೯. ಅರಞ್ಞಾಯತನಇಸಿಸುತ್ತವಣ್ಣನಾ

೨೫೫. ಜಾಮಾತಿಕಾ ವುಚ್ಚತಿ ಧೀತುಪತಿ, ಸಸುರೋ ಭರಿಯಾಯ ಪಿತಾ, ತಸ್ಮಾ ಇಮೇ ಅನ್ತರವತ್ತಿನೋ ದ್ವೇ ಜನಾ ಸಕ್ಕವೇಪಚಿತ್ತಿನೋ ಸುಜಾಯ ವಸೇನ ಜಾಮಾತಿಕಸಸುರಾ. ‘‘ಚಿರದಿಕ್ಖಿತಾನ’’ನ್ತಿ ದಿಕ್ಖಿತ್ವಾ ಪಬ್ಬಜಿತ್ವಾ ಚಿರಕಾಲಾನಂ ವತಸಮಾದಾನವಸೇನ ಇತೋ ಬಾಹಿರಕಾನಂ ಪಬ್ಬಜಿತಾನನ್ತಿ ಆಹ ‘‘ಚಿರಸಮಾದಿನ್ನವತಾನ’’ನ್ತಿ. ಇತೋ ಪಟಿಕ್ಕಮಾತಿ ಇತೋ ಯಥಾಠಿತಟ್ಠಾನತೋ ಅಪೇಹಿ ಅಪಕ್ಕಮ. ನ ಪಟಿಕ್ಕೂಲಸಞ್ಞಿನೋ ಗುಣೇ ಗಾರವಯೋಗತೋ. ದೇವಾ ಹಿ ಯೇಭುಯ್ಯೇನ ‘‘ಮಯಂ ಪುಬ್ಬೇ ಗುಣವನ್ತೇ ಪಯಿರುಪಾಸಿತ್ವಾ ತೇಸಂ ಓವಾದೇ ಠತ್ವಾ ಪುಞ್ಞಾನಿ ಉಪಚಿನಿತ್ವಾ ಇಧೂಪಪನ್ನಾ’’ತಿ ಗುಣವನ್ತೇಸು ಆದರಭಾವಂ ಉಪಟ್ಠಪೇನ್ತಿ.

ಅರಞ್ಞಾಯತನಇಸಿಸುತ್ತವಣ್ಣನಾ ನಿಟ್ಠಿತಾ.