ಸಾಧಾರಣಪಾರಾಜಿಕಂ

೧…ಪೇ…೪. ಮೇಥುನಧಮ್ಮಸಿಕ್ಖಾಪದವಣ್ಣನಾ

ತತ್ಥ ಸುಣಾತು ಮೇತಿಆದೀನಂ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ಅತ್ಥೋ ವೇದಿತಬ್ಬೋ. ಕೇವಲಞ್ಹಿ, ಭನ್ತೇ, ಅಯ್ಯೇತಿಆದಿವಸೇನ ತಸ್ಮಿಞ್ಚ ಇಧ ಚ ಅಭಿಲಾಪಮತ್ತಮೇವ ಲಿಙ್ಗಭೇದಮತ್ತಞ್ಚ ವಿಸೇಸೋ. ಯಸ್ಮಾ ಚ ಭಿಕ್ಖುನಿಯಾ ಸಿಕ್ಖಾಪಚ್ಚಕ್ಖಾನಂ ನಾಮ ನತ್ಥಿ, ತಸ್ಮಾ ಭಿಕ್ಖುನೀನಂ ‘‘ಸಿಕ್ಖಾಸಾಜೀವಸಮಾಪನ್ನಾ ಸಿಕ್ಖಂ ಅಪಚ್ಚಕ್ಖಾಯ ದುಬ್ಬಲ್ಯಂ ಅನಾವಿಕತ್ವಾ’’ತಿ ಅವತ್ವಾ ಯಾ ಪನ ಭಿಕ್ಖುನೀ ಛನ್ದಸೋ ಮೇಥುನಂ ಧಮ್ಮಂ ಪಟಿಸೇವೇಯ್ಯಾತಿ ವುತ್ತಂ. ತತ್ಥ ಛನ್ದಸೋತಿ ಮೇಥುನರಾಗಪ್ಪಟಿಸಂಯುತ್ತೇನ ಛನ್ದೇನ ಚೇವ ರುಚಿಯಾ ಚ. ಛನ್ದೇ ಪನ ಅಸತಿ ಬಲಕ್ಕಾರೇನ ಪಧಂಸಿತಾಯ ಅನಾಪತ್ತಿ, ತಸ್ಮಾ ಯಾ ಪರಿಪುಣ್ಣೂಪಸಮ್ಪದಾ ಭಿಕ್ಖುನೀ ಮನುಸ್ಸಾಮನುಸ್ಸತಿರಚ್ಛಾನಜಾತೀಸು ಪುರಿಸಉಭತೋಬ್ಯಞ್ಜನಕಪಣ್ಡಕಾನಂ ಯಸ್ಸ ಕಸ್ಸಚಿ ಸಜೀವಸ್ಸ ವಾ ನಿಜ್ಜೀವಸ್ಸ ವಾ ಸನ್ಥತಸ್ಸ ವಾ ಅಸನ್ಥತಸ್ಸ ವಾ ಅಕ್ಖಾಯಿತಸ್ಸ ವಾ ಯೇಭುಯ್ಯೇನ ಅಕ್ಖಾಯಿತಸ್ಸ ವಾ ಅಙ್ಗಜಾತಸ್ಸ ಅತ್ತನೋ ವಚ್ಚಮಗ್ಗಪಸ್ಸಾವಮಗ್ಗಮುಖೇಸು ತೀಸು ಯತ್ಥಕತ್ಥಚಿ ಸನ್ಥತೇ ವಾ ಅಸನ್ಥತೇ ವಾ ಪಕತಿವಾತೇನ ಅಸಂಫುಟ್ಠೇ ಅಲ್ಲೋಕಾಸೇ ಅನ್ತಮಸೋ ತಿಲಫಲಮತ್ತಮ್ಪಿ ಪದೇಸಂ ಛನ್ದಸೋ ಪವೇಸೇತಿ, ಪರೇನ ವಾ ಪವೇಸಿಯಮಾನಾ ಪವೇಸನಪವಿಟ್ಠಟ್ಠಿತಉದ್ಧರಣೇಸು ಯಂಕಿಞ್ಚಿ ಸಾದಿಯತಿ, ಅಯಂ ಪಾರಾಜಿಕಾ ಹೋತಿ. ಸೇಸಮೇತ್ಥ ಇತೋ ಪರೇಸು ಚ ಸಾಧಾರಣಸಿಕ್ಖಾಪದೇಸು ವುತ್ತನಯಾನುಸಾರೇನೇವ ವೇದಿತಬ್ಬಂ.