೧. ಪಣ್ಣತ್ತಿವಾರೋ

ಉದ್ದೇಸವಾರವಣ್ಣನಾ

೧-೯. ಆಯತನಯಮಕಾದೀಸು ಚ ಪಣ್ಣತ್ತಿವಾರೇ ಪದಸೋಧನವಾರಾದೀನಂ ವಚನೇ ಕಾರಣಂ ಖನ್ಧಯಮಕೇ ವುತ್ತನಯೇನೇವ ವೇದಿತಬ್ಬಂ. ‘‘ಏಕಾದಸ ಏಕಾದಸ ಕತ್ವಾ ತೇತ್ತಿಂಸಸತಂ ಯಮಕಾನೀ’’ತಿಆದಿನಾ ಕೇಸುಚಿ ಪೋತ್ಥಕೇಸು ಗಣನಾ ಲಿಖಿತಾ, ಸಾ ತಥಾ ನ ಹೋತಿ. ‘‘ದ್ವತ್ತಿಂಸಸತ’’ನ್ತಿಆದಿನಾ ಅಞ್ಞತ್ಥ ಲಿಖಿತಾ.

ಉದ್ದೇಸವಾರವಣ್ಣನಾ ನಿಟ್ಠಿತಾ.

ನಿದ್ದೇಸವಾರವಣ್ಣನಾ

೧೦-೧೭. ವಾಯನಟ್ಠೇನಾತಿ ಪಸಾರಣಟ್ಠೇನ, ಪಾಕಟಭಾವಟ್ಠೇನ ವಾ. ‘‘ಕಾಯೋ ಧಮ್ಮೋ’’ತಿ ಚ ವುಚ್ಚಮಾನಂ ಸಬ್ಬಂ ಸಸಭಾವಂ ಆಯತನಮೇವಾತಿ ‘‘ಕಾಯೋ ಆಯತನ’’ನ್ತಿ, ‘‘ಧಮ್ಮೋ ಆಯತನ’’ನ್ತಿ ಚ ಏತ್ಥ ‘‘ಆಮನ್ತಾ’’ತಿ ವುತ್ತಂ. ಕಾಯವಚನೇನ ಪನ ಧಮ್ಮವಚನೇನ ಚ ಅವುಚ್ಚಮಾನಂ ಕಞ್ಚಿ ಸಸಭಾವಂ ನತ್ಥೀತಿ ‘‘ನ ಕಾಯೋ ನಾಯತನಂ, ನ ಧಮ್ಮೋ ನಾಯತನ’’ನ್ತಿ ಏತ್ಥ ‘‘ಆಮನ್ತಾ’’ಇಚ್ಚೇವ ವುತ್ತಂ.

ನಿದ್ದೇಸವಾರವಣ್ಣನಾ ನಿಟ್ಠಿತಾ.