ಅಸಾಧಾರಣಪಾರಾಜಿಕಂ

೫. ಉಬ್ಭಜಾಣುಮಣ್ಡಲಿಕಾಸಿಕ್ಖಾಪದವಣ್ಣನಾ

ಅಸಾಧಾರಣೇಸು ಪನ ಚತುನ್ನಂ ತಾವ ಪಾರಾಜಿಕಾನಂ ಪಠಮೇ ಅವಸ್ಸುತಾತಿ ಕಾಯಸಂಸಗ್ಗರಾಗೇನ ತಿನ್ತಾ, ಕಿಲಿನ್ನಾತಿ ಅತ್ಥೋ. ದುತಿಯಪದೇಪಿ ಏಸೇವ ನಯೋ. ಪುರಿಸಪುಗ್ಗಲಸ್ಸಾತಿ ಕಾಯಸಂಸಗ್ಗಂ ಸಮಾಪಜ್ಜಿತುಂ ವಿಞ್ಞುಸ್ಸ ಮನುಸ್ಸಜಾತಿಕಸ್ಸ ಪುರಿಸಸಙ್ಖಾತಸ್ಸ ಪುಗ್ಗಲಸ್ಸ. ಅಧಕ್ಖಕನ್ತಿ ಅತ್ತನೋ ಅಕ್ಖಕಾನಂ ಅಧೋ. ಉಬ್ಭಜಾಣುಮಣ್ಡಲನ್ತಿ ಜಾಣುಮಣ್ಡಲಾನಂ ಉಪರಿ, ಏತ್ಥ ಚ ಉಬ್ಭಕಪ್ಪರಮ್ಪಿ ಉಬ್ಭಜಾಣುಮಣ್ಡಲೇನೇವ ಸಙ್ಗಹಿತಂ. ಆಮಸನನ್ತಿ ಆಮಜ್ಜನಂ ಫುಟ್ಠೋಕಾಸಂ ಅನತಿಕ್ಕಮಿತ್ವಾ ತತ್ಥೇವ ಸಙ್ಘಟ್ಟನಂ. ಪರಾಮಸನನ್ತಿ ಇತೋ ಚಿತೋ ಚ ಸಞ್ಚರಣಂ. ಗಹಣನ್ತಿ ಗಹಿತಮತ್ತಂ. ಛುಪನನ್ತಿ ಅಸಙ್ಘಟ್ಟೇತ್ವಾ ಫುಟ್ಠಮತ್ತಂ. ಪಟಿಪೀಳನನ್ತಿ ಅಙ್ಗೇ ಗಹೇತ್ವಾ ನಿಪ್ಪೀಳನಂ. ಸಾದಿಯೇಯ್ಯಾತಿ ಯಾ ಭಿಕ್ಖುನೀ ಅತ್ತನೋ ಯಥಾಪರಿಚ್ಛಿನ್ನೇ ಕಾಯೇ ಪುರಿಸಸ್ಸ ಏತಂ ಆಮಸನಾದಿಂ ಸಾದಿಯತಿ, ಸಯಂ ವಾ ಪನ ತೇನ ಕಾಯೇನ ಪುರಿಸಸ್ಸ ಯಂಕಿಞ್ಚಿ ಕಾಯಪ್ಪದೇಸಂ ಸಾದಯಮಾನಾ ಛುಪತಿ, ಅಯಂ ಉಬ್ಭಜಾಣುಮಣ್ಡಲಿಕಾ ನಾಮ ಪಾರಾಜಿಕಾತಿ ಅಯಮೇತ್ಥ ಸಙ್ಖೇಪೋ.

‘‘ನಿದಾನಂ ಪುಗ್ಗಲಂ ವತ್ಥು’’ನ್ತಿಆದಿಕೇ (ಕಙ್ಖಾ. ಅಟ್ಠ. ಪಠಮಪಾರಾಜಿಕವಣ್ಣನಾ) ತೇನ ವಿತ್ಥಾರವಿನಿಚ್ಛಯೇ ಯಸ್ಮಾ ಸಬ್ಬಾನೇವ ಅಸಾಧಾರಣಪಞ್ಞತ್ತಿಯೋ ಹೋನ್ತಿ, ತಸ್ಮಾ ಇತೋ ಪಟ್ಠಾಯ ಸನ್ತಿಂ ಅನುಪಞ್ಞತ್ತಿಂ ವತ್ವಾ ಸಾಧಾರಣಪಞ್ಞತ್ತೀತಿ ವಾ ಅಸಾಧಾರಣಪಞ್ಞತ್ತೀತಿ ವಾ ನ ವಕ್ಖಾಮ, ಆಣತ್ತಿಯಂ ಯತ್ಥ ಆಣತ್ತಿ ನತ್ಥಿ, ತತ್ಥ ಕಿಞ್ಚಿ ಅವತ್ವಾ ಯತ್ಥ ಅತ್ಥಿ, ತತ್ಥೇವ ವಕ್ಖಾಮ, ವಿಪತ್ತಿವಿಚಾರಣಾ ವುತ್ತಾಯೇವ.

ಅವಸೇಸಂ ಪನ ಸಬ್ಬತ್ಥ ವತ್ತಬ್ಬಂ, ತಯಿದಂ ವುಚ್ಚತಿ, ಇದಂ ತಾವ ಸಿಕ್ಖಾಪದಂ ಸಾವತ್ಥಿಯಂ ಸುನ್ದರೀನನ್ದಂ ಆರಬ್ಭ ಕಾಯಸಂಸಗ್ಗಂ ಸಮಾಪಜ್ಜನವತ್ಥುಸ್ಮಿಂ ಪಞ್ಞತ್ತಂ, ಏಕತೋಅವಸ್ಸುತೇ ಯಥಾಪರಿಚ್ಛಿನ್ನೇನ ಕಾಯೇನ ಪುರಿಸಸ್ಸ ಕಾಯಂ, ಉಭತೋಅವಸ್ಸುತೇಪಿ ಕಾಯೇನ ಕಾಯಪ್ಪಟಿಬದ್ಧಂ, ಯಥಾಪರಿಚ್ಛಿನ್ನಕಾಯಪ್ಪಟಿಬದ್ಧೇನ ವಾ ಅವಸೇಸಕಾಯೇನ ವಾ ತಸ್ಸ ಕಾಯಂ ಆಮಸನ್ತಿಯಾ ಥುಲ್ಲಚ್ಚಯಂ, ಯಕ್ಖಪೇತಪಣ್ಡಕತಿರಚ್ಛಾನಗತಮನುಸ್ಸವಿಗ್ಗಹಾನಂ ಉಭತೋಅವಸ್ಸುತೇ ಯಥಾಪರಿಚ್ಛಿನ್ನೇನ ಕಾಯೇನ ಕಾಯಂ ಆಮಸನ್ತಿಯಾಪಿ ಥುಲ್ಲಚ್ಚಯಂ, ಸಚೇ ಪನ ಪುರಿಸಸ್ಸ ಕಾಯಸಂಸಗ್ಗರಾಗೋ ನತ್ಥಿ, ಪಾರಾಜಿಕಕ್ಖೇತ್ತೇಪಿ ಥುಲ್ಲಚ್ಚಯಮೇವ. ಅವಸೇಸೇ ಪನ ಕಾಯಪ್ಪಟಿಬದ್ಧೇನ ಕಾಯಪ್ಪಟಿಬದ್ಧಾದಿಭೇದೇ, ಮೇಥುನರಾಗಗೇಹಸಿತಪೇಮೇಸು ಚ ಸಬ್ಬತ್ಥ ದುಕ್ಕಟಂ. ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಿಯಾ, ಅಸಾದಿಯನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಅಙ್ಗಾನಿ ಸಮುಟ್ಠಾನಾದೀನಿ ಚ ಭಿಕ್ಖುಪಾತಿಮೋಕ್ಖೇ ಕಾಯಸಂಸಗ್ಗೇ ವುತ್ತನಯೇನೇವ ವೇದಿತಬ್ಬಾನೀತಿ.

ಉಬ್ಭಜಾಣುಮಣ್ಡಲಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ವಜ್ಜಪ್ಪಟಿಚ್ಛಾದಿಕಾಸಿಕ್ಖಾಪದವಣ್ಣನಾ

ದುತಿಯೇ ಗಣಸ್ಸಾತಿ ಅಞ್ಞಾಸಂ ಭಿಕ್ಖುನೀನಂ. ಠಿತಾತಿ ಸಲಿಙ್ಗೇ ಠಿತಾ. ಚುತಾತಿ ಕಾಲಙ್ಕತಾ. ನಾಸಿತಾತಿ ಲಿಙ್ಗನಾಸನಾಯ ಸಯಂ ವಾ ನಟ್ಠಾ, ಅಞ್ಞೇಹಿ ವಾ ನಾಸಿತಾ. ಅವಸ್ಸಟಾತಿ ತಿತ್ಥಾಯತನಂ ಸಙ್ಕನ್ತಾ. ಪುಬ್ಬೇವಾಹಂ ಅಯ್ಯೇ ಅಞ್ಞಾಸಿನ್ತಿ ಇದಂ ತಸ್ಸಾ ವಚನಕಾಲದಸ್ಸನಂ, ಸಲಿಙ್ಗೇ ಠಿತಾಯ ಪನ ಪಾರಾಜಿಕಭಾವಂ ಞತ್ವಾ ‘‘ನ ದಾನಿ ನಂ ಕಸ್ಸಚಿ ಆರೋಚೇಸ್ಸಾಮೀ’’ತಿ ಧುರೇ ನಿಕ್ಖಿತ್ತಮತ್ತೇಯೇವ ಅಯಂ ವಜ್ಜಪ್ಪಟಿಚ್ಛಾದಿಕಾ ನಾಮ ಪಾರಾಜಿಕಾ ಹೋತೀತಿ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ನೇವಅತ್ತನಾಪಟಿಚೋದನಾ ನಗಣಸ್ಸ ಆರೋಚನವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥ ಸಪ್ಪಾಣಕವಗ್ಗಮ್ಹಿ ದುಟ್ಠುಲ್ಲಾಪತ್ತಿಪ್ಪಟಿಚ್ಛಾದನಸಿಕ್ಖಾಪದೇ ವುತ್ತನಯೇನೇವ ವೇದಿತಬ್ಬಂ. ತತ್ರ ಹಿ ಪಾಚಿತ್ತಿಯಂ, ಇಧ ಪಾರಾಜಿಕನ್ತಿ ಅಯಮೇವ ವಿಸೇಸೋ, ಸೇಸಂ ತಾದಿಸಮೇವಾತಿ.

ವಜ್ಜಪ್ಪಟಿಚ್ಛಾದಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಉಕ್ಖಿತ್ತಾನುವತ್ತಿಕಾಸಿಕ್ಖಾಪದವಣ್ಣನಾ

