೧೬. ವಚ್ಚಪಸ್ಸಾವಟ್ಠಾನಿಕನಿದ್ದೇಸೋ

ವಚ್ಚಪಸ್ಸಾವಟ್ಠಾನಿಕನ್ತಿ –

೧೫೬. ನ ಕರೇಯ್ಯ ಯಥಾವುಡ್ಢಂ, ವಚ್ಚಂ ಯಾತಾನುಪುಬ್ಬಿಯಾ;

ವಚ್ಚಪಸ್ಸಾವಕುಟಿಯೋ, ನ್ಹಾನತಿತ್ಥಞ್ಚ ಲಬ್ಭತಿ.

೧೫೭. ಪವಿಸೇಯ್ಯುಬ್ಭಜಿತ್ವಾ ನೋ, ಸಹಸಾ ಪವಿಸೇಯ್ಯ ಚ;

ಉಕ್ಕಾಸಿತ್ವಾವುಬ್ಭಜೇಯ್ಯ, ಪಾದುಕಾಸ್ವೇವ ಸಣ್ಠಿತೋ.

೧೫೮. ನ ಕರೇ ನಿತ್ಥುನಂ ವಚ್ಚಂ, ದನ್ತಕಟ್ಠಞ್ಚ ಖಾದಯಂ;

ವಚ್ಚಪಸ್ಸಾವದೋಣೀನಂ, ನ ಕರೇಯ್ಯುಭಯಂ ಬಹಿ.

೧೫೯. ಕೂಪೇ ಕಟ್ಠಂ ನ ಪಾತೇಯ್ಯ, ಖೇಳಂ ಪಸ್ಸಾವದೋಣಿಯಾ;

ನಾವಲೇಖೇಯ್ಯ ಫರುಸೇ-ನುಹತಞ್ಚಾಪಿ ಧೋವಯೇ.

೧೬೦. ನ ನಿಕ್ಖಮೇಯ್ಯ ಸಹಸಾ-ವುಬ್ಭಜಿತ್ವಾ ನ ನಿಕ್ಖಮೇ;

ಚಪು ಚಪು ನಾಚಮೇಯ್ಯ, ಉಕ್ಲಾಪಞ್ಚ ವಿಸೋಧಯೇತಿ.