೩. ಪಞ್ಹಪುಚ್ಛಕವಣ್ಣನಾ

೭೪೭. ಸಬ್ಬಞಾಣಾರಮ್ಮಣತಾಯಾತಿ ಪಟಿಸಮ್ಭಿದಾಪಟಿಸಮ್ಭಿದಾಞಾಣಾರಮ್ಮಣತಾಯ. ‘‘ಸುತ್ತನ್ತಭಾಜನೀಯೇ ಪನ…ಪೇ… ಸಿಯಾ’’ತಿ ಇದಂ ಅಭಿಧಮ್ಮಭಾಜನೀಯೇನ ವಿರುಜ್ಝತಿ, ತಸ್ಸ ವಾ ಸಾವಸೇಸದೇಸನತಾ ಆಪಜ್ಜತೀತಿ ಚೋದನಂ ಮನಸಿ ಕತ್ವಾ ಆಹ ‘‘ಅಭಿಧಮ್ಮಭಾಜನೀಯೇ’’ತಿಆದಿ. ನಿರವಸೇಸಕಥನನ್ತಿ ಅಸೇಸೇತ್ವಾ ಕಥನಂ. ತೇನ ಚಿತ್ತುಪ್ಪಾದಸಙ್ಗಹಿತೇ ಅತ್ಥೇ ಅಸೇಸೇತ್ವಾ ದೇಸನಾ ಇಧ ಅಭಿಧಮ್ಮಭಾಜನೀಯಸ್ಸ ಭಾರೋ, ನ ಸಬ್ಬಞೇಯ್ಯಧಮ್ಮೇತಿ ದಸ್ಸೇತಿ. ಯಥಾದಸ್ಸಿತವಿಸಯವಚನವಸೇನಾತಿ ದಸ್ಸಿತಪ್ಪಕಾರವಿಸಯಸ್ಸ ಕಥನವಸೇನ, ಧಮ್ಮತ್ಥವಸೇನ ದಸ್ಸಿತೇ ತಂತಂಚಿತ್ತುಪ್ಪಾದೇ ತತ್ಥ ಧಮ್ಮನಿರುತ್ತಾಭಿಲಾಪೇನ ಞಾಣಸ್ಸ ಕಥನವಸೇನಾತಿ ಅತ್ಥೋ. ಅಞ್ಞಾರಮ್ಮಣತಂ ನ ಪಟಿಸೇಧೇತಿ ಅತಪ್ಪರಭಾವತೋತಿ ಅಧಿಪ್ಪಾಯೋ. ನ ನಿರವಸೇಸೇನ ಕಥನಂ ಅಚಿತ್ತುಪ್ಪಾದಪರಿಯಾಪನ್ನಸ್ಸ ವಿಸಯಸ್ಸ ಅಕಥಿತತ್ತಾ. ಏವಂ ಪಟಿಭಾನಪಟಿಸಮ್ಭಿದಾವಿಸಯಸ್ಸಾಪಿ ನ ನಿರವಸೇಸೇನ ಕಥನನ್ತಿ ಸುತ್ತನ್ತಭಾಜನೀಯೇ ಅವಿಸೇಸವಚನೇನ ಸಬ್ಬಞಾಣಾರಮ್ಮಣತಂಯೇವ ಪಟಿಭಾನಪಟಿಸಮ್ಭಿದಾಯ ಪತಿಟ್ಠಾಪೇತಿ. ತಥಾ ತಿಸ್ಸೋ ಪಟಿಸಮ್ಭಿದಾತಿಆದಿಪಞ್ಹಪುಚ್ಛಕಪಾಳಿಯಾಪಿ. ತಿಸ್ಸೋತಿ ಅತ್ಥಧಮ್ಮಪಟಿಭಾನಪಟಿಸಮ್ಭಿದಾ. ನಿರುತ್ತಿಪಟಿಸಮ್ಭಿದಾ ಹಿ ‘‘ಪರಿತ್ತಾರಮ್ಮಣಾ’’ತೇವ ವುತ್ತಾ.

