೧. ಸಪ್ಪಿವಿಞ್ಞಾಪನಸಿಕ್ಖಾಪದವಣ್ಣನಾ

ಪಾಟಿದೇಸನೀಯೇಸು ಪಠಮೇ ಸಪ್ಪಿನ್ತಿ ಪುಬ್ಬೇ ವುತ್ತವಿನಿಚ್ಛಯಂ ಪಾಳಿಆಗತಂ (ಪಾಚಿ. ೧೨೩೦) ಗೋಸಪ್ಪಿಆದಿಮೇವ. ವಿಞ್ಞಾಪೇತ್ವಾ ಭುಞ್ಜೇಯ್ಯಾತಿ ಏತ್ಥ ‘‘ವಿಞ್ಞತ್ತಿಯಾ ಪಟಿಲದ್ಧಂ ಭುಞ್ಜಿಸ್ಸಾಮೀ’’ತಿ ಗಹಣೇ ದುಕ್ಕಟಂ, ಗಹಿತಸ್ಸ ಅಜ್ಝೋಹಾರೇ ಅಜ್ಝೋಹಾರೇ ಪಾಟಿದೇಸನೀಯಂ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಸಪ್ಪಿಂ ವಿಞ್ಞಾಪೇತ್ವಾ ಭುಞ್ಜನವತ್ಥುಸ್ಮಿಂ ಪಞ್ಞತ್ತಂ, ‘‘ಅಗಿಲಾನಾ’’ತಿ ಅಯಮೇತ್ಥ ಅನುಪಞ್ಞತ್ತಿ, ತಿಕಪಾಟಿದೇಸನೀಯಂ, ಗಿಲಾನಾಯ ದ್ವಿಕದುಕ್ಕಟಂ. ಯಾ ಪನ ಗಿಲಾನಾ ಗಿಲಾನಸಞ್ಞಾ, ಗಿಲಾನಕಾಲೇ ವಾ ವಿಞ್ಞಾಪೇತ್ವಾ ಪಚ್ಛಾ ಅಗಿಲಾನಾ ಹುತ್ವಾ ಭುಞ್ಜತಿ, ಗಿಲಾನಾಯ ವಾ ಸೇಸಕಂ, ಞಾತಕಪ್ಪವಾರಿತಟ್ಠಾನತೋ ವಾ ವಿಞ್ಞತ್ತಂ, ಅಞ್ಞಸ್ಸ ವಾ ಅತ್ಥಾಯ, ಅತ್ತನೋ ವಾ ಧನೇನ ಗಹಿತಂ ಭುಞ್ಜತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ವುತ್ತಲಕ್ಖಣಸಪ್ಪಿತಾ, ಅನುಞ್ಞಾತಕಾರಣಾಭಾವೋ, ವಿಞ್ಞತ್ತಿ, ಅಜ್ಝೋಹಾರೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಅದ್ಧಾನಸದಿಸಾನೀತಿ.

ಸಪ್ಪಿವಿಞ್ಞಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ.