯನ್ತಿ ಅನಾಥಸಾಲಾಯಂ. ಖುರಗ್ಗೇಯೇವಾತಿ ಖುರಸಿಖೇ ಏವ, ಕೇಸೋರೋಹನಕ್ಖಣೇ ಏವಾತಿ ಅತ್ಥೋ.

ಏಕಮಾಸೀತಿ ಏತ್ಥ ಮ-ಕಾರೋ ಪದಸನ್ಧಿಕರೋ. ಸಂಹಿತಾವಸೇನ ಚ ಪುರಿಮಪದೇ ವಾ ರಸ್ಸತ್ತಂ. ಪರಪದೇ ವಾ ದೀಘತ್ತನ್ತಿ ಆಹ ‘‘ಏಕಾ ಆಸೀ’’ತಿ. ಭಾವನಪುಂಸಕಮೇತಂ ‘‘ಏಕಮನ್ತಂ ನಿಸೀದೀ’’ತಿಆದೀಸು ವಿಯ. ಪುತ್ತಮರಣಂ ಅನ್ತಂ ಅತೀತಂ ಇದಾನಿ ಪುತ್ತಮರಣಸ್ಸ ಅಭಾವತೋ. ತೇನೇವಾಹ ‘‘ಪುತ್ತಮರಣಂ ನಾಮ ನತ್ಥೀ’’ತಿ. ಪುರಿಸಂ ಗವೇಸಿತುನ್ತಿ ಯಥಾ ಮಯ್ಹಂ ಪುರಿಸಗವೇಸನಾ ನಾಮ ಸಬ್ಬಸೋ ನತ್ಥಿ, ತಥಾ ಏವ ಪುತ್ತಗವೇಸನಾಪಿ ನತ್ಥಿ, ತಸ್ಮಾ ಮೇ ಪುತ್ತಮರಣಂ ಏತದನ್ತಂ, ಸಬ್ಬೇಸು ಖನ್ಧಾದೀಸು ಭವಾದೀಸು ಚ ತಣ್ಹಾನನ್ದಿಯಾ ಅಭಾವಕಥನೇನ ಸಬ್ಬಸತ್ತೇಸು ತಣ್ಹಾ ಸಬ್ಬಸೋ ವಿಸೋಸಿತಾ, ತಸ್ಸಾಯೇವ ಕಾರಕಅವಿಜ್ಜಾಕ್ಖನ್ಧೋ ಪದಾಲಿತೋತಿ ಅತ್ತನೋ ನಿಕ್ಕಿಲೇಸತಂ ಪವೇದೇನ್ತೀ ಥೇರೀ ಸೀಹನಾದಂ ನದೀತಿ.

ಕಿಸಾಗೋತಮೀಸುತ್ತವಣ್ಣನಾ ನಿಟ್ಠಿತಾ.