೪. ಧಮ್ಮಞ್ಞೂಸುತ್ತವಣ್ಣನಾ

೬೮. ಚತುತ್ಥೇ ಸುತ್ತಗೇಯ್ಯಾದಿಧಮ್ಮಂ ಜಾನಾತೀತಿ ಧಮ್ಮಞ್ಞೂ. ತಸ್ಸ ತಸ್ಸೇವ ಸುತ್ತಗೇಯ್ಯಾದಿನಾ ಭಾಸಿತಸ್ಸ ತದಞ್ಞಸ್ಸ ಸುತ್ತಪದತ್ಥಸ್ಸ ಬೋಧಕಸ್ಸ ಸದ್ದಸ್ಸ ಅತ್ಥಕುಸಲತಾವಸೇನ ಅತ್ಥಂ ಜಾನಾತೀತಿ ಅತ್ಥಞ್ಞೂ. ‘‘ಏತ್ತಕೋಮ್ಹಿ ಸೀಲೇನ ಸಮಾಧಿನಾ ಪಞ್ಞಾಯಾ’’ತಿ ಏವಂ ಯಥಾ ಅತ್ತನೋ ಪಮಾಣಜಾನನವಸೇನ ಅತ್ತಾನಂ ಜಾನಾತೀತಿ ಅತ್ತಞ್ಞೂ. ಪಟಿಗ್ಗಹಣಪರಿಭೋಗಪರಿಯೇಸನವಿಸ್ಸಜ್ಜನೇಸು ಮತ್ತಂ ಜಾನಾತೀತಿ ಮತ್ತಞ್ಞೂ. ನಿದ್ದೇಸೇ ಪನ ಪಟಿಗ್ಗಹಣಮತ್ತಞ್ಞುತಾಯ ಏವ ಪರಿಭೋಗಾದಿಮತ್ತಞ್ಞುತಾ ಪಬೋಧಿತಾ ಹೋತೀತಿ ಪಟಿಗ್ಗಹಣಮತ್ತಞ್ಞುತಾವ ದಸ್ಸಿತಾ. ‘‘ಅಯಂ ಕಾಲೋ ಉದ್ದೇಸಸ್ಸ, ಅಯಂ ಕಾಲೋ ಪರಿಪುಚ್ಛಾಯ, ಅಯಂ ಕಾಲೋ ಯೋಗಸ್ಸ ಅಧಿಗಮಾಯಾ’’ತಿ ಏವಂ ಕಾಲಂ ಜಾನಾತೀತಿ ಕಾಲಞ್ಞೂ. ತತ್ಥ ಪಞ್ಚ ವಸ್ಸಾನಿ ಉದ್ದೇಸಸ್ಸ ಕಾಲೋ, ದಸ ಪರಿಪುಚ್ಛಾಯ, ಇದಂ ಅತಿಸಮ್ಬಾಧಂ, ಅತಿಕ್ಖಪಞ್ಞಸ್ಸ ತಾವತಾ ಕಾಲೇನ ತೀರೇತುಂ ಅಸಕ್ಕುಣೇಯ್ಯತ್ತಾ ದಸ ವಸ್ಸಾನಿ ಉದ್ದೇಸಸ್ಸ ಕಾಲೋ, ವೀಸತಿ ಪರಿಪುಚ್ಛಾಯ, ತತೋ ಪರಂ ಯೋಗೇ ಕಮ್ಮಂ ಕಾತಬ್ಬಂ. ಖತ್ತಿಯಪರಿಸಾದಿಕಂ ಅಟ್ಠವಿಧಂ ಪರಿಸಂ ಜಾನಾತೀತಿ ಪರಿಸಞ್ಞೂ. ಭಿಕ್ಖುಪರಿಸಾದಿಕಂ ಚತುಬ್ಬಿಧಂ, ಖತ್ತಿಯಪರಿಸಾದಿಕಂ ಮನುಸ್ಸಪರಿಸಂಯೇವ ಪುನ ಚತುಬ್ಬಿಧಂ ಗಹೇತ್ವಾ ಅಟ್ಠವಿಧಂ ವದನ್ತಿ ಅಪರೇ. ನಿದ್ದೇಸೇ ಪನಸ್ಸ ಖತ್ತಿಯಪರಿಸಾದಿಚತುಬ್ಬಿಧಪರಿಸಗ್ಗಹಣಂ ನಿದಸ್ಸನಮತ್ತಂ ದಟ್ಠಬ್ಬಂ. ‘‘ಇಮಂ ಮೇ ಸೇವನ್ತಸ್ಸ ಅಕುಸಲಾ ಧಮ್ಮಾ ಪರಿಹಾಯನ್ತಿ, ಕುಸಲಾ ಧಮ್ಮಾ ಅಭಿವಡ್ಢನ್ತಿ, ತಸ್ಮಾ ಅಯಂ ಪುಗ್ಗಲೋ ಸೇವಿತಬ್ಬೋ, ವಿಪರಿಯಾಯತೋ ಅಞ್ಞೋ ಅಸೇವಿತಬ್ಬೋ’’ತಿ ಸೇವಿತಬ್ಬಾಸೇವಿತಬ್ಬಪುಗ್ಗಲಂ ಜಾನಾತೀತಿ ಪುಗ್ಗಲಪರೋಪರಞ್ಞೂ. ಏವಞ್ಹಿ ತೇಸಂ ಪುಗ್ಗಲಾನಂ ಪರೋಪರಂ ಉಕ್ಕಟ್ಠನಿಹೀನತಂ ಜಾನಾತಿ ನಾಮ. ನಿದ್ದೇಸೇಪಿಸ್ಸ ಸೇವಿತಬ್ಬಾಸೇವಿತಬ್ಬಪುಗ್ಗಲೇ ವಿಭಾವನಮೇವ ಸಮಣಕಥಾಕತನ್ತಿ ದಟ್ಠಬ್ಬಂ.

ಧಮ್ಮಞ್ಞೂಸುತ್ತವಣ್ಣನಾ ನಿಟ್ಠಿತಾ.