೧೦. ತಪುಸ್ಸಸುತ್ತವಣ್ಣನಾ

೪೧. ದಸಮೇ ಪಕ್ಖನ್ದತೀತಿ ಪವಿಸತಿ. ಪಸೀದತೀತಿ ಪಸಾದಂ ಅಭಿರುಚಿಂ ಆಪಜ್ಜತಿ, ಪತಿಟ್ಠಾತಿ ವಿಮುಚ್ಚತೀತಿ ಅತ್ಥೋ. ಕಥಾಪಾಭತನ್ತಿ ಕಥಾಯ ಮೂಲಂ. ಮೂಲಞ್ಹಿ ‘‘ಪಾಭತ’’ನ್ತಿ ವುಚ್ಚತಿ. ಯಥಾಹ –

‘‘ಅಪ್ಪಕೇನಪಿ ಮೇಧಾವೀ, ಪಾಭತೇನ ವಿಚಕ್ಖಣೋ;

ಸಮುಟ್ಠಾಪೇತಿ ಅತ್ತಾನಂ, ಅಣುಂ ಅಗ್ಗಿಂವ ಸನ್ಧಮ’’ನ್ತಿ. (ಜಾ. ೧.೧.೪);

ತೇನೇವಾಹ ‘‘ಕಥಾಪಾಭತನ್ತಿ ಕಥಾಮೂಲ’’ನ್ತಿ. ವಿತಕ್ಕಗ್ಗಹಣೇನೇವ ತಂಸಹಚರಿತೋ ವಿಚಾರೋಪಿ ಗಹಿತೋ. ತೇನೇವೇತ್ಥ ಬಹುವಚನನಿದ್ದೇಸೋ ಕತೋತಿ ಆಹ ‘‘ವಿತಕ್ಕೇಸೂತಿ ವಿತಕ್ಕವಿಚಾರೇಸೂ’’ತಿ.

ತಪುಸ್ಸಸುತ್ತವಣ್ಣನಾ ನಿಟ್ಠಿತಾ.

ಮಹಾವಗ್ಗವಣ್ಣನಾ ನಿಟ್ಠಿತಾ.