೬. ಭೂಮಿಜಸುತ್ತವಣ್ಣನಾ

೨೨೩. ಆಸಞ್ಚೇಪಿ ಕರಿತ್ವಾತಿ, ‘‘ಇಮಿನಾಹಂ ಬ್ರಹ್ಮಚರಿಯೇನ ದೇವೋ ವಾ ಭವೇಯ್ಯಂ ದೇವಞ್ಞತರೋ ವಾ, ದುಕ್ಖತೋ ವಾ ಮುಚ್ಚೇಯ್ಯ’’ನ್ತಿ ಪತ್ಥನಂ ಕತ್ವಾ ಚೇಪಿ ಚರನ್ತಿ, ಅಭಬ್ಬಾ ಫಲಸ್ಸ ಅಧಿಗಮಾಯ ತಣ್ಹಾಯ ಬ್ರಹ್ಮಚರಿಯಸ್ಸ ವಿದೂಸಿತತ್ತಾತಿ ಅಧಿಪ್ಪಾಯೋ. ಅನಾಸಞ್ಚೇಪಿ ಕರಿತ್ವಾತಿ ವುತ್ತನಯೇನ ಪತ್ಥನಂ ಅಕತ್ವಾ. ಅಭಬ್ಬಾ ಫಲಸ್ಸ ಅಧಿಗಮಾಯ ಅನಿಯಮಿತಭಾವತೋ. ಪಣಿಧಾನವಸೇನ ಹಿ ಪುಞ್ಞಫಲಂ ನಿಯತಂ ನಾಮ ಹೋತಿ, ತದಭಾವತೋ ಕತಂ ಪುಞ್ಞಂ ನ ಲಭತೀತಿ ಅಧಿಪ್ಪಾಯೋ. ತತಿಯಪಕ್ಖೇ ಉಭಯಟ್ಠಾನೇಹಿ ವುತ್ತಂ, ಚತುತ್ಥಪಕ್ಖೋ ಸಮ್ಮಾವತಾರೋ ಇತಿ ಚತುಕೋಟಿಕೋ ಪಞ್ಹೋ ಜಾಲವಸೇನ ಆಹಟೋ, ತತ್ಥ ಆಸಾ ನಾಮ ಪತ್ಥನಾ, ಮಿಚ್ಛಾಗಾಹಸ್ಮಿಂ ಸತಿ ನ ವಿಪಚ್ಚತಿ, ಸಮ್ಮಾಗಾಹಸ್ಮಿಂ ಸತಿ ವಿಪಚ್ಚತಿ, ಉಭಯಥಾಪಿ ಉಭಯಾಪೇಕ್ಖಾನಾಮ, ಯೋ ಮಿಚ್ಛತ್ತಧಮ್ಮೇ ಪುರಕ್ಖತ್ವಾ ಬ್ರಹ್ಮಚರಿಯಂ ಚರತಿ, ತಸ್ಸ ಯಥಾಧಿಪ್ಪಾಯಫಲಂ ಸಮಿಜ್ಝತೀತಿ ನ ವತ್ತಬ್ಬಂ ಅಯೋನಿಸೋ ಬ್ರಹ್ಮಚರಿಯಸ್ಸ ಚಿಣ್ಣತ್ತಾ; ಯೋ ಪನ ಸಮ್ಮತ್ತಂ ಪುರಕ್ಖತ್ವಾ ಬ್ರಹ್ಮಚರಿಯಂ ಚರತಿ, ತಸ್ಸ ಯಥಾಧಿಪ್ಪಾಯಂ ಬ್ರಹ್ಮಚರಿಯಫಲಂ ನ ಸಮಿಜ್ಝತೀತಿ ನ ವತ್ತಬ್ಬಂ ಯೋನಿಸೋ ಬ್ರಹ್ಮಚರಿಯಸ್ಸ ಚಿಣ್ಣತ್ತಾ. ತೇನ ವುತ್ತಂ – ‘‘ಆಸಞ್ಚೇಪಿ ಕರಿತ್ವಾ ಅಯೋನಿಸೋ ಬ್ರಹ್ಮಚರಿಯಂ ಚರನ್ತೀ’’ತಿಆದಿ. ಸೇಸಂ ಸುವಿಞ್ಞೇಯ್ಯಮೇವ.

ಭೂಮಿಜಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.