೪. ಚತುಕ್ಕನಿದ್ದೇಸವಣ್ಣನಾ

೯೩೯. ಏವಂ-ಸದ್ದೇನಾತಿ ನಿದಸ್ಸನತ್ಥೇನ ಏವಂ-ಸದ್ದೇನಾತಿ ಅಧಿಪ್ಪಾಯೋ. ಭವೋ ಏವ ಅಭಿವುದ್ಧೋ ಅಭವೋ ಯಥಾ ‘‘ಅಸೇಕ್ಖಾ ಧಮ್ಮಾ’’ತಿ (ಧ. ಸ. ತಿಕಮಾತಿಕಾ ೧೧). ದುತಿಯಸ್ಮಿಂ ಪಕ್ಖೇ ಭವಾಭವಸದ್ದೇನ ಸಮ್ಪತ್ತಿವಿಪತ್ತಿಯೋ, ವುದ್ಧಿಹಾನಿಯೋ ವಾ ವುತ್ತಾತಿ ವೇದಿತಬ್ಬಾ.

ಅಗತಿಯಾತಿ ಅಯುತ್ತಗತಿಯಾ, ಅಪ್ಪತಿರೂಪಕಿರಿಯಾಯಾತಿ ಅತ್ಥೋ.

ಕೋಧೂಪಾಯಾಸ…ಪೇ… ಮಾತುಗಾಮಾ ವಾ ಊಮಿಆದಿಭಯನ್ತಿ ಯೋಜನಾ. ಪಞ್ಚಕಾಮಗುಣಮಾತುಗಾಮಗ್ಗಹಣೇತಿ ಪಞ್ಚಕಾಮಗುಣಗ್ಗಹಣೇ, ಮಾತುಗಾಮಗ್ಗಹಣೇ ಚ.

‘‘ಸಯಂಕತಂ ಸುಖದುಕ್ಖ’’ನ್ತಿಆದಿಕಾ ದಿಟ್ಠಿ ಯದಿಪಿ ಅಞ್ಞೇಸಮ್ಪಿ ದಿಟ್ಠಿಗತಿಕಾನಂ ಅತ್ಥೇವ, ತಿಮ್ಬರುಕೋ ಪನ ತಥಾದಿಟ್ಠಿಕೋ ಭಗವನ್ತಂ ಉಪಸಙ್ಕಮಿತ್ವಾ ಪುಚ್ಛೀತಿ ಸಾ ದಿಟ್ಠಿ ‘‘ತಿಮ್ಬರುಕದಿಟ್ಠೀ’’ತಿ (ಸಂ. ನಿ. ೨.೧೮) ವುತ್ತಾ. ತೇನಾಹ ‘‘ತಿಮ್ಬರುಕೋ…ಪೇ… ಆಗತತ್ತಾ’’ತಿ.

ಚತುಕ್ಕನಿದ್ದೇಸವಣ್ಣನಾ ನಿಟ್ಠಿತಾ.