೨೨. ಉಪಾಹನನಿದ್ದೇಸೋ

ಉಪಾಹನಾ ಚೇವಾತಿ –

೧೭೫. ಮಜ್ಝದೇಸೇ ನ ಕಪ್ಪನ್ತಿ, ಗಣಙ್ಗಣೂಪಾಹನಾ ನವಾ;

ಸಬ್ಬಸ್ಸ ಕಪ್ಪನ್ತಾರಾಮೇ, ಸಬ್ಬತ್ಥಾಕಲ್ಲಕಸ್ಸ ಚ.

೧೭೬. ಸಬ್ಬನೀಲಕಓದಾತಪೀತಲೋಹಿತಕಣ್ಹಕಾ;

ಮಹಾರಙ್ಗಮಹಾನಾಮ-ರಙ್ಗರತ್ತಾ ಚುಪಾಹನಾ.

೧೭೭. ಸಬ್ಬಮಞ್ಜೇಟ್ಠಿಕಾ ಚಿತ್ರಾ, ನೀಲಪೀತಾದಿವದ್ಧಿಕಾ;

ತಿತ್ತಿರಪತ್ತಿಕಾ ಮೇಣ್ಡ-ಅಜವಿಸಾಣವದ್ಧಿಕಾ.

೧೭೮. ಖಲ್ಲಬದ್ಧಾ ಪುಟಬದ್ಧಾ, ತೂಲಪುಣ್ಣಾ ಚುಪಾಹನಾ;

ಪಾಲಿಗುಣ್ಠಿಮಕಾ ಮೋರ-ಪಿಞ್ಛೇನ ಪರಿಸಿಬ್ಬಿತಾ.

೧೭೯. ವಿಚ್ಛಿಕಾಳಿಕತಾ ಸೀಹಬ್ಯಗ್ಘುದ್ದಾಜಿನದೀಪಿನಂ;

ಮಜ್ಜಾರಕಾಳಕೋಲೂಕಚಮ್ಮೇಹಿ ಚ ಪರಿಕ್ಖಟಾ;

ಪಾದುಕಾ ಸಙ್ಕಮನೀಯಾ, ಕೋಚಿ ಧಾರೇಯ್ಯ ದುಕ್ಕಟಂ.

೧೮೦. ನೀಲಾದಿವಣ್ಣಂ ಸಕಲಂ, ಪುಞ್ಛಿತ್ವಾ ವೇಕದೇಸಕಂ;

ಉಪಾಹನಾ ವಳಞ್ಜೇಯ್ಯ, ಹಾರೇತ್ವಾ ಖಲ್ಲಕಾದಿಕನ್ತಿ.