೩೪. ಪಥವೀನಿದ್ದೇಸೋ

ಪಥವೀ ಚಾತಿ –

೨೪೨. ಜಾತಾಜಾತಾತಿ ದುವಿಧಾ, ಸುದ್ಧಮತ್ತಿಕಪಂಸುಕಾ;

ಜಾತಾದಡ್ಢಾ ಚ ಪಥವೀ, ಬಹುಮತ್ತಿಕಪಂಸುಕಾ;

ಚಾತುಮಾಸಾಧಿಕೋವಟ್ಠಪಂಸುಮತ್ತಿಕರಾಸಿ ಚ.

೨೪೩. ಸುದ್ಧಸಕ್ಖರಪಾಸಾಣಮರುಮ್ಬಕಥಲವಾಲುಕಾ;

ದಡ್ಢಾ ಚ ಭೂಮಿ ಯೇಭುಯ್ಯಸಕ್ಖರಾದಿಮಹೀಪಿ ಚ;

ದುತಿಯಾ ವುತ್ತರಾಸಿ ಚ, ಚಾತುಮಾಸೋಮವಟ್ಠಕೋ.

೨೪೪. ದ್ವೇ ಭಾಗಾ ತೀಸು ಭಾಗೇಸು, ಮತ್ತಿಕಾ ಯಸ್ಸ ಭೂಮಿಯಾ;

ಯೇಭುಯ್ಯಮತ್ತಿಕಾ ಏಸಾ, ಸೇಸೇಸುಪಿ ಅಯಂ ನಯೋ.

೨೪೫. ಪಾಚಿತ್ತಿ ಖಣನೇ ಜಾತೇ, ಜಾತಸಞ್ಞಿಸ್ಸ ದುಕ್ಕಟಂ;

ದ್ವೇಳ್ಹಸ್ಸಾಜಾತಸಞ್ಞಿಸ್ಸ, ನಾಪತ್ತಾಣಾಪನೇ ತಥಾ.

೨೪೬. ಪಹಾರೇ ಪಹಾರಾಪತ್ತಿ, ಖಣಮಾನಸ್ಸ ಅತ್ತನಾ;

ಏಕಾಯಾಣತ್ತಿಯಾ ಏಕಾ, ನಾನಾಣತ್ತೀಸು ವಾಚಸೋ.

೨೪೭. ‘‘ಇಮಂ ಠಾನಮಿಮಂ ಕನ್ದಮಿಧ ವಾಪಿಂ ಖಣೇತ್ಥ ಚ;

ಜಾಲೇಹಗ್ಗಿ’’ನ್ತಿ ವಾ ವತ್ತುಂ, ನಿಯಮೇತ್ವಾ ನ ವಟ್ಟತಿ.

೨೪೮. ‘‘ಥಮ್ಭಸ್ಸಿಮಸ್ಸಾವಾಟಂ ವಾ, ಮತ್ತಿಕಂ ಜಾನ ಮಾಹರ;

ಕರೋಹಿ ಕಪ್ಪಿಯಞ್ಚೇ’’ತಿ, ವಚನಂ ವಟ್ಟತೇದಿಸಂ.

೨೪೯. ಅಸಮ್ಬದ್ಧಂ ಪಥವಿಯಾ, ಸುಕ್ಖಕದ್ದಮಆದಿಕಂ;

ಕೋಪೇತುಂ ತನುಕಂ ಲಬ್ಭಮುಸ್ಸಿಞ್ಚನೀಯಕದ್ದಮಂ.

೨೫೦. ಗಣ್ಡುಪ್ಪಾದಂ ಉಪಚಿಕಾಮತ್ತಿಕಂ ಮೂಸಿಕುಕ್ಕಿರಂ;

ಚಾತುಮಾಸಾಧಿಕೋವಟ್ಠಂ, ಲೇಡ್ಡಾದಿಞ್ಚ ನ ಕೋಪಯೇ.

೨೫೧. ಪತಿತೇ ವಾಪಿಆದೀನಂ, ಕೂಲೇ ಉದಕಸನ್ತಿಕೇ;

ಪಾಸಾಣೇ ಚ ರಜೇ ಲಗ್ಗೇ, ಪತಿತೇ ನವಸೋಣ್ಡಿಯಾ.

೨೫೨. ವಮ್ಮಿಕೇ ಮತ್ತಿಕಾಕುಟ್ಟೇ, ಅಬ್ಭೋಕಾಸುಟ್ಠಿತೇ ತಥಾ;

ಯೇಭುಯ್ಯಕಥಲಟ್ಠಾನೇ, ತಿಟ್ಠತಿಟ್ಠಕಕುಟ್ಟಕೋ.

೨೫೩. ಥಮ್ಭಾದಿಂ ಗಣ್ಹಿತುಂ ಭೂಮಿಂ, ಸಞ್ಚಾಲೇತ್ವಾ ವಿಕೋಪಯಂ;

ಧಾರಾಯ ಭಿನ್ದಿತುಂ ಭೂಮಿಂ, ಕಾತುಂ ವಾ ವಿಸಮಂ ಸಮಂ.

೨೫೪. ಸಮ್ಮುಞ್ಜನೀಹಿ ಘಂಸಿತುಂ, ಕಣ್ಟಕಾದಿಂ ಪವೇಸಿತುಂ;

ದಸ್ಸೇಸ್ಸಾಮೀತಿ ಭಿನ್ದನ್ತೋ, ಭೂಮಿಂ ಚಙ್ಕಮಿತುಂ ಪದಂ.

೨೫೫. ಘಂಸಿತುಂ ಅಙ್ಗಪಚ್ಚಙ್ಗಂ, ಕಣ್ಡುರೋಗೀ ತಟಾದಿಸು;

ಹತ್ಥಂ ವಾ ಧೋವಿತುಂ ಭೂಮಿಂ, ಘಂಸಿತುಂ ನ ಚ ಕಪ್ಪತಿ.

೨೫೬. ಥಮ್ಭಾದಿಉಜುಕುದ್ಧಾರೋ, ಪಾಸಾಣಾದಿಪವಟ್ಟನಂ;

ಸಾಖಾದಿಕಡ್ಢನಂ ರುಕ್ಖಲತಾಚ್ಛೇದನಫಾಲನಂ.

೨೫೭. ಸೇಕೋ ಪಸ್ಸಾವಆದೀನಂ, ಸುದ್ಧಚಿತ್ತಸ್ಸ ವಟ್ಟತಿ;

ಅಲ್ಲಹತ್ಥಂ ಠಪೇತ್ವಾನ, ರಜಗ್ಗಾಹೋ ಚ ಭೂಮಿಯಾ.

೨೫೮. ಅಗ್ಗಿಸ್ಸ ಅನುಪಾದಾನೇ, ಕಪಾಲೇ ಇಟ್ಠಕಾಯ ವಾ;

ಪಾತೇತುಂ ಲಬ್ಭತೇ ಅಗ್ಗಿಂ, ಭೂಮಿಯಂ ವಾವಸೇ ಸತೀತಿ.