೧. ಪಾರಾಜಿಕನಿದ್ದೇಸೋ

ಪಾರಾಜಿಕಾ ಚ ಚತ್ತಾರೋತಿ –

೧. ಮಗ್ಗತ್ತಯೇ ಅನಿಕ್ಖಿತ್ತಸಿಕ್ಖೋ ಸನ್ಥತಸನ್ಥತೇ;

ಅಲ್ಲೋಕಾಸೇ ನಿಮಿತ್ತಂ ಸಂ, ತಿಲಮತ್ತಮ್ಪಿ ಸನ್ಥತಂ.

೨. ಅಸನ್ಥತಮುಪಾದಿಣ್ಣಂ, ಪವೇಸನ್ತೋ ಚುತೋಥ ವಾ;

ಪವೇಸನಟ್ಠಿತುದ್ಧಾರಪವಿಟ್ಠಕ್ಖಣಸಾದಕೋ.

೩. ಆದಿಯೇಯ್ಯ ಹರೇಯ್ಯಾವಹರೇಯ್ಯ ಇರಿಯಾಪಥಂ;

ಕೋಪೇಯ್ಯ ಠಾನಾ ಚಾವೇಯ್ಯ, ಸಙ್ಕೇತಂ ವೀತಿನಾಮಯೇ.

೪. ಅದಿನ್ನಂ ಥೇಯ್ಯಚಿತ್ತೇನ, ಭವೇ ಪಾರಾಜಿಕೋಥ ವಾ;

ಥೇಯ್ಯಾಬಲಕುಸಚ್ಛನ್ನಪರಿಕಪ್ಪಾವಹಾರಕೋ;

ಭಣ್ಡಕಾಲಗ್ಘದೇಸೇಹಿ, ಪರಿಭೋಗೇತ್ಥ ನಿಚ್ಛಯೋ.

೫. ಮನುಸ್ಸವಿಗ್ಗಹಂ ಚಿಚ್ಚ, ಜೀವಿತಾ ವಾ ವಿಯೋಜಯೇ;

ಸತ್ಥಹಾರಕಂ ವಾಸ್ಸ ಮರಣಚೇತನೋ ಉಪನಿಕ್ಖಿಪೇ.

೬. ಗಾಹೇಯ್ಯ ಮರಣೂಪಾಯಂ, ವದೇಯ್ಯ ಮರಣೇ ಗುಣಂ;

ಚುತೋ ಪಯೋಗಾ ಸಾಹತ್ಥಿನಿಸ್ಸಗ್ಗಾಣತ್ತಿಥಾವರಾ.

೭. ಇದ್ಧಿವಿಜ್ಜಾಮಯಾ ಕಾಲವತ್ಥಾವುಧಿರಿಯಾಪಥಾ;

ಕ್ರಿಯಾವಿಸೇಸೋ ಓಕಾಸೋ, ಛ ಆಣತ್ತಿನಿಯಾಮಕಾ.

೮. ಝಾನಾದಿಭೇದ ನೋಸನ್ತಮತ್ತನತ್ತುಪನಾಯಿಕಂ;

ಕತ್ವಾ ಕೋಟ್ಠಾಸಮೇಕೇಕಂ, ಪಚ್ಚುಪ್ಪನ್ನಭವಸ್ಸಿತಂ.

೯. ಅಞ್ಞಾಪದೇಸರಹಿತಂ, ದೀಪೇನ್ತೋನಧಿಮಾನಿಕೋ;

ಕಾಯೇನ ವಾಚಾ ವಿಞ್ಞತ್ತಿ-ಪಥೇ ಞಾತೇ ಚುತೋ ಭವೇ.

೧೦. ಪಾರಾಜಿಕೇತೇ ಚತ್ತಾರೋ, ಅಸಂವಾಸಾ ಯಥಾ ಪುರೇ;

ಅಭಬ್ಬಾ ಭಿಕ್ಖುಭಾವಾಯ, ಸೀಸಚ್ಛಿನ್ನೋವ ಜೀವಿತುಂ.

೧೧. ಪರಿಯಾಯೋ ಚ ಆಣತ್ತಿ, ತತಿಯೇ ದುತಿಯೇ ಪನ;

ಆಣತ್ತಿಯೇವ ಸೇಸೇಸು, ದ್ವಯಮೇತಂ ನ ಲಬ್ಭತಿ.

೧೨. ಸೇವೇತುಕಾಮತಾಚಿತ್ತಂ, ಮಗ್ಗೇ ಮಗ್ಗಪ್ಪವೇಸನಂ;

ಇಮಂ ಮೇಥುನಧಮ್ಮಸ್ಸ, ಆಹು ಅಙ್ಗದ್ವಯಂ ಬುಧಾ.

೧೩. ಮನುಸ್ಸಸಂ ತಥಾಸಞ್ಞೀ, ಥೇಯ್ಯಚಿತ್ತಞ್ಚ ವತ್ಥುನೋ;

ಗರುತಾ ಅವಹಾರೋ ಚ, ಅದಿನ್ನಾದಾನಹೇತುಯೋ.

೧೪. ಪಾಣೋ ಮಾನುಸ್ಸಕೋ ಪಾಣ-ಸಞ್ಞಿತಾ ಘಾತಚೇತನಾ;

ಪಯೋಗೋ ತೇನ ಮರಣಂ, ಪಞ್ಚೇತೇ ವಧಹೇತುಯೋ.

೧೫. ಅಸನ್ತತಾ ಅತ್ತನಿ ಪಾಪಮಿಚ್ಛತಾ-

ಯಾರೋಚನಾ ತಸ್ಸ ಮನುಸ್ಸಜಾತಿತಾ;

ನಾಞ್ಞಾಪದೇಸೋ ಚ ತದೇವ ಜಾನನಂ,

ಪಞ್ಚೇತ್ಥ ಅಙ್ಗಾನಿ ಅಸನ್ತದೀಪನೇ.

೧೬. ಅಸಾಧಾರಣಾ ಚತ್ತಾರೋ, ಭಿಕ್ಖುನೀನಮಭಬ್ಬಕಾ;

ಏಕಾದಸ ಚ ವಿಬ್ಭನ್ತಾ, ಭಿಕ್ಖುನೀ ಮುದುಪಿಟ್ಠಿಕೋ.

೧೭. ಲಮ್ಬೀ ಮುಖೇನ ಗಣ್ಹನ್ತೋ, ಅಙ್ಗಜಾತಂ ಪರಸ್ಸ ಚ;

ತತ್ಥೇವಾಭಿನಿಸೀದನ್ತೋ, ಚತ್ತಾರೋ ಅನುಲೋಮಿಕಾ.

೧೮. ಮಗ್ಗೇ ಮಗ್ಗಪ್ಪವೇಸನಾ, ಮೇಥುನಸ್ಸ ಇಧಾಗತಾ;

ಚತ್ತಾರೋತಿ ಚತುಬ್ಬೀಸ, ಸಮೋಧಾನಾ ಪರಾಜಿಕಾತಿ.