೨. ಪಞ್ಹಪುಚ್ಛಕವಣ್ಣನಾ

೨೨೩. ಇಧ ಅನಾಭಟ್ಠನ್ತಿ ಏಕನ್ತಾನಾರಮ್ಮಣತ್ತೇನ ಭಾಸಿತಂ. ‘‘ರೂಪಮಿಸ್ಸಕತ್ತಾ ಅನಾರಮ್ಮಣೇಸು ರೂಪಧಮ್ಮೇಸು ಸಙ್ಗಹಿತ’’ನ್ತಿ ಕಸ್ಮಾ ವುತ್ತಂ, ನನು ಮಿಸ್ಸಕತ್ತಾ ಏವ ಜೀವಿತಿನ್ದ್ರಿಯಂ ಅನಾರಮ್ಮಣೇಸು ಅಸಙ್ಗಹಿತಂ. ನ ಹಿ ಅಟ್ಠಿನ್ದ್ರಿಯಾ ಅನಾರಮ್ಮಣಾತಿ ವುತ್ತಾತಿ? ಸಚ್ಚಮೇತಂ, ಜೀವಿತಿನ್ದ್ರಿಯಏಕದೇಸಸ್ಸ ಪನ ಅನಾರಮ್ಮಣೇಸು ರೂಪಧಮ್ಮೇಸು ಸಙ್ಗಹಿತತಂ ಸನ್ಧಾಯೇತಂ ವುತ್ತಂ, ಅರೂಪಕೋಟ್ಠಾಸೇನ ಪರಿತ್ತಾರಮ್ಮಣಾದಿತಾ ಅತ್ಥೀತಿ ಸಿಯಾಪಕ್ಖೇ ಸಙ್ಗಹಿತನ್ತಿ ಅಧಿಪ್ಪಾಯೋ. ಅರೂಪಕೋಟ್ಠಾಸೇನ ಪನ ಪರಿತ್ತಾರಮ್ಮಣಾದಿತಾ, ರೂಪಕೋಟ್ಠಾಸೇನ ಚ ನವತ್ತಬ್ಬತಾ ಅತ್ಥೀತಿ ಮಿಸ್ಸಕಸ್ಸ ಸಮುದಾಯಸ್ಸೇವ ವಸೇನ ಸಿಯಾಪಕ್ಖೇ ಸಙ್ಗಹಿತಂ, ನ ಏಕದೇಸವಸೇನಾತಿ ದಟ್ಠಬ್ಬಂ. ನ ಹಿ ಅನಾರಮ್ಮಣಂ ಪರಿತ್ತಾರಮ್ಮಣಾದಿಭಾವೇನ ನವತ್ತಬ್ಬಂ ನ ಹೋತೀತಿ. ‘‘ರೂಪಞ್ಚ ನಿಬ್ಬಾನಞ್ಚ ಅನಾರಮ್ಮಣಾ, ಸತ್ತಿನ್ದ್ರಿಯಾ ಅನಾರಮ್ಮಣಾ’’ತಿಆದಿವಚನಞ್ಚ ಅವಿಜ್ಜಮಾನಾರಮ್ಮಣಾನಾರಮ್ಮಣೇಸು ನವತ್ತಬ್ಬೇಸು ಅನಾರಮ್ಮಣತ್ತಾ ನವತ್ತಬ್ಬತಂ ದಸ್ಸೇತಿ, ನ ಸಾರಮ್ಮಣಸ್ಸೇವ ನವತ್ತಬ್ಬತಂ, ನವತ್ತಬ್ಬಸ್ಸ ವಾ ಸಾರಮ್ಮಣತಂ. ನ ಹಿ ನವತ್ತಬ್ಬ-ಸದ್ದೋ ಸಾರಮ್ಮಣೇ ನಿರುಳ್ಹೋ. ಯದಿಪಿ ಸಿಯಾ, ‘‘ತಿಸ್ಸೋ ಚ ವೇದನಾ ರೂಪಞ್ಚ ನಿಬ್ಬಾನಞ್ಚ ಇಮೇ ಧಮ್ಮಾ ನವತ್ತಬ್ಬಾ ಸುಖಾಯ ವೇದನಾಯ ಸಮ್ಪಯುತ್ತಾ’’ತಿಆದಿ ನ ವುಚ್ಚೇಯ್ಯ, ಅಥಾಪಿ ಪರಿತ್ತಾರಮ್ಮಣಾದಿಸಮ್ಬನ್ಧೋ ನವತ್ತಬ್ಬ-ಸದ್ದೋ ಸಾರಮ್ಮಣೇಸ್ವೇವ ವತ್ತತಿ, ‘‘ದ್ವಾಯತನಾ ಸಿಯಾ ಪರಿತ್ತಾರಮ್ಮಣಾ’’ತಿಆದಿಂ ಅವತ್ವಾ ‘‘ಮನಾಯತನಂ ಸಿಯಾ ಪರಿತ್ತಾರಮ್ಮಣಂ…ಪೇ… ಅಪ್ಪಮಾಣಾರಮ್ಮಣ’’ನ್ತಿಪಿ, ‘‘ಧಮ್ಮಾಯತನಂ ಸಿಯಾ ಪರಿತ್ತಾರಮ್ಮಣಂ…ಪೇ… ಅಪ್ಪಮಾಣಾರಮ್ಮಣ’’ನ್ತಿಪಿ, ‘‘ಸಿಯಾ ಅನಾರಮ್ಮಣ’’ನ್ತಿಪಿ ವತ್ತಬ್ಬಂ ಸಿಯಾ. ನ ಹಿ ಪಞ್ಹಪುಚ್ಛಕೇ ಸಾವಸೇಸಾ ದೇಸನಾ ಅತ್ಥೀತಿ. ‘‘ಅಟ್ಠಿನ್ದ್ರಿಯಾ ಸಿಯಾ ಅಜ್ಝತ್ತಾರಮ್ಮಣಾ’’ತಿ ಏತ್ಥ ಚ ಜೀವಿತಿನ್ದ್ರಿಯಸ್ಸ ಆಕಿಞ್ಚಞ್ಞಾಯತನಕಾಲೇ ಅರೂಪಸ್ಸ ರೂಪಸ್ಸ ಚ ಅನಾರಮ್ಮಣತ್ತಾ ನವತ್ತಬ್ಬತಾ ವೇದಿತಬ್ಬಾ.

ಪಞ್ಹಪುಚ್ಛಕವಣ್ಣನಾ ನಿಟ್ಠಿತಾ.

ಇನ್ದ್ರಿಯವಿಭಙ್ಗವಣ್ಣನಾ ನಿಟ್ಠಿತಾ.