೭. ಮಜ್ಝೇಸುತ್ತವಣ್ಣನಾ

೬೧. ಸತ್ತಮೇ ಮನ್ತಾತಿ ಯ-ಕಾರಲೋಪೇನ ನಿದ್ದೇಸೋ, ಕರಣತ್ಥೇ ವಾ ಏತಂ ಪಚ್ಚತ್ತವಚನಂ. ತೇನಾಹ ‘‘ತಾಯ ಉಭೋ ಅನ್ತೇ ವಿದಿತ್ವಾ’’ತಿ. ಫಸ್ಸವಸೇನ ನಿಬ್ಬತ್ತತ್ತಾತಿ ದ್ವಯದ್ವಯಸಮಾಪತ್ತಿಯಂ ಅಞ್ಞಮಞ್ಞಂ ಸಮ್ಫಸ್ಸವಸೇನ ನಿಬ್ಬತ್ತತ್ತಾ, ‘‘ಫಸ್ಸಪಚ್ಚಯಾ ತಣ್ಹಾ, ತಣ್ಹಾಪಚ್ಚಯಾ ಉಪಾದಾನಂ, ಉಪಾದಾನಪಚ್ಚಯಾ ಭವೋ, ಭವಪಚ್ಚಯಾ ಜಾತೀ’’ತಿ ಇಮಿನಾ ಚಾನುಕ್ಕಮೇನ ಫಸ್ಸಸಮುಟ್ಠಾನತ್ತಾ ಇಮಸ್ಸ ಕಾಯಸ್ಸ ಫಸ್ಸವಸೇನ ನಿಬ್ಬತ್ತತ್ತಾತಿ ವುತ್ತಂ. ಏಕೋ ಅನ್ತೋತಿ ಏತ್ಥ ಅಯಂ ಅನ್ತ-ಸದ್ದೋ ಅನ್ತಅಬ್ಭನ್ತರಮರಿಯಾದಲಾಮಕಅಭಾವಕೋಟ್ಠಾಸಪದಪೂರಣಸಮೀಪಾದೀಸು ದಿಸ್ಸತಿ. ‘‘ಅನ್ತಪೂರೋ ಉದರಪೂರೋ’’ತಿಆದೀಸು (ಸು. ನಿ. ೧೯೭) ಹಿ ಅನ್ತೇ ಅನ್ತಸದ್ದೋ. ‘‘ಚರನ್ತಿ ಲೋಕೇ ಪರಿವಾರಛನ್ನಾ ಅನ್ತೋ ಅಸುದ್ಧಾ, ಬಹಿ ಸೋಭಮಾನಾ’’ತಿಆದೀಸು (ಸಂ. ನಿ. ೧.೧೨೨) ಅಬ್ಭನ್ತರೇ. ‘‘ಕಾಯಬನ್ಧನಸ್ಸ ಅನ್ತೋ ಜೀರತಿ (ಚೂಳವ. ೨೭೮) ಸಾ ಹರಿತನ್ತಂ ವಾ ಪನ್ಥನ್ತಂ ವಾ ಸೇಲನ್ತಂ ವಾ ಉದಕನ್ತಂ ವಾ’’ತಿಆದೀಸು (ಮ. ನಿ. ೧.೩೦೪) ಮರಿಯಾದಾಯಂ. ‘‘ಅನ್ತಮಿದಂ, ಭಿಕ್ಖವೇ, ಜೀವಿಕಾನ’’ನ್ತಿಆದೀಸು (ಸಂ. ನಿ. ೩.೮೦; ಇತಿವು. ೯೧) ಲಾಮಕೇ. ‘‘ಏಸೇವನ್ತೋ ದುಕ್ಖಸ್ಸಾ’’ತಿಆದೀಸು (ಮ. ನಿ. ೩.೩೯೩; ಸಂ. ನಿ. ೨.೫೧) ಅಭಾವೇ. ಸಬ್ಬಪಚ್ಚಯಸಙ್ಖಯೋ ಹಿ ದುಕ್ಖಸ್ಸ ಅಭಾವೋ ಕೋಟೀತಿಪಿ ವುಚ್ಚತಿ. ‘‘ತಯೋ ಅನ್ತಾ’’ತಿಆದೀಸು (ದೀ. ನಿ. ೩.೩೦೫) ಕೋಟ್ಠಾಸೇ. ‘‘ಇಙ್ಘ ತಾವ ಸುತ್ತನ್ತಂ ವಾ ಗಾಥಾಯೋ ವಾ ಅಭಿಧಮ್ಮಂ ವಾ ಪರಿಯಾಪುಣಸ್ಸು, ಸುತ್ತನ್ತೇ ಓಕಾಸಂ ಕಾರಾಪೇತ್ವಾ’’ತಿ (ಪಾಚಿ. ೪೪೨) ಚ ಆದೀಸು ಪದಪೂರಣೇ. ‘‘ಗಾಮನ್ತಂ ವಾ ಓಸಟೋ (ಪಾರಾ. ೪೦೯-೪೧೦; ಚೂಳವ. ೩೪೩) ಗಾಮನ್ತಸೇನಾಸನ’’ನ್ತಿಆದೀಸು (ಪಾರಾ. ಅಟ್ಠ. ೨.೪೧೦) ಸಮೀಪೇ. ಸ್ವಾಯಮಿಧ ಕೋಟ್ಠಾಸೇ ವತ್ತತೀತಿ ಅಯಮೇಕೋ ಕೋಟ್ಠಾಸೋತಿ.

ಸನ್ತೋ ಪರಮತ್ಥತೋ ವಿಜ್ಜಮಾನೋ ಧಮ್ಮಸಮೂಹೋತಿ ಸಕ್ಕಾಯೋ, ಪಞ್ಚುಪಾದಾನಕ್ಖನ್ಧಾ. ತೇನಾಹ ‘‘ತೇಭೂಮಕವಟ್ಟ’’ನ್ತಿ. ಸೇಸಮೇತ್ಥ ಸುವಿಞ್ಞೇಯ್ಯಮೇವ.

ಮಜ್ಝೇಸುತ್ತವಣ್ಣನಾ ನಿಟ್ಠಿತಾ.