ಯದಿಪಿ ಸಿಯಾ ನ ತಸ್ಸಾ ಮಹಗ್ಗತಾರಮ್ಮಣತಾತಿ ಸಮ್ಬನ್ಧೋ. ‘‘ನ ಹಿ ಮಗ್ಗೋ ಪಚ್ಚಯುಪ್ಪನ್ನೋ ನ ಹೋತೀ’’ತಿ ಇಮಿನಾ ‘‘ಅತ್ಥಪಟಿಸಮ್ಭಿದಾ ನ ಮಗ್ಗಾರಮ್ಮಣಾ’’ತಿ ವಚನಸ್ಸ ಯಥಾವುತ್ತತ್ಥಸಾಧಕತಂ ವಿಭಾವೇತಿ. ತಸ್ಸಾತಿ ಪಟಿಭಾನಪಟಿಸಮ್ಭಿದಾಯ ನ ಮಹಗ್ಗತಾರಮ್ಮಣತಾ ಸಮ್ಭವತಿ ನನು ನಯಂ ಅನುಸ್ಸರನ್ತಸ್ಸಾತಿ ಅಧಿಪ್ಪಾಯೋ. ದ್ವೇಪೀತಿ ‘‘ಅತ್ಥಪಟಿಸಮ್ಭಿದಾ ನ ಮಗ್ಗಾರಮ್ಮಣಾ, ತಿಸ್ಸೋ ಪಟಿಸಮ್ಭಿದಾ ಸಿಯಾ ಪರಿತ್ತಾರಮ್ಮಣಾ, ಸಿಯಾ ಮಹಗ್ಗತಾರಮ್ಮಣಾ, ಸಿಯಾ ಅಪ್ಪಮಾಣಾರಮ್ಮಣಾ’’ತಿ ಚ ದ್ವೇಪಿ ಏತಾ ಪಾಳಿಯೋ. ತಾಸು ಬಲವತರಾಯ ಠಾನಸ್ಸ, ಇತರಾಯ ಅಧಿಪ್ಪಾಯಮಗ್ಗನಸ್ಸ ಚ ಉಪಾಯದಸ್ಸನಮುಖೇನ ತಾಸಂ ಅಞ್ಞಮಞ್ಞಂ ಅವಿರೋಧಂ ದಸ್ಸೇತುಂ ‘‘ಕುಸಲಾಕುಸಲಾನಂ ಪನಾ’’ತಿಆದಿಮಾಹ. ‘‘ನಿಪ್ಪರಿಯಾಯಾ ತತ್ಥ ಧಮ್ಮಪಟಿಸಮ್ಭಿದಾ’’ತಿ ಏತೇನ ತತ್ಥ ಅತ್ಥಪಟಿಸಮ್ಭಿದಾಯ ಪರಿಯಾಯಭಾವಮಾಹ. ತಥಾ ವಿಪಾಕಕಿರಿಯಾನನ್ತಿಆದಿ ಯಥಾಧಿಪ್ಪೇತಸ್ಸ ಅತ್ಥಸ್ಸ ವಿಸದಿಸೂದಾಹರಣದಸ್ಸನಂ. ಉಭಯೇನಪಿ ‘‘ಅತ್ಥಪಟಿಸಮ್ಭಿದಾ ನ ಮಗ್ಗಾರಮ್ಮಣಾ’’ತಿ (ವಿಭ. ೭೪೯) ವಚನಂ ಸುತ್ತನ್ತನಯಾನುಗತಂ ನಿಪ್ಪರಿಯಾಯತ್ಥಸ್ಸ ತತ್ಥ ಅಧಿಪ್ಪೇತತ್ತಾತಿ ದೀಪೇತಿ. ಕಿಞ್ಚಿ ಪನ ಞಾಣನ್ತಿಆದಿ ‘‘ತಿಸ್ಸೋ ಪಟಿಸಮ್ಭಿದಾ’’ತಿಆದಿಪಾಳಿಯಾ ಸಮತ್ಥಕಂ. ಯಥಾಧಿಪ್ಪೇತಸ್ಸ ಅತ್ಥಸ್ಸ ಪಟಿಭಾನಂ ದೀಪನಂ ಪಟಿಭಾನಂ. ತೇನಾಹ ‘‘ಞೇಯ್ಯಪ್ಪಕಾಸನತೋ’’ತಿ. ಇತಿ ಯಾ ‘‘ತಿಸ್ಸೋ ಪಟಿಸಮ್ಭಿದಾ’’ತಿ ಪಾಳಿ, ತಸ್ಸಾ ಬಲವಭಾವವಿಭಾವನೇನ ಇತರಾಯ ಅಧಿಪ್ಪಾಯಮಗ್ಗನಂ ಕತನ್ತಿ ವೇದಿತಬ್ಬಂ. ನಿಪ್ಪರಿಯಾಯಾತಿ ಪರಿಯಾಯರಹಿತಾ ಉಜುಕಂ ಸರೂಪೇನೇವ ಪವತ್ತಾ. ನಿಪ್ಪರಿಯಾಯ…ಪೇ… ಪವತ್ತಿಯನ್ತಿ ಏಕನ್ತಿಕಅತ್ಥಾರಮ್ಮಣಂ ಞಾಣಂ ಅತ್ಥಪಟಿಸಮ್ಭಿದಾ, ಞಾಣಾರಮ್ಮಣಂ ಪಟಿಭಾನಪಟಿಸಮ್ಭಿದಾತಿ ಗಹೇತ್ವಾ ದೇಸನಾಯಂ.

ಸೋ ಏವಾತಿ ಪರಸ್ಸ ಅಭಿಲಾಪಸದ್ದೋ ಏವ. ಅನುವತ್ತಮಾನತಾ ಚಸ್ಸ ನಿರುತ್ತಿಪಟಿಸಮ್ಭಿದಾ ಪಚ್ಚುಪ್ಪನ್ನಮೇವ ಸದ್ದಂ ಆರಮ್ಮಣಂ ಕರೋನ್ತೀ, ಸದ್ದಂ ಸುತ್ವಾ ‘‘ಅಯಂ ಸಭಾವನಿರುತ್ತಿ, ಅಯಂ ನ ಸಭಾವನಿರುತ್ತೀ’’ತಿ ಜಾನನ್ತೀತಿ ಚ ಆದಿವಚನವಸೇನ ವೇದಿತಬ್ಬೋ.

ಪಞ್ಹಪುಚ್ಛಕವಣ್ಣನಾ ನಿಟ್ಠಿತಾ.

ಪಟಿಸಮ್ಭಿದಾವಿಭಙ್ಗವಣ್ಣನಾ ನಿಟ್ಠಿತಾ.