(೬.) ಛಕ್ಕನಿದ್ದೇಸವಣ್ಣನಾ

೯೪೪. ‘‘ಕೋಧನೋ ಹೋತಿ ಉಪನಾಹೀ’’ತಿಆದಿನಾ ಕೋಧಾದಿಹೇತುಕಾ ಉಪನಾಹಾದಯೋ ಕೋಧಾದೀನಂ ಸಹಾಯಕಾರಣಭಾವೇನ ಸುತ್ತನ್ತೇ ವುತ್ತಾತಿ ಕೋಧಾದಯೋ ಏವ ವಿವಾದಮೂಲಾನಿ, ತೇನೇತ್ಥ ತೇ ಏವ ವುತ್ತಾ. ಸನ್ದಿಟ್ಠಿಪರಾಮಸಿತಾ ಅತ್ತನೋ ದಿಟ್ಠಿಯಂ ಅಭಿನಿವಿಟ್ಠತಾ.

೯೪೫. ಅಪ್ಪತಿಸ್ಸಯೋತಿ ಪತಿಸ್ಸಯಭೂತೇಹಿ ಗರೂಹಿ ವಿರಹಿತೋ. ಅಪ್ಪಮಾದಲಕ್ಖಣನ್ತಿ ಸತಿಅವಿಪ್ಪವಾಸಂ ಕುಸಲಾನುಯೋಗಸಾತಚ್ಚಂ ವಾ.

ಯುತ್ತಪಯುತ್ತತಾತಿ ತನ್ನಿನ್ನತಾವಸೇನ ಸುಟ್ಠು ಯುತ್ತತಾ. ಗಣಸಙ್ಗಣಿಕಾ ಕಿಲೇಸವಸೇನ ಪವತ್ತಾ ಸಙ್ಗಣಿಕಾ. ಇತ್ಥಿಪಟಿಸಂಯುತ್ತಕಥಾಸವನೇ ಇತ್ಥಿಸದ್ದಸವನೇ ಚ ಅಸ್ಸಾದೋ ಸವನಸಂಸಗ್ಗೋ. ಇತ್ಥಿಯಾ ಕಸ್ಸಚಿ ದಾನಗ್ಗಹಣಸ್ಸಾದೋ ಪರಿಭೋಗಸಂಸಗ್ಗೋ.

೯೪೬. ಸೋಮನಸ್ಸೇನ ಸದ್ಧಿಂ ಉಪವಿಚರನ್ತೀತಿ ಸೋಮನಸ್ಸುಪವಿಚಾರಾತಿ ಅಕುಸಲಸೋಮನಸ್ಸಸಹಗತಾ ರೂಪವಿಚಾರಾದಯೋ ಇಧಾಧಿಪ್ಪೇತಾತಿ ವೇದಿತಬ್ಬಾ, ತಥಾ ಉಪೇಕ್ಖುಪವಿಚಾರಾ ಚ. ತಂಸಮ್ಪಯುತ್ತೋ ವಾತಿ ಏತೇನ ವಿಚಾರಗ್ಗಹಣೇನ ವಿತಕ್ಕೋಪಿ ಗಹಿತೋತಿ ವಿತಕ್ಕಪ್ಪವತ್ತನೇನ ‘‘ಉಪವಿತಕ್ಕೇತೀ’’ತಿ ಇದಮ್ಪಿ ವುತ್ತಂ ಹೋತೀತಿ ದಸ್ಸೇತಿ.

೯೪೭. ಅಞ್ಞಾಣಸಮ್ಪಯುತ್ತಾತಿ ವಿಚಿಕಿಚ್ಛುದ್ಧಚ್ಚಸಹಗತಚಿತ್ತೇಸು ಉಪೇಕ್ಖಾ ಮೋಹೋತಿ ವದನ್ತಿ, ಲೋಭಸಮ್ಪಯುತ್ತುಪೇಕ್ಖಾಪಿ ಪನ ಗೇಹಸ್ಸಿತಾ ನ ನ ಹೋತಿ.

೯೪೮. ಅಧಿಚ್ಚಸಮುಪ್ಪನ್ನಿಕೋ ‘‘ಅಧಿಚ್ಚ ಸಮುಪ್ಪನ್ನೋ ಅತ್ತಾ ಉಪ್ಪನ್ನೋ ಭವಿಸ್ಸತೀ’’ತಿ ಗಣ್ಹನ್ತೋ ಸಸ್ಸತದಿಟ್ಠಿಕೋ ಹೋತೀತಿ ಏವರೂಪಸ್ಸ ದಿಟ್ಠಿ ವಿಯಾತಿ ದಸ್ಸೇನ್ತೋ ‘‘ಅಧಿಚ್ಚಸಮುಪ್ಪನ್ನಿಕಸ್ಸೇವಾ’’ತಿ ಆಹ. ನ ಸೋ ಜಾತೋತಿ ಏತ್ಥ ‘‘ಜಾತೂ’’ತಿ ಅಯಂ ನಿಪಾತೋ ಉ-ಕಾರಸ್ಸ ಓ-ಕಾರಂ ಕತ್ವಾ ಜಾತೋತಿ ವುತ್ತೋ, ತೇನ ವಾ ಸಮಾನತ್ಥಂ ನಿಪಾತನ್ತರಂ ಏತಂ ದಟ್ಠಬ್ಬಂ. ಸಬ್ಬಾಸವದಿಟ್ಠೀತಿ ಸಬ್ಬಾಸವಪರಿಯಾಯೇನ ಆಗತಾ ದಿಟ್ಠಿ.

ಛಕ್ಕನಿದ್ದೇಸವಣ್ಣನಾ ನಿಟ್ಠಿತಾ.