೫. ಪತ್ತನಿದ್ದೇಸೋ

ಪತ್ತೋ ಚಾತಿ –

೬೦. ಅಯೋಪತ್ತೋ ಭೂಮಿಪತ್ತೋ, ಜಾತಿಯಾ ಕಪ್ಪಿಯಾ ದುವೇ;

ಉಕ್ಕಟ್ಠೋ ಮಜ್ಝಿಮೋ ಚೇವ, ಓಮಕೋ ಚ ಪಮಾಣತೋ.

೬೧. ಉಕ್ಕಟ್ಠೋ ಮಗಧೇ ನಾಳಿ-ದ್ವಯತಣ್ಡುಲಸಾಧಿತಂ;

ಗಣ್ಹಾತಿ ಓದನಂ ಸೂಪಂ, ಬ್ಯಞ್ಜನಞ್ಚ ತದೂಪಿಯಂ.

೬೨. ಮಜ್ಝಿಮೋ ತಸ್ಸುಪಡ್ಢೋವ, ತತೋಪಡ್ಢೋವ ಓಮಕೋ;

ಉಕ್ಕಟ್ಠತೋ ಚ ಉಕ್ಕಟ್ಠೋ, ಅಪತ್ತೋ ಓಮಕೋಮಕೋ.

೬೩. ಅತಿರೇಕಪತ್ತೋ ಧಾರೇಯ್ಯೋ, ದಸಾಹಪರಮಂ ಸಕೋ;

ಕಪ್ಪೋ ನಿಸ್ಸಗ್ಗಿಯೋ ಹೋತಿ, ತಸ್ಮಿಂ ಕಾಲೇತಿನಾಮಿತೇ.

೬೪. ಅಚ್ಛೇದದಾನಗಾಹೇಹಿ, ವಿಬ್ಭಮಾ ಮರಣುದ್ಧಟಾ;

ಲಿಙ್ಗಸಿಕ್ಖಾಹಿ ಛಿದ್ದೇನ, ಪತ್ತಾಧಿಟ್ಠಾನಮುಜ್ಝತಿ.

೬೫. ಪತ್ತಂ ನ ಪಟಿಸಾಮೇಯ್ಯ, ಸೋದಕಂ ನ ಚ ಓತಪೇ;

ಉಣ್ಹೇ ನ ನಿದಹೇ ಭುಮ್ಯಾ, ನ ಠಪೇ ನೋ ಚ ಲಗ್ಗಯೇ.

೬೬. ಮಿಡ್ಢನ್ತೇ ಪರಿಭಣ್ಡನ್ತೇ, ಅಙ್ಕೇ ವಾ ಆತಪತ್ತಕೇ;

ಪಾದೇಸು ಮಞ್ಚಪೀಠೇ ವಾ, ಠಪೇತುಂ ನ ಚ ಕಪ್ಪತಿ.

೬೭. ನ ನೀಹರೇಯ್ಯ ಉಚ್ಛಿಟ್ಠೋ-ದಕಞ್ಚ ಚಲಕಟ್ಠಿಕಂ;

ಪತ್ತೇನ ಪತ್ತಹತ್ಥೋ ವಾ, ಕವಾಟಂ ನ ಪಣಾಮಯೇ.

೬೮. ಭೂಮಿಆಧಾರಕೇ ದಾರುದಣ್ಡಾಧಾರೇ ಸುಸಜ್ಜಿತೇ;

ದುವೇ ಪತ್ತೇ ಠಪೇಯ್ಯೇಕಂ, ನಿಕ್ಕುಜ್ಜಿತ್ವಾನ ಭೂಮಿಯಂ.

೬೯. ದಾರುರೂಪಿಯಸೋವಣ್ಣ-ಮಣಿವೇಳುರಿಯಾಮಯಾ;

ಕಂಸಕಾಚತಿಪುಸೀಸಫಲಿಕಾತಮ್ಬಲೋಹಜಾ.

೭೦. ಛವಸೀಸಮಯೋ ಚಾಪಿ, ಘಟೀತುಮ್ಬಕಟಾಹಜಾ;

ಪತ್ತಾ ಅಕಪ್ಪಿಯಾ ಸಬ್ಬೇ, ವುತ್ತಾ ದುಕ್ಕಟವತ್ಥುಕಾತಿ.