೧೦. ವಜಿರಾಸುತ್ತವಣ್ಣನಾ

೧೭೧. ಸುದ್ಧಸಙ್ಖಾರಪುಞ್ಜೇತಿ ರೂಪಾರೂಪವಿಭಾಗೇ ಕಿಲೇಸಸಙ್ಖಾರಸಮೂಹೇ. ಪರಮತ್ಥತೋತಿ ಸಭಾವೇನ. ಯಥಾ ನ ಹಿ ಸತ್ತಸಞ್ಞಿತಸಙ್ಖಾರಪುಞ್ಜೋ ನಾಮ ಪರಮತ್ಥತೋ ಉಪಲಬ್ಭತಿ, ಏವಂ ತಬ್ಬಿನಿಮುತ್ತೋ ನಾಮ ಕೋಚಿ ನ ಉಪಲಬ್ಭತಿ ಅವಿಜ್ಜಮಾನತ್ತಾ. ವಿಜ್ಜಮಾನೇಸೂತಿ ಯಥಾಪಚ್ಚಯಸಮ್ಪತ್ತಿಯಾ ಲಬ್ಭಮಾನೇಸು. ತೇನಾಕಾರೇನಾತಿ ಇತ್ಥಿಪುರಿಸಾದಿಆಕಾರೇನ. ವವತ್ಥಿತೇಸೂತಿ ಪಚ್ಚೇಕಂ ಪಚ್ಚಯವಿಸೇಸಸಮುಟ್ಠಿತಂ ಸಣ್ಠಾನವಿಸೇಸಂ ಉಪಾದಾಯ ‘‘ಪುರಿಸೋ ಹತ್ಥೀ ಅಸ್ಸೋ’’ತಿಆದಿನಾ ಅಭಿಸಙ್ಗತೋ ಪವತ್ತೇಸು. ಸಮ್ಮುತೀತಿ ಸತ್ತೋತಿ ವೋಹಾರೋ. ತೇನಾಹ ‘‘ಸಮಞ್ಞಾಮತ್ತಮೇವಾ’’ತಿ. ಪಞ್ಚಕ್ಖನ್ಧದುಕ್ಖನ್ತಿ ಪಞ್ಚಕ್ಖನ್ಧಸಞ್ಞಿತಂ ದುಕ್ಖಂ. ವುತ್ತಂ ಹೇತಂ ಭಗವತಾ ‘‘ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ’’ತಿ (ದೀ. ನಿ. ೨.೩೮೭; ಮ. ನಿ. ೧.೧೨೦; ೩.೩೭೩; ವಿಭ. ೨೦೨) ಅಞ್ಞೋ ನೇವ ಸಮ್ಭೋತಿ ಯಥಾವುತ್ತದುಕ್ಖತೋ ಅಞ್ಞಸ್ಸ ಸಙ್ಖತಧಮ್ಮಸ್ಸ ಅಭಾವತೋ. ನ ನಿರುಜ್ಝತೀತಿ ತತೋ ಅಞ್ಞಂ ನ ನಿರುಜ್ಝತಿ, ಉಪ್ಪಾದತೋ ಹೋತಿ ನಿರೋಧೋತಿ.

ವಜಿರಾಸುತ್ತವಣ್ಣನಾ ನಿಟ್ಠಿತಾ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ಭಿಕ್ಖುನೀಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.