೩. ಚೀವರನಿದ್ದೇಸೋ

ಚೀವರನ್ತಿ –

೩೦. ಖೋಮಕೋಸೇಯ್ಯಕಪ್ಪಾಸ-ಸಾಣಭಙ್ಗಾನಿ ಕಮ್ಬಲಂ;

ಕಪ್ಪಿಯಾನಿ ಛಳೇತಾನಿ, ಸಾನುಲೋಮಾನಿ ಜಾತಿತೋ.

೩೧. ದುಕೂಲಞ್ಚೇವ ಪಟ್ಟುಣ್ಣ-ಪಟಂ ಸೋಮಾರಚೀನಜಂ;

ಇದ್ಧಿಜಂ ದೇವದಿನ್ನಞ್ಚ, ತಸ್ಸ ತಸ್ಸಾನುಲೋಮಿಕಂ.

೩೨. ತಿಚೀವರಂ ಪರಿಕ್ಖಾರ-ಚೋಳಂ ವಸ್ಸಿಕಸಾಟಿಕಂ;

ಅಧಿಟ್ಠೇ ನ ವಿಕಪ್ಪೇಯ್ಯ, ಮುಖಪುಞ್ಛನನಿಸೀದನಂ.

೩೩. ಪಚ್ಚತ್ಥರಣಕಂ ಕಣ್ಡು-ಚ್ಛಾದಿಮೇತ್ಥ ತಿಚೀವರಂ;

ನ ವಸೇಯ್ಯ ವಿನೇಕಾಹಂ, ಚಾತುಮಾಸಂ ನಿಸೀದನಂ.

೩೪. ‘‘ಇಮಂ ಸಙ್ಘಾಟಿಂಧಿಟ್ಠಾಮಿ’’, ಸಙ್ಘಾಟಿಮಿಚ್ಚಧಿಟ್ಠಯೇ;

ಅಹತ್ಥಪಾಸಮೇತನ್ತಿ, ಸೇಸೇಸುಪಿ ಅಯಂ ನಯೋ.

೩೫. ಅಧಿಟ್ಠಹನ್ತೋ ಸಙ್ಘಾಟಿ-ಪ್ಪಭುತಿಂ ಪುಬ್ಬಚೀವರಂ;

ಪಚ್ಚುದ್ಧರಿತ್ವಾಧಿಟ್ಠೇಯ್ಯ, ಪತ್ತಾಧಿಟ್ಠಹನೇ ತಥಾ.

೩೬. ಏತಂ ಇಮಂ ವ ಸಙ್ಘಾಟಿಂ, ಸಂಸೇ ಪಚ್ಚುದ್ಧರಾಮಿತಿ;

ಏವಂ ಸಬ್ಬಾನಿ ನಾಮೇನ, ವತ್ವಾ ಪಚ್ಚುದ್ಧರೇ ವಿದೂ.

೩೭. ಸಙ್ಘಾಟಿ ಪಚ್ಛಿಮನ್ತೇನ, ದೀಘಸೋ ಮುಟ್ಠಿಪಞ್ಚಕೋ;

ಉತ್ತಮನ್ತೇನ ಸುಗತ-ಚೀವರೂನಾಪಿ ವಟ್ಟತಿ.

೩೮. ಮುಟ್ಠಿತ್ತಿಕಞ್ಚ ತಿರಿಯಂ, ತಥಾ ಏಕಂಸಿಕಸ್ಸಪಿ;

ಅನ್ತರವಾಸಕೋ ಚಾಪಿ, ದೀಘಸೋ ಮುಟ್ಠಿಪಞ್ಚಕೋ;

ಅಡ್ಢತೇಯ್ಯೋ ದ್ವಿಹತ್ಥೋ ವಾ, ತಿರಿಯನ್ತೇನ ವಟ್ಟತಿ.

೩೯. ನಿಸೀದನಸ್ಸ ದೀಘೇನ, ವಿದತ್ಥಿ ದ್ವೇ ವಿಸಾಲತೋ;

ದಿಯಡ್ಢಂ ದಸಾ ವಿದತ್ಥಿ, ಸುಗತಸ್ಸ ವಿದತ್ಥಿಯಾ.

೪೦. ಕಣ್ಡುಪ್ಪಟಿಚ್ಛಾದಿಕಸ್ಸ, ತಿರಿಯಂ ದ್ವೇ ವಿದತ್ಥಿಯೋ;

ದೀಘನ್ತತೋ ಚತಸ್ಸೋವ, ಸುಗತಸ್ಸ ವಿದತ್ಥಿಯಾ.

೪೧. ವಸ್ಸಿಕಸಾಟಿಕಾಯಾಪಿ, ದೀಘಸೋ ಛ ವಿದತ್ಥಿಯೋ;

ತಿರಿಯಂ ಅಡ್ಢತೇಯ್ಯಾವ, ಸುಗತಸ್ಸ ವಿದತ್ಥಿಯಾ.

೪೨. ಏತ್ಥ ಛೇದನಪಾಚಿತ್ತಿ, ಕರೋನ್ತಸ್ಸ ತದುತ್ತರಿ;

ಪಚ್ಚತ್ಥರಣ ಮುಖಚೋಳಾ, ಆಕಙ್ಖಿತಪ್ಪಮಾಣಿಕಾ.

೪೩. ಪರಿಕ್ಖಾರಚೋಳೇ ಗಣನಾ, ಪಮಾಣಂ ವಾ ನ ದೀಪಿತಂ;

ತಥಾ ವತ್ವಾ ಅಧಿಟ್ಠೇಯ್ಯ, ಥವಿಕಾದಿಂ ವಿಕಪ್ಪಿಯಂ.

೪೪. ಅಹತಾಹತಕಪ್ಪಾನಂ, ಸಙ್ಘಾಟಿ ದಿಗುಣಾ ಸಿಯಾ;

ಏಕಚ್ಚಿಯೋತ್ತರಾಸಙ್ಗೋ, ತಥಾ ಅನ್ತರವಾಸಕೋ.

೪೫. ಉತುದ್ಧಟಾನ ದುಸ್ಸಾನಂ, ಸಙ್ಘಾಟಿ ಚ ಚತುಗ್ಗುಣಾ;

ಭವೇಯ್ಯುಂ ದಿಗುಣಾ ಸೇಸಾ, ಪಂಸುಕೂಲೇ ಯಥಾರುಚಿ.

೪೬. ತೀಸು ದ್ವೇ ವಾಪಿ ಏಕಂ ವಾ, ಛಿನ್ದಿತಬ್ಬಂ ಪಹೋತಿ ಯಂ;

ಸಬ್ಬೇಸು ಅಪ್ಪಹೋನ್ತೇಸು, ಅನ್ವಾಧಿಮಾದಿಯೇಯ್ಯ ವಾ;

ಅಚ್ಛಿನ್ನಞ್ಚ ಅನಾದಿಣ್ಣಂ, ನ ಧಾರೇಯ್ಯ ತಿಚೀವರಂ.

೪೭. ಗಾಮೇ ನಿವೇಸನೇ ಉದ್ದೋ-ಸಿತಪಾಸಾದಹಮ್ಮಿಯೇ;

ನಾವಾಟ್ಟಮಾಳಆರಾಮೇ, ಸತ್ಥಖೇತ್ತಖಲೇ ದುಮೇ.

೪೮. ಅಜ್ಝೋಕಾಸೇ ವಿಹಾರೇ ವಾ, ನಿಕ್ಖಿಪಿತ್ವಾ ತಿಚೀವರಂ;

ಭಿಕ್ಖುಸಮ್ಮುತಿಯಾಞ್ಞತ್ರ, ವಿಪ್ಪವತ್ಥುಂ ನ ವಟ್ಟತಿ.

೪೯. ರೋಗವಸ್ಸಾನಪರಿಯನ್ತಾ, ಕಣ್ಡುಚ್ಛಾದಿಕಸಾಟಿಕಾ;

ತತೋ ಪರಂ ವಿಕಪ್ಪೇಯ್ಯ, ಸೇಸಾ ಅಪರಿಯನ್ತಿಕಾ.

೫೦. ಪಚ್ಚತ್ಥರಣ ಪರಿಕ್ಖಾರ-ಮುಖಪುಞ್ಛನಚೋಳಕಂ;

ದಸಂ ಪ್ಯರತ್ತನಾದಿಣ್ಣಕಪ್ಪಂ ಲಬ್ಭಂ ನಿಸೀದನಂ.

೫೧. ಅದಸಂ ರಜಿತಂಯೇವ, ಸೇಸಚೀವರಪಞ್ಚಕಂ;

ಕಪ್ಪತಾದಿಣ್ಣಕಪ್ಪಂವ, ಸದಸಂವ ನಿಸೀದನಂ.

೫೨. ಅನಧಿಟ್ಠಿತನಿಸ್ಸಟ್ಠಂ, ಕಪ್ಪೇತ್ವಾ ಪರಿಭುಞ್ಜಯೇ;

ಹತ್ಥದೀಘಂ ತತೋಪಡ್ಢ-ವಿತ್ಥಾರಞ್ಚ ವಿಕಪ್ಪಿಯಂ.

೫೩. ತಿಚೀವರಸ್ಸ ಭಿಕ್ಖುಸ್ಸ, ಸಬ್ಬಮೇತಂ ಪಕಾಸಿತಂ;

ಪರಿಕ್ಖಾರಚೋಳಿಯೋ ಸಬ್ಬಂ, ತಥಾ ವತ್ವಾ ಅಧಿಟ್ಠತಿ.

೫೪. ಅಚ್ಛೇದವಿಸ್ಸಜ್ಜನಗಾಹವಿಬ್ಭಮಾ,

ಪಚ್ಚುದ್ಧರೋ ಮಾರಣಲಿಙ್ಗಸಿಕ್ಖಾ;

ಸಬ್ಬೇಸ್ವಧಿಟ್ಠಾನವಿಯೋಗಕಾರಣಾ,

ವಿನಿವಿದ್ಧಛಿದ್ದಞ್ಚ ತಿಚೀವರಸ್ಸ.

೫೫. ಕುಸವಾಕಫಲಕಾನಿ, ಕಮ್ಬಲಂ ಕೇಸವಾಲಜಂ;

ಥುಲ್ಲಚ್ಚಯಂ ಧಾರಯತೋಲೂಕಪಕ್ಖಾಜಿನಕ್ಖಿಪೇ.

೫೬. ಕದಲೇರಕಕ್ಕದುಸ್ಸೇ, ಪೋತ್ಥಕೇ ಚಾಪಿ ದುಕ್ಕಟಂ;

ಸಬ್ಬನೀಲಕಮಞ್ಜೇಟ್ಠ-ಪೀತಲೋಹಿತಕಣ್ಹಕೇ.

೫೭. ಮಹಾರಙ್ಗಮಹಾನಾಮ-ರಙ್ಗರತ್ತೇ ತಿರೀಟಕೇ;

ಅಚ್ಛಿನ್ನದೀಘದಸಕೇ, ಫಲಪುಪ್ಫದಸೇ ತಥಾ;

ಕಞ್ಚುಕೇ ವೇಠನೇ ಸಬ್ಬಂ, ಲಭತಿಚ್ಛಿನ್ನಚೀವರೋತಿ.