೯. ನಾನುಬನ್ಧನಸಿಕ್ಖಾಪದವಣ್ಣನಾ

ನವಮೇ ವುಟ್ಠಾಪಿತಂ ಪವತ್ತಿನಿನ್ತಿ ವುಟ್ಠಾಪಿತಂ ಪವತ್ತಿನಿಂ ಯಾಯ ಉಪಸಮ್ಪಾದಿತಾ, ತಂ ಉಪಜ್ಝಾಯಿನಿನ್ತಿ ಅತ್ಥೋ. ನಾನುಬನ್ಧೇಯ್ಯಾತಿ ಚುಣ್ಣೇನ ಮತ್ತಿಕಾಯ ದನ್ತಕಟ್ಠೇನ ಮುಖೋದಕೇನಾತಿ ಏವಂ ತೇನ ತೇನ ಕರಣೀಯೇನ ನ ಉಪಟ್ಠಹೇಯ್ಯ. ಪಾಚಿತ್ತಿಯನ್ತಿ ನಾನುಬನ್ಧಿಸ್ಸನ್ತಿ ಧುರೇ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ನಾನುಬನ್ಧನವತ್ಥುಸ್ಮಿಂ ಪಞ್ಞತ್ತಂ. ಬಾಲಂ ಪನ ಅಲಜ್ಜಿನಿಂ ವಾ ಅನನುಬನ್ಧನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ವುಟ್ಠಾಪಿತಪ್ಪವತ್ತಿನಿತಾ, ದ್ವೇ ವಸ್ಸಾನಿ ಅನನುಬನ್ಧನೇ ಧುರನಿಕ್ಖೇಪೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನಿ, ಇದಂ ಪನ ಅಕಿರಿಯಂ, ದುಕ್ಖವೇದನನ್ತಿ.

ನಾನುಬನ್ಧನಸಿಕ್ಖಾಪದವಣ್ಣನಾ ನಿಟ್ಠಿತಾ.