೯. ಗೋಲಿಯಾನಿಸುತ್ತವಣ್ಣನಾ

೧೭೩. ಪದಸಮಾಚಾರೋತಿ ತಂತಂಪಚ್ಚಯಭೇದದಸ್ಸನಾಯ ವಿಗತತ್ತಾ ಪಕಾರೇಹಿ ದಲಿದ್ದಸಮಾಚಾರೋ ಸಿಥಿಲಸಮಾಚಾರೋತಿ ಅತ್ಥೋ. ಯಸ್ಮಾ ಪನ ತಾದಿಸೋ ಸಮಾಚಾರೋ ಥಿರೋ ದಳ್ಹೋ ನಾಮ ನ ಹೋತಿ, ತಸ್ಮಾ ವುತ್ತಂ ‘‘ದುಬ್ಬಲಸಮಾಚಾರೋ’’ತಿ. ‘‘ಸಾಖಸಮಾಚಾರೋ’’ತಿ ವಾ ಪಾಠೋ, ತತ್ಥ ತತ್ಥ ಲಗ್ಗನಟ್ಠೇನ ಸಾಖಾಸದಿಸಸೀಲೋತಿ ಅತ್ಥೋ. ತೇನಾಹ ‘‘ಓಳಾರಿಕಾಚಾರೋ’’ತಿ. ಪಚ್ಚಯೇಸು ಸಾಪೇಕ್ಖೋತಿ ಪಚ್ಚಯೇಸು ಸಾಪೇಕ್ಖತಾಯ ಏವ ಹಿಸ್ಸ ಓಳಾರಿಕಾಚಾರತಾ ವೇದಿತಬ್ಬಾ. ಗರುನಾ ಕಿಸ್ಮಿಞ್ಚಿ ವುತ್ತೇ ಗಾರವವಸೇನ ಪತಿಸ್ಸವನಂ ಪತಿಸ್ಸೋ, ಪತಿಸ್ಸವಚನಭೂತಂ ತಂಸಭಾಗಞ್ಚ ಯಂ ಕಿಞ್ಚಿ ಗಾರವನ್ತಿ ಅತ್ಥೋ. ಸಹ ಪತಿಸ್ಸೇನಾತಿ ಸಪ್ಪತಿಸ್ಸೇನ, ಸಪ್ಪತಿಸ್ಸವೇನ ಓವಾದಸಮ್ಪಟಿಚ್ಛನೇನ. ಪತಿಸ್ಸೀಯತೀತಿ ವಾ ಪತಿಸ್ಸೋ, ಗರುಕಾತಬ್ಬೋ, ತೇನ ಸಹ ಪತಿಸ್ಸೇನಾತಿ ಸಬ್ಬಂ ಪುಬ್ಬೇ ವಿಯ. ತೇನಾಹ ‘‘ಸಜೇಟ್ಠಕೇನಾ’’ತಿ. ಸೇರಿವಿಹಾರೋ ನಾಮ ಅತ್ತಪ್ಪಧಾನವಾಸೋ. ತೇನಾಹ ‘‘ನಿರಙ್ಕುಸವಿಹಾರೇನಾ’’ತಿ.

ಅನುಪಖಜ್ಜಾತಿ ಅನುಪಕಡ್ಢಿತ್ವಾ. ಗರುಟ್ಠಾನಿಯಾನಂ ಅನ್ತರಂ ಅನಾಪುಚ್ಛಾ ಅನುಪವಿಸಿತ್ವಾತಿ ಇಮಮತ್ಥಂ ದಸ್ಸೇತುಂ ‘‘ತತ್ಥ ಯೋ’’ತಿಆದಿ ವುತ್ತಂ.