ತತಿಯೇ ಉಕ್ಖಿತ್ತನ್ತಿ ಆಪತ್ತಿಯಾ ಅದಸ್ಸನಾದೀಸು ಉಕ್ಖಿತ್ತಂ. ಧಮ್ಮೇನಾತಿ ಭೂತೇನ ವತ್ಥುನಾ. ವಿನಯೇನಾತಿ ಚೋದೇತ್ವಾ ಸಾರೇತ್ವಾ. ಸತ್ಥುಸಾಸನೇನಾತಿ ಇಧಾಪಿ ಚೋದೇತ್ವಾ ಸಾರೇತ್ವಾ ಕರಣಮೇವ ಸತ್ಥುಸಾಸನಂ ನಾಮ. ಅನಾದರನ್ತಿ ಯೇನ ಸಙ್ಘೇನ ಉಕ್ಖೇಪನಿಯಕಮ್ಮಂ ಕತಂ, ತಸ್ಮಿಂ ವಾ, ತತ್ಥ ಪರಿಯಾಪನ್ನಗಣೇ ವಾ ಏಕಪುಗ್ಗಲೇ ವಾ ತಸ್ಮಿಂ ವಾ ಕಮ್ಮೇ ಆದರವಿರಹಿತಂ, ಸಮ್ಮಾವತ್ತನಾಯ ಅವತ್ತಮಾನನ್ತಿ ಅತ್ಥೋ. ಅಪ್ಪಟಿಕಾರನ್ತಿ ಪಟಿಕಾರರಹಿತಂ, ಅನೋಸಾರಿತನ್ತಿ ಅತ್ಥೋ. ಅಕತಸಹಾಯನ್ತಿ ಏಕಕಮ್ಮಾದಿಕೇ ಸಂವಾಸೇ ಸಹ ಅಯನಭಾವೇನ ಸಮಾನಸಂವಾಸಕಾ ಭಿಕ್ಖೂ ಸಹಾಯಾ ನಾಮ, ಯಸ್ಸ ಪನ ಸೋ ಸಂವಾಸೋ ತೇಹಿ ಸದ್ಧಿಂ ನತ್ಥಿ ನ ತೇನ ತೇ ಸಹಾಯಾ ಕತಾ ಹೋನ್ತಿ, ಇತಿ ಸೋ ಅಕತಸಹಾಯೋ ನಾಮ, ತಂ ಅಕತಸಹಾಯಂ, ಸಮಾನಸಂವಾಸಕಭಾವಂ ಅನುಪಗತನ್ತಿ ಅತ್ಥೋ. ತಮನುವತ್ತೇಯ್ಯಾತಿ ತಂ ಉಕ್ಖಿತ್ತಕಂ ಉಕ್ಖಿತ್ತಕಭಾವೇಯೇವ ಠಿತಂ ಭಿಕ್ಖುಂ ಯಾ ಭಿಕ್ಖುನೀ ಯಂದಿಟ್ಠಿಕೋ ಸೋ ಹೋತಿ, ತಾಯ ದಿಟ್ಠಿಯಾ ಗಹಣಭಾವೇನ ಅನುವತ್ತೇಯ್ಯ. ಸಾ ಭಿಕ್ಖುನೀ ಭಿಕ್ಖುನೀಹಿ ಸಙ್ಘಭೇದಸಿಕ್ಖಾಪದಾದೀಸು ವುತ್ತನಯೇನ ವಿಸುಂ ಸಙ್ಘಮಜ್ಝೇ ಚ ವುಚ್ಚಮಾನಾ ತಂ ವತ್ಥುಂ ಅಪ್ಪಟಿನಿಸ್ಸಜ್ಜನ್ತೀ ಸಮನುಭಾಸನಕಮ್ಮಪರಿಯೋಸಾನೇ ಉಕ್ಖಿತ್ತಾನುವತ್ತಿಕಾ ನಾಮ ಪಾರಾಜಿಕಾ ಹೋತೀತಿ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಉಕ್ಖಿತ್ತಾನುವತ್ತನವತ್ಥುಸ್ಮಿಂ ಪಞ್ಞತ್ತಂ, ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ದ್ವೇ ಥುಲ್ಲಚ್ಚಯಾ, ‘‘ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯಾ’’ತಿ ಏವಂ ಯ್ಯ-ಕಾರಪ್ಪತ್ತಾಯ ತತಿಯಕಮ್ಮವಾಚಾಯ ಪಾರಾಜಿಕಂ, ಅಧಮ್ಮಕಮ್ಮೇ ತಿಕದುಕ್ಕಟಂ, ಸೇಸಂ ಸಙ್ಘಭೇದಸಿಕ್ಖಾಪದಾದೀಸು ವುತ್ತನಯೇನೇವ ವೇದಿತಬ್ಬಂ.

ಉಕ್ಖಿತ್ತಾನುವತ್ತಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ.

೮. ಅಟ್ಠವತ್ಥುಕಾಸಿಕ್ಖಾಪದವಣ್ಣನಾ

ಚತುತ್ಥೇ ಅವಸ್ಸುತಾತಿ ಲೋಕಸ್ಸಾದಮಿತ್ತಸನ್ಥವವಸೇನ ಕಾಯಸಂಸಗ್ಗರಾಗೇನ ತಿನ್ತಾ. ಅಯಮೇವ ಹಿ ಅತ್ಥೋ ಸೀಹಳಮಾತಿಕಾಟ್ಠಕಥಾಯಂ ವುತ್ತೋ, ಸಮನ್ತಪಾಸಾದಿಕಾಯಂ (ಪಾಚಿ. ಅಟ್ಠ. ೬೭೫) ಪನಸ್ಸ ವಿಚಾರಣಾ ಕತಾ, ದುತಿಯಪದೇಪಿ ಏಸೇವ ನಯೋ. ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಂ ವಾತಿಆದೀಸು ಪನ ಯಂ ಪುರಿಸಪುಗ್ಗಲೇನ ಹತ್ಥೇ ಗಹಣಂ ಕತಂ, ತಂ ‘‘ಪುರಿಸಪುಗ್ಗಲಸ್ಸ ಹತ್ಥಗ್ಗಹಣ’’ನ್ತಿ ವುತ್ತಂ, ಏಸೇವ ನಯೋ ಸಙ್ಘಾಟಿಕಣ್ಣಗ್ಗಹಣೇಪಿ. ಹತ್ಥಗ್ಗಹಣನ್ತಿ ಏತ್ಥ ಚ ಯಸ್ಸ ಕಸ್ಸಚಿ ಅಪಾರಾಜಿಕಕ್ಖೇತ್ತಭೂತಸ್ಸ ಅಙ್ಗಸ್ಸ ಗಹಣಂ ಹತ್ಥಗ್ಗಹಣಂ, ಯಸ್ಸ ಕಸ್ಸಚಿ ನಿವತ್ಥಸ್ಸ ವಾ ಪಾರುತಸ್ಸ ವಾ ಗಹಣಂ ಸಙ್ಘಾಟಿಕಣ್ಣಗ್ಗಹಣಂ. ಸನ್ತಿಟ್ಠೇಯ್ಯ ವಾತಿಆದೀಸು ಕಾಯಸಂಸಗ್ಗಸಙ್ಖಾತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸಸ್ಸ ಹತ್ಥಪಾಸೇ ಸನ್ತಿಟ್ಠೇಯ್ಯ ವಾ, ತತ್ಥ ಠಿತಾ ಸಲ್ಲಪೇಯ್ಯ ವಾ, ಪುರಿಸೇನ ವಾ ‘‘ಇತ್ಥನ್ನಾಮಂ ಠಾನಂ ಆಗಚ್ಛಾ’’ತಿ ವುತ್ತಾ ತಂ ಸಙ್ಕೇತಂ ಗಚ್ಛೇಯ್ಯ, ತಸ್ಸ ವಾ ಪುರಿಸಸ್ಸ ಅಬ್ಭಾಗಮನಂ ಸಾದಿಯೇಯ್ಯ, ಯೇನ ಕೇನಚಿ ವಾ ಪಟಿಚ್ಛನ್ನಂ ಓಕಾಸಂ ಪವಿಸೇಯ್ಯ, ಪುರಿಸಸ್ಸ ಹತ್ಥಪಾಸೇ ಠತ್ವಾ ಕಾಯಂ ಉಪಸಂಹರೇಯ್ಯಾತಿ ಏವಮತ್ಥೋ ದಟ್ಠಬ್ಬೋ. ಅಯಮ್ಪಿ ಪಾರಾಜಿಕಾತಿ ಯಥಾ ಪುರಿಮಾಯೋ, ಏವಂ ಅಯಮ್ಪಿ ಭಿಕ್ಖುನೀ ಏತಸ್ಸ ಕಾಯಸಂಸಗ್ಗಸಙ್ಖಾತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಏತಾನಿ ಅಟ್ಠ ವತ್ಥೂನಿ ಪಟಿಪಾಟಿಯಾ ವಾ ಉಪ್ಪಟಿಪಾಟಿಯಾ ವಾ ಪೂರೇತ್ವಾ ಅಟ್ಠವತ್ಥುಕಾ ನಾಮ ಪಾರಾಜಿಕಾ ಹೋತೀತಿ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಅಟ್ಠಮಂ ವತ್ಥುಂ ಪರಿಪೂರಣವತ್ಥುಸ್ಮಿಂ ಪಞ್ಞತ್ತಂ, ಸಙ್ಕೇತಗಮನೇ ಪದೇ ಪದೇ ದುಕ್ಕಟಂ, ಪುರಿಸಸ್ಸ ಹತ್ಥಪಾಸಂ ಓಕ್ಕನ್ತಮತ್ತೇ ಥುಲ್ಲಚ್ಚಯಂ, ಪುರಿಸಸ್ಸ ಅಬ್ಭಾಗಮನಸಾದಯಮಾನೇಪಿ ದುಕ್ಕಟಂ. ಹತ್ಥಪಾಸೋಕ್ಕಮನೇ ಥುಲ್ಲಚ್ಚಯಂ, ಸೇಸೇಸು ಏಕೇಕಸ್ಮಿಂ ಥುಲ್ಲಚ್ಚಯಮೇವ, ಅಟ್ಠಮೇ ಪರಿಪುಣ್ಣೇ ಪಾರಾಜಿಕಂ. ಏಕೇಕಸ್ಮಿಂ ಪನ ವತ್ಥುಸ್ಮಿಂ ಸತಕ್ಖತ್ತುಮ್ಪಿ ವೀತಿಕ್ಕನ್ತೇ ತಾ ಆಪತ್ತಿಯೋ ದೇಸೇತ್ವಾ ಮುಚ್ಚತಿ, ಅಪಿಚೇತ್ಥ ಗಣನೂಪಿಕಾ ಆಪತ್ತಿ ವೇದಿತಬ್ಬಾ, ‘‘ಇದಾನಿ ನಾಪಜ್ಜಿಸ್ಸಾಮೀ’’ತಿ ಹಿ ಧುರನಿಕ್ಖೇಪಂ ಕತ್ವಾ ದೇಸಿತಾ ಗಣನೂಪಿಕಾ, ದೇಸಿತಗಣನಂ ಉಪೇತಿ, ಪಾರಾಜಿಕಸ್ಸ ಅಙ್ಗಂ ನ ಹೋತಿ. ತಸ್ಮಾ ಯಾ ಏಕಂ ಆಪನ್ನಾ ಧುರನಿಕ್ಖೇಪಂ ಕತ್ವಾ ದೇಸೇತ್ವಾ ಪುನ ಕಿಲೇಸವಸೇನ ಆಪಜ್ಜತಿ, ಪುನಪಿ ದೇಸೇತಿ, ಏವಂ ಅಟ್ಠಮಂ ಪರಿಪೂರೇನ್ತೀಪಿ ಪಾರಾಜಿಕಾ ನ ಹೋತಿ. ಯಾ ಪನ ಆಪಜ್ಜಿತ್ವಾ ‘‘ಪುನಪಿ ಅಞ್ಞಂ ವತ್ಥುಂ ಆಪಜ್ಜಿಸ್ಸಾಮೀ’’ತಿ ಸಉಸ್ಸಾಹಾವ ದೇಸೇತಿ, ತಸ್ಸಾ ಸಾ ಆಪತ್ತಿ ಅಗಣನೂಪಿಕಾ, ದೇಸಿತಾಪಿ ಅದೇಸಿತಾ ಹೋತಿ, ಪಾರಾಜಿಕಸ್ಸ ಅಙ್ಗಂ ಹೋತಿ. ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಿಯಾ ಅಸಾದಿಯನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಕಾಯಸಂಸಗ್ಗರಾಗೋ, ಸಉಸ್ಸಾಹತಾ, ಅಟ್ಠಮಸ್ಸ ವತ್ಥುಸ್ಸ ಪೂರಣನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮನುಭಾಸನಸಮುಟ್ಠಾನಂ, ಕಿರಿಯಾಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ಅಕುಸಲಚಿತ್ತಂ, ದ್ವಿವೇದನನ್ತಿ.

ಅಟ್ಠವತ್ಥುಕಾಸಿಕ್ಖಾಪದವಣ್ಣನಾ ನಿಟ್ಠಿತಾ.

ಉದ್ದಿಟ್ಠಾ ಖೋ ಅಯ್ಯಾಯೋ ಅಟ್ಠ ಪಾರಾಜಿಕಾ ಧಮ್ಮಾತಿ ಭಿಕ್ಖೂ ಆರಬ್ಭ ಪಞ್ಞತ್ತಾ ಸಾಧಾರಣಾ ಚತ್ತಾರೋ, ಇಮೇ ಚತ್ತಾರೋತಿ ಏವಂ ಪಾತಿಮೋಕ್ಖುದ್ದೇಸಮಗ್ಗೇನ ಅಟ್ಠ ಪಾರಾಜಿಕಾ ಧಮ್ಮಾ ಉದ್ದಿಟ್ಠಾತಿ ಏವಮೇತ್ಥ ಅತ್ಥೋ ವೇದಿತಬ್ಬೋ, ಸೇಸಂ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯಮೇವಾತಿ.

ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ

ಭಿಕ್ಖುನಿಪಾತಿಮೋಕ್ಖೇ

ಪಾರಾಜಿಕವಣ್ಣನಾ ನಿಟ್ಠಿತಾ.