೧೨. ಪಾಪಸಮಾಚಾರಪಠಮಸಿಕ್ಖಾಪದವಣ್ಣನಾ

ದ್ವಾದಸಮೇ ಸಂಸಟ್ಠಾತಿ ಪಬ್ಬಜಿತಾನಂ ಅನನುಲೋಮೇನ ಗಿಹೀನಂ ಕೋಟ್ಟನಪಚನಸಾಸನಹರಣಾದಿನಾ ಕಾಯಿಕವಾಚಸಿಕೇನ ಮಿಸ್ಸೀಭೂತಾ. ಪಾಪೋ ಕಾಯಿಕವಾಚಸಿಕೋ ಆಚಾರೋ ಏತಾಸನ್ತಿ ಪಾಪಾಚಾರಾ. ಪಾಪೋ ಕಿತ್ತಿಸದ್ದೋ ಏತಾಸನ್ತಿ ಪಾಪಸದ್ದಾ. ಪಾಪೋ ಆಜೀವಸಙ್ಖಾತೋ ಸಿಲೋಕೋ ಏತಾಸನ್ತಿ ಪಾಪಸಿಲೋಕಾ. ಭಿಕ್ಖುನಿಸಙ್ಘಸ್ಸ ವಿಹೇಸಿಕಾತಿ ಅಞ್ಞಮಞ್ಞಿಸ್ಸಾ ಕಮ್ಮೇ ಕರಿಯಮಾನೇ ಪಟಿಕ್ಕೋಸನೇನ ವಿಹೇಸಿಕಾ. ವಜ್ಜಪ್ಪಟಿಚ್ಛಾದಿಕಾತಿ ಖುದ್ದಾನುಖುದ್ದಕಸ್ಸ ವಜ್ಜಸ್ಸ ಪಟಿಚ್ಛಾದಿಕಾ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಸಂಸಟ್ಠವಿಹಾರವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥಾಪಿ ದಸಮೇ ವುತ್ತನಯೇನೇವ ವೇದಿತಬ್ಬಂ, ಸಮನುಭಾಸನಕಮ್ಮಕಾಲೇ ಪನ ದ್ವೇತಿಸ್ಸೋ ಏಕತೋ ಸಮನುಭಾಸಿತಬ್ಬಾತಿ.

ಪಾಪಸಮಾಚಾರಪಠಮಸಿಕ್ಖಾಪದವಣ್ಣನಾ ನಿಟ್ಠಿತಾ.