ಆಭಿಸಮಾಚಾರಿಕನ್ತಿ ಅಭಿಸಮಾಚಾರೇ ಭವಂ. ಕಿಂ ಪನ ತನ್ತಿ ಆಹ ‘‘ವತ್ತಪಟಿಪತ್ತಿಮತ್ತಮ್ಪೀ’’ತಿ. ನಾತಿಕಾಲಸ್ಸೇವ ಸಙ್ಘಸ್ಸ ಪುರತೋ ಪವಿಸಿತಬ್ಬಂ, ನ ಪಚ್ಛಾ ಪಟಿಕ್ಕಮಿತಬ್ಬನ್ತಿ ಅಧಿಪ್ಪಾಯೇನ ಅತಿಕಾಲೇ ಚ ಗಾಮಪ್ಪವೇಸೋ ಅತಿದಿವಾ ಪಟಿಕ್ಕಮನಞ್ಚ ನಿವಾರಿತಂ, ತಂ ದಸ್ಸೇತುಂ ‘‘ನ ಅತಿಪಾತೋ’’ತಿಆದಿ ವುತ್ತಂ. ಉದ್ಧಚ್ಚಪಕತಿಕೋತಿ ವಿಬ್ಭನ್ತಚಿತ್ತೋ. ಅವಚಾಪಲ್ಯೇನಾತಿ ದಳ್ಹವಾತಾಪಹತಪಲ್ಲವಸದಿಸೇನ ಲೋಲಭಾವೇನ.

ಪಞ್ಞವತಾತಿ ಇಮಿನಾ ಭಿಕ್ಖುಸಾರುಪ್ಪೇಸು ಇತಿಕತ್ತಬ್ಬೇಸು ಉಪಾಯಪಞ್ಞಾ ಅಧಿಪ್ಪೇತಾ, ನ ಸುತಮಯಪಞ್ಞಾ. ಅಭಿಧಮ್ಮೇ ಅಭಿವಿನಯೇ ಯೋಗೋತಿ ಇಮಿನಾ ಭಾವನಾಪಞ್ಞಾಉತ್ತರಿಮನುಸ್ಸಧಮ್ಮೇ ಯೋಗೋ ಪಕಾಸಿತೋ. ಯೋಗೋತಿ ಚ ಪರಿಚಯೋ ಉಗ್ಗಣ್ಹವಸೇನ.

ಆರುಪ್ಪಾತಿ ಇಮಿನಾ ಚತಸ್ಸೋಪಿ ಅರೂಪಸಮಾಪತ್ತಿಯೋ ಗಹಿತಾ, ತಾ ಪನ ಚತೂಹಿ ರೂಪಸಮಾಪತ್ತೀಹಿ ವಿನಾ ನ ಸಮ್ಪಜ್ಜನ್ತೀತಿ ಆಹ – ‘‘ಆರುಪ್ಪಾತಿ ಏತ್ತಾವತಾ ಅಟ್ಠಪಿ ಸಮಾಪತ್ತಿಯೋ ವುತ್ತಾ ಹೋನ್ತೀ’’ತಿ. ಕಸಿಣೇತಿ ದಸವಿಧೇ ಕಸಿಣೇ. ಏಕಂ ಪರಿಕಮ್ಮಕಮ್ಮಟ್ಠಾನನ್ತಿ ಯಂ ಕಿಞ್ಚಿ ಏಕಭಾವನಾ ಪರಿಕಮ್ಮದೀಪನಂ ಖನ್ಧಕಮ್ಮಟ್ಠಾನಂ. ತೇನಾಹ ‘‘ಪಗುಣಂ ಕತ್ವಾ’’ತಿ. ಕಸಿಣಪರಿಕಮ್ಮಂ ಪನ ತಗ್ಗಹಣೇನೇವ ಗಹಿತಂ ಹೋತಿ, ಲೋಕಿಯಾ ಉತ್ತರಿಮನುಸ್ಸಧಮ್ಮಾ ಹೇಟ್ಠಾ ಗಹಿತಾತಿ ಆಹ ‘‘ಉತ್ತರಿಮನುಸ್ಸಧಮ್ಮೇತಿ ಇಮಿನಾ ಸಬ್ಬೇಪಿ ಲೋಕುತ್ತರಧಮ್ಮೇ ದಸ್ಸೇತೀ’’ತಿ. ನೇಯ್ಯಪುಗ್ಗಲಸ್ಸ ವಸೇನಾತಿ ಜಾನಿತ್ವಾ ವಿತ್ಥಾರೇತ್ವಾ ಞಾತಬ್ಬಪುಗ್ಗಲಸ್ಸ ವಸೇನಾತಿ.

ಗೋಲಿಯಾನಿಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.