೩೬. ಭೇಸಜ್ಜನಿದ್ದೇಸೋ

ಭೇಸಜ್ಜನ್ತಿ –

೨೭೪. ಜನಸ್ಸ ಕಾತುಂ ಭೇಸಜ್ಜಂ, ದಾತುಂ ವತ್ತುಂ ನ ಲಬ್ಭತಿ;

ಭಿಕ್ಖಾಚರಿಯವಿಞ್ಞತ್ತಿ, ಸಕೇಹಿ ಸಹಧಮ್ಮಿನಂ.

೨೭೫. ಪಿತೂನಂ ತದುಪಟ್ಠಾಕಭಿಕ್ಖುನಿಸ್ಸಿತಭಣ್ಡುನಂ;

ಲಬ್ಭಂ ಭೇಸಜ್ಜಕರಣಂ, ವೇಯ್ಯಾವಚ್ಚಕರಸ್ಸ ಚ.

೨೭೬. ಮಹಾಚೂಳಪಿತಾಮಾತಾಭಾತಾಭಗಿನಿಆದಿನಂ;

ತೇಸಂ ಸಕೇನತ್ತನಿಯೇ, ದಾತಬ್ಬಂ ತಾವಕಾಲಿಕಂ.

೨೭೭. ಕುಲದೂಸನವಿಞ್ಞತ್ತಿ, ಭೇಸಜ್ಜಕರಣಾದಿ ಹಿ;

ಮಾತಾಪಿತೂಹಿ ಸಮ್ಬನ್ಧಞಾತಕೇಸು ನ ರೂಹತಿ.

೨೭೮. ಪಿಣ್ಡಪಾತೋ ಅನಾಮಟ್ಠೋ, ಮಾತಾದೀನಮವಾರಿತೋ;

ಛನ್ನಂ ದಾಮರಿಕಚೋರಸ್ಸ, ದಾತುಮಿಸ್ಸರಿಯಸ್ಸ ಚ.

೨೭೯. ತೇಸಂ ಸುತ್ತೋದಕೇಹೇವ, ಪರಿತ್ತಂ ಕಯಿರಾ ನತ್ತನೋ;

ಭಣಿತಬ್ಬಂ ಭಣಾಪೇನ್ತೇ, ಪರಿತ್ತಂ ಸಾಸನೋಗಧಂ.

೨೮೦. ಸೀಲಂ ಧಮ್ಮಂ ಪರಿತ್ತಂ ವಾ, ಆಗನ್ತ್ವಾ ದೇತು ಭಾಸತು;

ದಾತುಂ ವತ್ತುಞ್ಚ ಲಬ್ಭತಿ, ಗನ್ತ್ವಾ ಕೇನಚಿ ಪೇಸಿತೋತಿ.