೩. ತಿಕನಿದ್ದೇಸವಣ್ಣನಾ

೯೦೯. ಅವಿಜ್ಜಾಭವತಣ್ಹಾಹಿ ವಿಯ ಇಸ್ಸಾಮಚ್ಛರಿಯದೋಮನಸ್ಸಾದಿಸಹಾಯಭೂತೇನ ದೋಸೇನಪಿ ಭವಾಭಿಸಙ್ಖರಣಂ ಹೋತೀತಿ ‘‘ಅಕುಸಲಮೂಲಾನೇವ ವಟ್ಟಮೂಲಾನೀ’’ತಿ. ತೇನಾಹ ‘‘ತೀಹಿ…ಪೇ… ಕಥಿತೋ’’ತಿ.

೯೧೯. ರೂಪಾರೂಪಾವಚರವಿಪಾಕಾನಂ ಸನ್ತಪಣೀತಭಾವೇನ ಉಳಾರತಮತ್ತಾ ತತ್ಥ ಸಾತಿಸಯೋ ಭವರಾಗೋ ವುತ್ತೋ.

೯೨೦. ಮಾನೇನ ಠಪನಾತಿ ಮಾನೇನ ಸೇಯ್ಯಾದಿವಸೇನ ಅತ್ತನೋ ಠಪನಾ. ಠಪನಾತಿ ಚ ದಹನಾ, ಪಗ್ಗಣ್ಹನಾ ವಾ.

೯೨೧. ತಂಸಮ್ಪಯುತ್ತಾತಿ ದೋಸಸಮ್ಪಯುತ್ತಾ.

೯೨೨. ತೇಸಂ ವಣ್ಣಭೇದನ್ತಿ ತೇಸಂ ಜೀವಾನಂ ವಣ್ಣವಿಸೇಸಂ, ತೇಸಂ ವಾ ತಥಾ ಕಥೇನ್ತಾನಂ ಸುತ್ವಾ. ಬ್ಯಾಪೀತಿ ಸಕಲಲೋಕಬ್ಯಾಪೀ, ಸಕಲಸರೀರಬ್ಯಾಪೀ ವಾ. ಪರಿಮಣ್ಡಲೋತಿ ಪರಮಾಣುಪ್ಪಮಾಣೋ ಹುತ್ವಾ ಪರಿಮಣ್ಡಲೋ. ಆದಿ-ಸದ್ದೇನ ಅಙ್ಗುಟ್ಠಪ್ಪಮಾಣೋ ವಯಪ್ಪಮಾಣೋತಿಆದಿಕಂ ಸಙ್ಗಣ್ಹಾತಿ.

೯೨೩. ಉತುವಿಪರಿಣಾಮಜೋ ಸೀತಾದಿಉತುವಿಪರಿವತ್ತಜಾತೋ. ಓಪಕ್ಕಮಿಕೋ ಅತ್ತನೋ, ಪರಸ್ಸ ವಾ ತಾದಿಸಉಪಕ್ಕಮನಿಬ್ಬತ್ತೋ. ವಿಸಮಪರಿಹಾರಜೋ ಚಿರಾಸನಚಿರಟ್ಠಾನಾದಿನಾ ಕಾಯಸ್ಸ ವಿಸಮಪರಿಹರಣತೋ ಜಾತೋ. ಸನ್ನಿಪಾತಜೋ ಸಞ್ಚಯತೋ ಪಟ್ಠಾಯ ಪಚ್ಚೇಕಂ ವಿಸಮಾಕಾರತೋ ದೋಸತ್ತಯಸಮೋಧಾನತೋ ಜಾತೋ. ಕಮ್ಮಸಮುಟ್ಠಾನೋ ಉತುವಿಪರಿಣಾಮಾದೀಹಿ ವಿನಾ ಕಮ್ಮತೋ ಸಮುಟ್ಠಿತೋ. ಪಿತ್ತಸೇಮ್ಹವಾತಸಮುಟ್ಠಾನಾ ಪನ ಪಿತ್ತಾದೀನಂ ಅಧಿಕಭಾವೇನೇವ ವುತ್ತಾ. ಸಬ್ಬಸ್ಸಾಪಿ ಹಿ ರೋಗಸ್ಸ ದೋಸತ್ತಯಂ ಆಸನ್ನಕಾರಣಂ ದೋಸಪ್ಪಕೋಪೇನ ವಿನಾ ಅಭಾವತೋ. ಕಮ್ಮಂ ಪಧಾನಕಾರಣಂ ಕತೋಕಾಸೇ ಏವ ತಸ್ಮಿಂ ಉಪ್ಪಜ್ಜನತೋ, ಇತರಂ ಪನ ತಸ್ಸ ಸಹಕಾರಿಕಾರಣಂ ದಟ್ಠಬ್ಬಂ. ತಯಿದಂ ಪುಬ್ಬೇಕತಹೇತುವಾದಿನೋ ಪಟಿಕ್ಖಿಪನ್ತಿ. ಉಪಪಜ್ಜವೇದನೀಯಫಲಮ್ಪಿ ಪುಬ್ಬೇಕತಹೇತುಕಪಕ್ಖಿಕಮೇವ ಅತೀತದ್ಧಿಕತ್ತಾ ಕಮ್ಮಸ್ಸಾತಿ ಅರುಚಿಸೂಚನತ್ಥಂ ಕಿರ-ಸದ್ದಗ್ಗಹಣಂ ಕರೋತಿ ‘‘ಉಪಪಜ್ಜವೇದನೀಯಞ್ಚ ಕಿರ ಪಟಿಕ್ಖಿಪನ್ತೀ’’ತಿ.

೯೨೪. ದಾಹಕಾರಣತಾಯಾತಿ ರಾಗಾದಿದಸವಿಧಗ್ಗಿದಾಹಸ್ಸ, ನರಕಗ್ಗಿದಾಹಸ್ಸ ಚ ಕಾರಣತಾಯ.

೯೨೬. ಪುಥುನಿಮಿತ್ತಸಭಾವೇಸೂತಿ ಪುಥು ನಾನಾಕಿಲೇಸಾದೀನಂ ಕಾರಣಸಭಾವೇಸು.

೯೩೧. ಅದ್ದನಂ ಅದ್ದಾ ಮದ್ದವೋ, ಅನೇಕತ್ಥತ್ತಾ ಧಾತೂನಂ ತಪ್ಪಟಿಕ್ಖೇಪೇನ ಅನದ್ದಾತಿ ಆಹ ‘‘ಅಮುದುತಾ ವಾ ಅನದ್ದಾ’’ತಿ.

೯೩೬. ಅಯೋನಿಸೋಮನಸಿಕಾರಹೇತುಕತ್ತಾ ಆವಜ್ಜನಾಯ ಅಕುಸಲಾನುಕೂಲಕಿಚ್ಚತಾ ದಟ್ಠಬ್ಬಾ.

ತಿಕನಿದ್ದೇಸವಣ್ಣನಾ ನಿಟ್ಠಿತಾ.