೨೮. ಕಮ್ಮನಿದ್ದೇಸೋ

ಕಮ್ಮಞ್ಚಾತಿ –

೧೯೯. ವಗ್ಗೇನ ಅಧಮ್ಮಕಮ್ಮಂ, ಸಮಗ್ಗೇನ ಅಧಮ್ಮಿಕಂ;

ವಗ್ಗೇನ ಧಮ್ಮಕಮ್ಮಞ್ಚ, ಸಮಗ್ಗೇನ ಚ ಧಮ್ಮಿಕಂ;

ಚತುತ್ಥಂಯೇವಾನುಞ್ಞಾತಂ, ಸೇಸಕಮ್ಮೇಸು ದುಕ್ಕಟಂ.

೨೦೦. ಚತುವಗ್ಗೋ ಪಞ್ಚವಗ್ಗೋ, ದಸವೀಸತಿವಗ್ಗಿಕೋ;

ತಿರೇಕವೀಸತಿವಗ್ಗೋ, ಪಞ್ಚ ಸಙ್ಘಾ ವಿಭಾವಿತಾ.

೨೦೧. ಚತುವಗ್ಗೇತ್ಥ ಅಬ್ಭಾನು-ಪಸಮ್ಪದಾಪವಾರಣಾ;

ಪಞ್ಚವಗ್ಗೋ ಚ ಅಬ್ಭಾನಂ, ಮಜ್ಝದೇಸುಪಸಮ್ಪದಂ.

೨೦೨. ದಸವಗ್ಗೋ ಚ ಅಬ್ಭಾನಂ, ಠಪೇತ್ವಾ ಸಬ್ಬಕಮ್ಮಿಕೋ;

ಇತರೋ ಸಬ್ಬಕಮ್ಮೇಸು, ಕಮ್ಮಪ್ಪತ್ತೋತಿ ದೀಪಿತೋ.

೨೦೩. ಚತುವಗ್ಗೇನ ಕತ್ತಬ್ಬೇ, ಚತ್ತಾರೋ ಪಕತತ್ತಕಾ;

ಕಮ್ಮಪ್ಪತ್ತಾ ಪರೇ ಛನ್ದಾ-ರಹಾ ಸೇಸೇಪ್ಯಯಂ ನಯೋ.

೨೦೪. ಚತುವಗ್ಗಾದಿಕತ್ತಬ್ಬಂ, ಅಸಂವಾಸಕಮ್ಮಾರಹ;

ಗರುಕಟ್ಠೇಸ್ವಞ್ಞತರಂ, ಕತ್ವಾನ ಗಣಪೂರಕಂ;

ಪರಿವಾಸಾದಿಕಂ ಕಮ್ಮಂ, ಕತಂ ಕುಪ್ಪಞ್ಚ ದುಕ್ಕಟಂ.

೨೦೫. ಅಧಮ್ಮಕಮ್ಮಂ ವಾರೇಯ್ಯ, ಅನ್ತರಾಯೇ ದುವೇ ತಯೋ;

ದಿಟ್ಠಾವಿಮೇಕೋಧಿಟ್ಠಾನಂ, ವಾರೇನ್ತೇವ ತತೋಧಿಕಾ.

೨೦೬. ಕಮ್ಮಾರಹಾ ಅಸಂವಾಸಾ, ಖಿತ್ತಚಿತ್ತದುಖಟ್ಟಿತಾ;

ಏತೇಸಂ ಸಙ್ಘಮಜ್ಝಮ್ಹಿ, ಪಟಿಕ್ಖೇಪೋ ನ ರುಹತಿ.

೨೦೭. ಪಕತತ್ತೇಕಸೀಮಟ್ಠ-ಸಮಸಂವಾಸಭಿಕ್ಖುನೋ;

ಆರೋಚೇನ್ತಸ್ಸನ್ತಮಸೋ-ನನ್ತರಸ್ಸಾಪಿ ರೂಹತಿ.

೨೦೮. ಕೋಪೇತುಂ ಧಮ್ಮಿಕಂ ಕಮ್ಮಂ, ಪಟಿಕ್ಕೋಸೇಯ್ಯ ಸಮ್ಮುಖಾ;

ತಿರೋಕ್ಖಾ ಕಾಯಸಾಮಗ್ಗಿಂ, ಛನ್ದಂ ನೋ ದೇಯ್ಯ ದುಕ್ಕಟನ್ತಿ.